ހަތަރު ގައުމަކުން ގަތަރާ ގުޅުން ކަނޑާލުމުން އުފެދިފައިވާ ގަޑުބަޑު ހައްލުކުރަން އެގައުމުތަކުގެ ވެރިންނާ ކުރެއްވި މަޝްވަރާތައް ނިންމަވައިލެއްވުމަަށް ފަހު އެކަމުން ހާސިލުވީ ކޮން ކަމެއްކަން އެމެރިކާގެ ސެކްރެޓަރީ އޮފް ސްޓޭޓް ރިކްސް ޓިލާސަން ވިދާޅެއް ނުވި އެވެ.
ގަޑުބަޑު ހައްލުކުރަން މަޝްވަރާ ކުރެއްވުމަށް އަރަބި ގައުމުތަކަށް ކުރެއްވި ދަތުރުފުޅު ޓިލާސަން ނިންމަވައިލެއްވީ ގަތަރުންނެވެ. ރޮއިޓާސް ބުނީ ގަތަރުގެ އަމީރު ޝައިޚު ތަމީމް ބިން ހަމަދު އައް ސާނީއާ ބައްދަލު ކުރައްވައި ނިންމަވައިލެއްވުމުން، މަޝްވަފރާތަކުން ކުރިއެރުމެއް ލިބުނުތޯ ނޫސްވެރިން ސުވާލުކުރި ކަމަށެވެ. ނަމަވެސް އެ ސުވާލަށް ޓިލާސަން ޖަވާބެއް ނުދެއްވި ކަމަށް އެ އެޖެންސީން ބުންޏެވެ.
ޓިލާސަން އަށް އަލް ވަދާއުވުމަށް ދޯހާގެ އެއާޕޯޓަށް ވަޑައިގެންނެވީ ގަތަރުު އަމީރުގެ އަޚު މުޙައްމަދު ބިން ހަމަދު އައް ސާނީއެވެ. އޭނާ ޓިލާސަން އަށް ވިދާޅުވީ " މިއަށް ވުރެ ރަނގަޅު ހާލަތެއްގައި އަލުން ދެކެވަޑައިގެންނެވުމަށް އުއްމީދުކުރައްވާ" ކަމަށެވެ.
ޓެރަރިޒަމަށް ވާގިދޭ ކަމަށް ބުނެ އަރަބި ގައުމުތަކުން ގަތަރާ ގުޅުން ކަނޑައިލީ މިދިޔަ ޖޫން މަހުގެ ހަތަރުވަނަ ދުވަހުއެވެ. އެއަށް ފަހު އެގައުމުތަކުން ވަނީ 13 ކަމެއް ކުރަން ގަތަރަށް ހުށަހަޅާފައެވެ. އީރާނާ ސިޔާސީ ގުޅުން ކަނޑައިލުމާއި ގަތަރުގައިވާ ތުރުކީގެ އަސްކަރީ މަރުކަޒުތައް ބަންދުކުރުމާއި އަލް ޖަޒީރާ ބަންދުކުރުން އޭގެ ތެރޭގައި ހިމެެނެ އެވެ.
އެކަންތައްތައް ކުރުމަށް ގަތަރުން ވަނީ ދެކޮޅު ހަދާފައެވެ.