މިއަހަރުގެ ދެވަނަ ކުއާޓަރުގައި( އޭޕްރިލް މަހުން ފެށިގެން ޖޫން މަހާ ހަމައަށް) ޗައިނާގެ އިގުތިސާދަށް 6.9 ޕަސެންޓްގެ ކުރިއެރުމެއް ލިބިއްޖެއެވެ. ކުރިއެރުން އައި މިންވަރަކީ އިގުތިސާދީ ގިނަ މާހިރުން ލަފާ ކުރި ވަރަށް ވުރެ އިތުރު މިންވަރެކެވެ.
ޗައިނާއަށް މި މިންވަރުގެ އިގުތިސާދީ ކުރިއެރުން ލިބުނީ ދަރަނި ކުޑަކުރުމަށާއި ގެދޮރު އިމާރާތްކޮށް ވިއްކުމާއި ކުއްޔަށް ދިނުމުގެ ވިޔަފާރި އެކަށީގެންވާ ވަރަށް ވުރެ ބާރަށް ކުރިއަށްދާ ކަމަށް ބެލެވިގެން، މަޑު ޖައްސަައިލުމަށް ހަރުކަށި ފިޔަވަޅުތައް އަޅާފައި ވަނިކޮށެވެ. ލޯނު ދޫކުރާ ފަރާތްތަކާއި ގެދޮރު އިމާރާތް ކުރުމުގެ ދާއިރާއަށް ހަރުކަށި ގަވައިދުތައް ތައާރަފް ކުރުމުން އިގުތިސާދަށް މަޑުޖެހުމެއް އަންނާނެ ކަމަށް މާހިރުން އޭރު ލަފާކުރިއެވެ.
ނަމަވެސް އެންމެ ފަހުގެ ހިސާބުތައް ދައްކާ ގޮތުން އެގައުމަށް 6.9 ޕަސެންޓްގެ ކުރިއެރުން ލިބުނު އިރު ޗައިނާ ސަރުކާރުން އަމާޒު ހިފާފައި ވަނީ މިހިނގާ 2017 ވަނަ އަހަރު 6.5 ޕަސެންޓްގެ ކުރިއެރުމެއް ހޯދުމަށެވެ.
ގެދޮރުގެ ވިޔަފާރި މަޑު ޖައްސައިލުމަށް ޗައިނާ ސަރުކާރުން އެޅި ފިޔަވަޅާއި އެކުގައި ވެސް މިއަހަރު ދެބަޔަށް ދިޔަ އިރު އެދާއިރާއަށް ވަނީ 8.5 ޕަސެންޓްގެ ކުރިއެރުމެއް ލިބިފައެވެ. އެއީ މިދިޔަ 2016 ވަނަ އަހަރަށް ވުރެ މަތީ މިންވަރެކެވެ. - ބީބީސީ
ޗައިނާގެ ވެރިރަށް ބެއިޖިންގެ މަންޒަރެއް. އެގައުމުގެ އިގުތިސާދު މިއަހަރުގެ ދެވަނަ ކުއާޓާގައި ކުރިއަށް ދިޔައީ ލަފާކުރި ވަރަށް ވުރެ ބާރަށް. ފޮޓޯ: ބީބީސީ