އިޒްރޭލުން ގަދަބާރުން ވެރިވެގަނެގެން އުޅޭ ގުދުސްގައިވާ މުސްލިމުންގެ ތިން ވަނައަށް އެންމެ މުގައްދަސް މިސްކިތް ކަމަށްވާ އަލް އަގުސާ ގައި މިއަދުގެ ހުކުރު ނަމާދު ކުރިޔަ ނުދީ ހިފަހައްޓައިފިއެވެ.
އިޒްރޭލު ސަރުކާރާ ހަވާލާދީ ރޮއިޓާސް ބުނީ މިސްކިތް ބަންދުކުރީ އެތަނުގެ ކައިރީގައި ތިބި އިޒްރޭލު ފުލުހުންގެ ދެމީހަކަށް ބަޔަކު ބަޑިން ހަމަލާދީ މަރައިލުމުން ކަމަށެވެ. އެހަމަލާ ދިނީ އިޒްރޭލުގެ ރަށްވެހިކަން އޮންނަ އަރަބިންގެ ދެމީހުން ކަމަށް ވެސް އެ އެޖެންސީން ބުންޏެވެ.
ފެލަސްޓީނިއަން އިންފޮމޭޝަން ސެންޓަރުން ބުނީ ގުދުސްގެ އެންމެ އިސް މުފްތީ އައް ޝައިޚު މުޙައްމަދު ޙުސައިން އާއި އިސްލާމީ އަވްގާފްގެ ވެރިޔާ މިސްކިތަށް ވެދެވަޑައިގަންނަވަން އުޅުއްވުމުން އެ ދެބޭފުޅުން ވެސް އިޒްރޭލު ފުލުހުން ހުއްޓުވި ކަމަށެވެ. އަގުސާ މިސްކިތުގައި ހުކުރު ނަމާދު ކުރިޔަ ނުދޭން އިޒްރޭލުން ނިންމުމުން މުފްތީ ވަނީ އެ މިސްކިތް ކައިރިއަށް ވީހާ ވެސް ގިނަ މުސްލިމުން ޖަމާވެ ތިބުމަށެވެ.
މުފްތީގެ ގޮވައިލެއްވުމަށް އިޖާބަދިން މީހުންނާ ދެކޮޅަށް އިޒްރޭލުގެ ހަރުކަށި އާއްމުން ވެސް ނުކުތް ކަމަށް އެނޫހުން ބުންޏެވެ/
ބައިނަލް އަގުވާމީ ހުރިހާ ގާނޫނަކާ ހިލާފަށް ޔަހޫދީން ވެރިވެގަނެ، އެމީހުންގެ ވެރިރަށް ކަމަށް ހަދައިގެން އުޅޭ ގުދުސްގައި ޔަހޫދީ ދެ ފުލުހުން މަރައިލި ހަމަލާ ފަލަސްތީނުގެ ރައީސް މަހުމޫދު އައްބާސް ވަނީ ކުށްވެރިކުރައްވާފައެވެ. ނަމަވެސް މިސްކިތް އަލުން ހުޅުވަން ވެސް އޭނާ ގޮވައި ލެއްވިއެވެ. މިއަދުގެ ހުކުރު ނަމާދު އަގްސާ މިސްކިތުގައި ނުކުރެވުނު އިރު، މިއީ 1969 ވަނަ އަހަރުގެ ފަހުން އެ މިސްކިތުގައި ހުކުރުނަމާދު ނުކުރެވި ދިޔަ ފުރަތަމަ ދުވަހެވެ.
މިއަދުގެ ހުކުރުނަމާދަށް ދާން އުޅުނު މުސްލިމުން އަގުސާ މިސްކިގަށް ވަނަ ނުދޭން ޔަހޫދީން ފޯރިމަރަނީ. ފޮޓޯ: ޕެލަސްޓީނިއަން އިންފޮމޭޝަން ސެންޓަރު.