ޖުމްހޫރީ ޕާޓީގެ ލީޑަރު އަދި ރައްޔިތުން މަޖިލީހުގެ މާމިނގިލީ ދާއިރާގެ މެންބަރު ގާސިމް އިބްރާހިމްގެ މައްޗައް ދައުލަތުން އުފުލާަފައިވާ ދައުވާތަކާ ގުޅިގެން މިއަދު 2:00 ހާއިރު ޝަރީއަތެއް ބާއްވަން ތައާވަލުކޮށްފި އެވެ.
ޝަރީއަތް ބޭއްވުމަށް ހަމަޖެހިފައިވާ ކަމުގެ ޗިޓު ކޮޅު އެމަނިކްފާނަށް ލިބިވަޑައިގަތީ މިއަދު ހެނދުނުގެ ވަގުތެއްގަ އެވެ. ކުރިން އެ ޝަރީއަތް ބޭއްވުމަށް ތާވަލުކޮށްފައި ވަނީ މިދިޔަ ބުރާސްފަތި ދުވަހުގެ ރޭ އެވެ. އަދި އެ ދައުވާތަކާ ގުޅޭ ލިޔުންތައް އެ ދުވަހު ވަނީ ދެ ފަރާތުން ބަދަލުކޮށްފަ އެވެ.
ގާސިމްގެ މައްޗައް ކުރާ ދައުވާތަކަކީ ރިޝްވަތު ދިނުމުގެ ހުށަހެޅިކަމުގެ ދައުވާ އާއި ރަސްމީ ހައިސިއްޔަތުން ކުރަން ޖެހޭ ކަންކަމަށް ނުފޫޒު ފޯރުވަން އުޅުން އަދި ވޯޓް ދޭން ހުރި މީހަކަށް ނުރަނގަޅު ނުފޫޒެއް ފޯރުވަން އުޅުނު ކަމަށް ތުހުމަތުކޮށް ކުރާ ދައުވާ އެވެ. ގާސިމްގެ މައްޗަށް އަނެއްކާ ވެސް ދައުވާ ކުރަން ޕީޖީ ކްރިމިނަލް ކޯޓަށް މައްސަލަތައް ފޮނުއްވީ އެ ތިން ދައުވާގެ އަޑުއެހުމަށް ޕީޖީގެ ވަކީލުން ހާޒިރުނުވުމުން އެ މައްސަލަތައް ކްރިމިނަލް ކޯޓުން މިދިޔަ ހަފްތާ ބޭރުކޮށްލުމުން އެވެ.
އެގެ މައްސަލަތައް ކްރިމިނަލް ކޯޓުން ބޭރުކޮށްލިތާ މާގިނައިރެއް ނުވެ ސުޕްރީމް ކޯޓުގެ އެދުމަކަށް ކަމަށް ބުނެ ޖޭއެސްސީ އިން ވަނީ އެ ކޯޓްގެ އިސްގާޒީ އަދި ގާސިމްގެ މައްސަލަ ބެލި ބެންޗްގައި އިސްކޮށް ހުންނެވި ގާޒީ އަބްދުލްބާރީ ޔޫސުފު ޖުވަނައިލް ކޯޓަށް ބަދަލުކޮށްފަ އެވެ.