މަރާލި ކަމުގައިވީ ނަމަވެސް މި ސަރުކާރަށް ކިޔަމަންވެ ބޯ ނުލަބާނެ ކަމަށާއި ރައްޔިތުންގެ މަޖިލީހުގައި ތަމްސީލު ކުރައްވާ ގޮނޑި ގެއްލުނު ނަމަވެސް އިސްލާހީ މަސައްކަތުގައި ޖެހިލުންވުމެއްނެތި އެކަމުގައި ކޮންމެ މަސައްކަތެއް ކުރުމަށް ފަސްނުޖެހި ސާބިތުވެ ހުންނަވާނެ ކަމަށް މައްޗަންގޮޅީ ދެކުނު ދާއިރާގެ މެންބަރު އަބްދުﷲ ސިނާން ވިދާޅުވެއްޖެ އެވެ.
ޕާޓީ އިން ވަކިކުރާ މަޖިލީހުގެ މެންބަރުންނާއި އަމިއްލައަށް ވަކިވާ މެންބަރުންގެ ގޮނޑި ގެއްލޭނެ ކަމަށް ސުޕްރީމް ކޯޓުން ހުކުމް ކުރިތާ އިރުކޮޅެއްގެ ތެރޭގައި، "އަވަސް" އަށް ދެއްވި އިންޓަވިއުއެއްގައި ސިނާން ވިދާޅުވީ ފުރާނަ ދުއްވާލިޔަސް، އަދި ކޮށައި ކުދި ކުދި ކޮށްލިޔަސް އޭނާގެ ކިޔަމަންތެރިކަމެއް މި ސަރުކާރަކަށް ނުލިބޭނެ ކަމަށާއި އެ ކިޔަމަންތެރިކަން ހޯދޭނެ ގޮތެއް ވެސް ނޯންނާނެ ކަމަށެވެ. އަދި މިހުކުމުން އިތުރު ހިތްވަރެއް ލިބިއްޖެ ކަމަށާއި އޭރުވެސް ނިންމެވި ގޮތަށް ކޮންމެ ހާލަތެއްގައި ވެސް އިސްލާހީ މަސައްކަތުގައި ސާބިތުވެ ހުންނަވާނެ ކަމަށް ސިނާން ވިދާޅުވި އެވެ.
"އަޅުގަނޑު ނިންމި ގޮތުގައި އެ ސްޓޭންޑްގައި އަޅުގަނޑު ސާބިތުވެ މިއަދުވެސް މިހުރީ. އެ ސްޓޭންޑް ބަދަލެއް ނުވާނެ. ފުރާނަ ދުއްވާލިޔަސް، ކުދި ކުދި ކޮށްލިޔަސް ކޮންމެ ގޮތެއް އަޅުގަނޑަށް ހެދިޔަސް އަޅުގަނޑުގެ ސްޓޭންޑްގައި ހުންނާނީ. ގޮނޑި ގެއްލުނަސް ކޮންމެ ގޮތެއް ވިޔަސް އަޅުގަނޑުގެ ވޯޓެއް މަސީހަކަށް ނޯންނާނެ. ނުވެސް ދޭނަން. މި ސާބިތުކަމުގައި އަޅުގަނޑު ހުންނާނަން." ސިނާން ވިދާޅުވި އެވެ. "އިރާދަ ކުރެއްވިއްޔާމުން ރައްޔިތުން އެދޭ ގޮތަށް ގައުމުގެ މަސްލަހަތާއި ފައިދާއަށް ކަންކަން ބަދަލުވެގެން ދާ މަންޒަރު އަޅުގަނޑުމެންނަށް އެބަ ފެނޭ. މިދަނޑިވަޅުގައި ހިތްވަރާ އެކު މަސައްކަތް ކުރުމަށް ހުރިހާ އެންމެންނަށް އަޅުގަނޑު އިލްތިމާސްކުރަން،"
އޭނާ ވިދާޅުވީ ޕީޕީއެމްއާ އަލަށް ގުޅުމަށް ލިބުނު ދައުވަތު ގަބޫލު ކުރާނެ އެއްވެސް ގޮތެއް ނޯންނާނެ ކަމަށެވެ. އަދި އޭނާގެ ގޮނޑި ދިފާއު ކުރުމަށް ޕީޕީއެމްއާ އެއްކޮޅަށް އޭނާ އެއްވެސް ވޯޓެއް މަޖިލީހުގައި ނުދެއްވާނެ ކަމަށް ވެސް ސިނާން ވިދާޅުވި އެވެ.
