ކެނެޑާގެ ހުޅަނގުގައިވާ ބްރިޓިޝް ކޮލަމްބިއާ ޕްރޮވިންސްގެ ޖަންގަލިތަކުގައި ރޯވެފައިވާ އަލިފާންގަނޑުތަކުގެ ސަބަބުން 39000 މީހުން އެމީހުންގެ ގެދޮރު ދޫކޮށް ދާން ޖެހިއްޖެ އެވެ.
ދަ ގާޑިއަން ނޫހުން ބުނީ އަލިފާންގަނޑުތައް އަނދަމުންދާ ސަރަހައްދުން މީހުން ސަލާމަތްކޮށްގެން އެހެން ސަރަހައްދުތަކަށް ގެންދަން ކެނެޑާ ސިފައިންގެ ދެ މަތިންދާބޯޓަކާއި ފަސް ހެލިކޮޕްޓަރު މިހާރު ފޮނުވާފައިވާ ކަމަށެވެ.
ބްރިޓިޝް ކޮލަމްބިއާ ޕްރޮވިންސްގެ މައިރަށް ވެންކޯވާގެ އިރު އުތުރުން 217 މޭލު ދުރުގައިވާ ޖަންގަލިތަކުގައި 159 އަލިފާންގަނޑެެއް ދަނީ ކޮންޓްރޯލް ނުވެ އަނދަމުންނެވެ. އެއަލިފާންގަނޑުތަކުން އަނދައި ހުލިވެފައިވާ ސަރަހައްދުގެ ބޮޑުމިނަކީ 188000 ހެކްޓަރެވެ. އަދި އެެކަމުގެ ސަބަބުން 70.92 މިލިޔަން ޑޮލަރުގެ ގެއްލުން ވަނީ ލިބިފައެވެ.
އަލިފާންގަނޑު ނިއްވުމަށާއި މީހުން ސަލާމަތް ކުރުމަށް ކެނެޑާ ސިފައިން ފޮނުވައި ދޭން ބްރިޓިޝް ކޮލަމްބިއާ ޕްރޮވިންސްގހެ ސަރަހައްދީ ސަރުކާރުން އެދިފައިވާ އެގައުމުގެ ޕަބްލިކް ސޭފްޓީ މިނިސްޓަރު ފާގް ގުޑޭލްއާ ހަވާލާދީ ނޫހުން ބުންޏެވެ. އަލިފާންގަނޑުތައް ނިއްވުމަށް އޮސްޓްރޭލިއާއިން 50 ފަޔަ ފައިޓަރުން ފޮނުވާނެ ކަމަށް އެގައުމުން ވަނީ ބުނެފައެވެ.
ކެނެޑާގެ ޖަންގަލީގައި ރޯވެ އަނދަމުންދާ އަލިފާންގަނޑަކާ ކައިރީގައިވާ ގެއެއް. އެެއަލިފާންގަނޑުތަކާ ހެދި 39000 މީހުން މިހާރު ވަނީ ގެދޮރު ދޫކޮށް ގޮސްފައި. ފޮޓޯ: ދަ ގާޑިއަން