ކޮރަޕްޝަންގެ ތުހުމަތުގައި ސްޕެއިންގެ ފުޓްބޯޅަ އެސޯސިއޭޝަންގެ ރައީސް އެންހެލް މާރިއާ ވިލާ އާއި އޭނާގެ ދަރިފުޅު ގޯކާ ވިލާ ހައްޔަރު ކޮށްފި އެވެ.
ސްޕެއިންގެ ހައި ކޯޓް ފަނޑިޔާރު ސެންތިއާގޯ ޕެޑްރަޒް ވަނީ ކޮރަޕްޝަންގެ ތުހުމަތުގައި ވިލާ އާއި ދަރިކަލުން ގޯކާ ހައްޔަރު ކުރަން އަމުރު ނެރުމުން، ސްޕެއިންގެ ފުލުހުން ވަނީ އެ ދެ މީހުން ހައްޔަރު ކޮށްފަ އެވެ.
ވިލާ އަކީ ވެތުވެދިޔަ 29 އަހަރުގައި ސްޕެއިންގެ އެފްއޭގެ ރައީސް ކަން ކުރައްވަމުން އަންނަ ފަރާތެވެ. އަދި އޭނާ ވަނީ މީގެ ދެ މަސް ކުރިން އަލުން އަށް ވަނަ ދައުރަކަށް އިންތިހާބު ވެވަޑައިގެންފަ އެވެ. އޮޕަރޭޝަން ސޯލްގެ ނަމުގައި ވިލާ އާއި އޭނާގެ ދަރިފުޅު ސްޕެއިންގެ ފުލުހުން ހައްޔަރު ކުރީ އާ ދައުރަކަށް އިންތިހާބުވެ ވަޑައިގަތުމަށް ވިލާ ސްޕެއިންގެ އެފްއޭގެ ފަންޑުގެ ތެރެއިން ހަރަދު ކޮށްފައިވާ ކަމަށް ތުހުމަތު ކޮށެވެ. ގޯކާ ހައްޔަރު ކޮށްފައި ވަނީ އެކަމުގައި އޭނާގެ އެކައުންޓްތަކުން ފައިސާގެ މުއާމަލާތްތައް ހިންގާފައިވަ ކަމުގެ ތުހުމަތުގަ އެވެ.
ވިލާ ހައްޔަރު ކޮށްފައި މިވަނީ، އެފްއޭގެ އާންމު ކޮންގްރެސްއެއް ބައްވަން ދެ ދުވަސް ވެފައި ވަނިކޮށެވެ. އެ ކޮންގްރެސްގައި އަންނަ ސީޒަންގައި ސްޕެނިޝް ލީގް ޝެޑިއުލް އިއުލާން ކުރާ ގޮތަށް ވަނި ހަމަޖެހިފަ އެވެ.