ރާއްޖެ ޓީވީއަށް ދެއްވި އިންޓަވިއުއެއްގަިއ ވެސް "ސިނާން ވިދާޅުވީ، ސުޕްރީމް ކޯޓްގެ ހުކުމަކީ އަނިޔާއެއް ކަމަށާއި މީގެ ސަބަބުން ރާއްޖޭގެ ޑިމޮކްރަސީއަށް ނޭދެވޭ އަސަރުތަކެއް ކުރާނެ ކަމަށެވެ. އަދި މީގެ ސަބަބުން ރައްޔިތުން މަޖިލީހުގެ ބާރުތައް އިތުރަށް ހަނިވެގެން ގޮސް، އޭގެ ނޭދެވޭ އަސަރު ރާއްޖޭގެ ރައްޔިތުންނަށް ކުރާނެ ކަމަށާއި ސުޕްރީމް ކޯޓްގެ ހުކުމަކީ ރައްޔިތުންގެ މަސްލަހަތުގައި ނިންމި ނިންމުމެއް ނޫން ކަމަށެވެ.
"ރައްޔިތުންނާ އެކު ހުރުމަށް އަޅުގަނޑު މި ހުރީ. އިސްލާހީ މަސައްކަތް އަޅުގަނޑު ފެށީ މިއަށް ވުރެ ރަނގަޅު ގޮތެއް ނެތީމާ. އަޅުގަނޑުމެންގެ ރައްޔިތުންނަށް ވެސް އަދި ދާއިރާއަށް ވެސް އެންމެ ފައިދާ ހުރި ގޮތަކީ އެއީ ކަމަށް ގަބޫލު ކުރެވިގެން އަޅުގަނޑު މި މަސައްކަތް ފެށީ. އަޅުގަނޑު ދާއިރާއަށް ވެސް އެންމެ މަންފާހުރި ގޮތަކީ އެއީ. އަޅުގަނޑު މި ހުރީ ސާބިތުކަމާ އެކު. އަޅުގަނޑުގެ ސްޓޭންޑް ބަދަލެއް ނުކުރެވޭނެ ނުވެސް ވާނެ. އަދި އަޅުގަނޑަށް ކޮންމެ ގޮތެއް ހެދިޔަސް ޕީޕީއެމް އިން އެދިން ދައުވަތު އަޅުގަނޑު ގަބޫލެއް ނުކުރާނަން. އިދިކޮޅު މަސައްކަތުގައި އަޅުގަނޑު ހުންނާނަން،" ސިނާން ވިދާޅުވި އެވެ.
ޕީޕީއެމްގެ ފަރާތްތަކުން ސުޕްރީމް ކޯޓްގެ ހުކުމާ މެދު އުފާފާޅުކުރަމުން އަންނާތީ ސިނާން ވިދާޅުވީ ހުކުމުގެ ސަބަބުން ވަގުތީ އުފަލެއް ލިބިދާނެ ކަމަށާއި ދިގު މުއްދަތުގައި އެކަމާ މެދު ހުދު އެބޭފުޅުން ވެސް ހިތާމަ ކުރާނެ ކަމަށެވެ. އޭނާ ވިދާޅުވީ ދުނިޔޭގެ ތާރީހު ވެސް ދައްކަނީ ރައްޔިތުންގެ އަތްމައްޗަށް ބާރުތައް ފުރޮޅިގެން ދިޔަތަން ކަމަށެވެ. އަދި އެ މަންޒަރު ރާއްޖެއިން ވެސް ލަހެއް ނުވެ ފެންނާނެ ކަމަށް އުންމީދު ކުރައްވާ ކަމަށް ވިދާޅުވި އެވެ.