އީރާނުގެ މާލީ ދާއިރާގައި ހިންގި ފަސާދައެއްގެ ތުހުމަތަށް އެގައުމުގެ ރައީސް ހަސަން ރޫހާނީގެ ކޮށްކޯފުޅު ހުސައިން ފަރީދޫން ހައްޔަރުކޮށްފިއެވެ.
އީރާނުގެ ޖުޑިޝަރީއާ ހަވާލާދީ އަލް ޖަޒީޒާ ބުނީ ފަރީދޫން ހައްޔަރު ކުރީ އެއްވެސް އިންޓަރެސްޓަކާ ނުލައި ލޯނެއް ނެންގެވުމާއި ނުފޫޒު ބޭނުންކުރައްވައިގެން ބޭންކެެއްގެ ޑައިރެކްޓަރަކަށް ވަކި މީހަކު ހަމަޖެއްސެވި ކަމުގެ ތުހުމަތު ކަމަށެވެ. އަދި ބުނީ އޭނާގެ ނުފޫޒުން އެ ބޭންކަށް އައްޔަން ކުރި ޑައިރެކްޓަރު މާބޮޑު މުސާރައެއް ނަގާތީ އޭނާ ވަކިކުރަން ރައީސް ރޫހާނީއަށް ޖެހިވަޑައިގެންނެވި ކަމަށެވެ.
އާދީއްތަ ދުވަހު ފަރީދޫން ހައްޔަރު ކުރި އިރު އޭނާ މާލީ ކަންކަމުގައި ގާނޫނާ ހިލާފުވެވަޑައިގެންފައިވާ ކަމަށް އީިރާނުގެ ޖެނެރަކލކް އިންސްޕެކްޝަންސް އޯގަނައިޒޭޝަންގެ ވެރިޔާ ނާސިރު ސިރާޖު ތުހުމަތު ކުރެއްވިތާ އެއް އަހަރު ވެެއްޖެއެވެ.
" މިމީހާއާ ބެހޭ ގޮތުން ގިނަ ތަހުގީގުތަކެެއް ވަނީ ހިންގާފައި. އިތުރު މީހުންނާ ދެކޮޅަށް ވެސް ތަހުގީގު ހިންގި. އޭގެ ތެރެއިން ބައެެއް މީހުން މިހާރު ތިބީ ޖަލުގައި،" ޓީވީތަކުން ދުރަށް ދެއްކި ނޫސްކޮންފަރެންސެއްގައި އީރާނު ޖުޑިޝަރީގެ ޑެޕިއުޓީ ޗީފް ޣުލާމް ޙުސައިން މުހުސިނީ އީޖީ ވިދާޅުވި ކަމަށް އަލްޖަޒިރާގެ ހަބަރުގައި ވެއެވެ.
ފަރީދޫން އަކީ މިދިޔަ މޭމަހު ދެވަނަ ދައުރަކަށް އިންތިހާބުވެވަޑައިގެންނެވި ރޫހާނީގެ އެންމެ އިސް އެއް މުޝީރެވެ. އަދި އޭނާއަކީ އީރާނުގެ ނިއުކްލިއަ މައްސަލައިގައި ހުޅަނގުގެ ބާރުތަކާ އެކު އެއްބަސް ވުމަކަށް އައި މަޝްވަރާތަކުގައި އިސް ދައުރެެއް އަދާކުރެއްވި ބޭފުޅެކެވެ. މެލޭޝިއާގައި ހުންނަވާ އީރާނު ސަފީރުކަމުގެ މަގާމުވެސް އޭނާ އަދާކުރެއްވިއެވެ.