ރައްޔިތުން މަޖިލީހުގެ ރައީސް އަބްދުﷲ މަސީހު މުހައްމަދުގެ އިތުބާރު ނެތް ކަމުގެ ގަރާރުގައި ސޮއި ކުރި ޕީޕީއެމް މެންބަރުން ރޭ 12:00 ގެ ކުރިން ސޮއި އަނބުރާ ގެންދިޔުމަށް އެ ޕާޓީން އެންގި ނަމަވެސް މިހާތަނަށް އެއްވެސް މެންބަރަކު ސޮއިއެއް އަނބުރާ ނުގެންދާކަން ކަށަވަރު ވެއްޖެ އެވެ.
އިދިކޮޅު ފަރާތްތަކާ ގުޅުނު މެންބަރުންނަށް ޕީޕީއެމް އިން އިއްޔެ ފޮނުވި ސިޓީގައި ބުނެފައި ވަނީ އެ ޕާޓީގެ ފިކުރާ ދެކޮޅަށް މަސައްކަތް ކުރާ މެންބަރުންތަކެއް އިސްވެ ތިބެ، އެކުލަވާލި އިތުބާރު ނެތްކަމުގެ ގަރާރުގައި ސޮއި ކުރުމަކީ ޕީޕީއެމްގެއަސާސީ ގަވާއިދުގެ 38 ވަނަ މާއްދާގެ ހ އާއި ށ ގެ އިތުރުން ޕާލިމަންޓްރީ ގްރޫޕްގެ ހިންގާ ގަވާއިދާ ހިލާފު އަމަލެއް ކަމަށެވެ. އެހެންކަމުން ޕެޓިޝަނުގައި ކުރި ސޮއި ނެގުމަށް ފަހު އެކަން ޕީޕީއެމްގެ އޮފީހަށް އެންގުމަށް ވެސް އެ ސިޓީގައި އެދިފައިވެ އެވެ.
ނަމަވެސް "އަވަސް"އަށް ކަށަވަރުވެފައިވާ ގޮތުގައި މިހާތަނަށް އެއްވެސް މެންބަރަކު ސޮއި ނަގާފަ އެއް ނުވެ އެވެ. ނަމަވެސް އެކަމާ ގުޅިގެން ސިޓީ ލިޔުއްވި ޕީޕީއެމްގެ ޑެޕިއުޓީ ސެކްރެޓަރީ ޖެނެރަލް އިގްބާލް އާދަމް އެކަމާ ބެހޭ ގޮތުން ވަކި އެއްޗެއް ވިދާޅެއް ނުވެއެވެ. އަދި ސެކެޓަރީ ޖެނަރަލް އަބްދުﷲ ހަލީލްގެ ބަހެއް ހޯދަން މަސައްކަތް ކުރި ނަމަވެސް ފޯނަކަށް ޖަބާވެއް ނުދެއްވަ އެވެ.
ޕީޕީއެމްގެ މެމްބަރުންގެ ގޮތުގައި ތިބެ ގަރާރުގައި ސޮއި ކުރީ ދަނގެތީ ދާއިރާގެ އިލްހާމް އަހުމަދާއި މައްޗަންގޮޅީ ދެކުނު ދާއިރާގެ އަބްދުﷲ ސިނާނާއި ދިއްދޫ ދާއިރާގެ އަބްދުއްލަތީފް މުހައްމަދާއި ހަނިމާދޫ ދާއިރާގެ ހުސައިން ޝަހުދީ އާއި އިހަވަންދޫ ދާއިރާގެ މުހައްމަދު އަބްދުﷲ އާއި ތިނަދޫ ދެކުނު ދާއިރާގެ މުހައްމަދު އަބްދުﷲ އާއި ތިނަދޫ އުތުރު ދާއިރާގެ ސައުދުﷲ ހިލްމީ އާއި މަހިބަދޫ ދާއިރާގެ މުހައްމަދު ތޯރިގާއި ތިމަރަފުށި ދާއިރާގެ މުހައްމަދު މުސްތަފާ އަދި ފުވައްމުލަކު އުތުރު ދާއިރާގެ އަލީ ޝާހެވެ.
އެ މެންބަރުން ވަނީ، އެބޭފުޅުންގެ ސޮއި އަނބުރާ ނުގެންނާނެ ކަމަށް މީގެ ކުރިން ތަކުރާރުކޮށް ވިދާޅުވެފަ އެވެ. އަދި ޕީޕިއެމް އިން އިއްޔެ ސިޓީ ފޮނުވުމާ އެކުވެސް ބައެއް މެންބަރުން ސޯޝަލް މީޑިއާ ތެރޭގައި ވެސް ވަނީ ސޮއި ނުނަގާނެ ކަމަށް ވިދާޅުވެފަ އެވެ.
އެ މައްސަލަ ފެންމަތިވެފައި ވަނިކޮށް ޕާޓީއިން ވަކިކުރާ މެންބަރުންނާއި ޕާޓީއިން އަމިއްލައަށް ވަކިވާ މެންބަރުންގެ ގޮނޑި ގެއްލޭނެ ކަމަށް ސުޕްރީމް ކޯޓުން ވަނީ ނިންމައިފަ އެވެ. އަދި އެ ހުކުމަށް ބާރުލިބޭ ގޮތަށް އިއްޔެ ރޭ ސުޕްރީމް ކޯޓުން ނެރުނު އަމުރެއްގައި ވަނީ ހުކުމް ކުރުމުގެ ކުރިން ހިނގާފައިވާ ކަމަކާއި އެކަމާ ގުޅިގެން އަޅާ ފިޔަވަޅުތަކަށް ހުކުމުގެ ބާރު ނުހިނގާނެ ކަމަށެވެ. އެހެން ކަމުން އެ މައްސަލައިގައި ސޮއި ކުރި މެންބަރުންގެ ގޮނޑި ނުގެއްލޭނެކަން ވަނީ ޔަގީންވެފަ އެވެ.