ރަސްމީ ކޮށް ކުޅުން ހުއްޓާލިކަން އިއުލްނާ ކުރުމަށްފަހު، އޭއެސް ރޯމާގެ ޑިރެކްޓަރަކަށް ވުމަށް ތައްޔާރަށް ހުރި ކަމަށް އެ ކުލަބުގެ ފުޓްބޯޅަ ލެޖެންޑް ފްރެންޗިސްކޯ ޓޮޓީ ބުނެފި އެވެ.
ރޯމާ ނޫން ކުލަބަކަށް މުޅި ކެރިއަރުގައި ވެސް ކުޅެފައި ނުވާ، ޓޮޓީ ރޯމާއަށް އެންމެ ފަހުން ކުޅުނީ މި އަހަރު މެއި މަހު 28 ވަަނަ ދުވަހު އެވެ. އެއީ ރޯމާއަށް އޭނާ ކުޅުނު 786 ވަނަ މެޗެވެ. އޭނަ ވަނީ ގާތްގަނޑަކަށް 24 އަހަރު ވަންދެން ސީނިއާ ޓީމަށް އަށް ކުޅެފަ އެވެ. އޭނާ އެންމެ ފުރަތަމަ ރޯމާއާ ގުޅުނީ 1989 ވަނަ އަހަރު އޭނާގެ އުމުރުން 13 އަހަރު ގަ އެވެ. ސީނިއާ ޓީމަށް ކުޅެން ފެށީ 1992 ވަނަ އަހަރު އެވެ.
"އަހަރެން ކުޅުމުގެ ކެރިއާއަށް ފަހު އާ މަސައްކަތައް އަހަރެން ތައްޔާރު،" ރޯމާ ޓީވީގެ އިންޓަވިއުގައި ވާހަކަ ދައްކަމުން ޓޮޓީ 40، ބުންޏެވެ. "އަހަރެން މިހާރު ކުރިމަތި މިލަނީ، ކުޅުމުގެ ކެރިއާއަށް އެއްވަރުގެ ދާއިރާއަކަށް، އަހަރެން އުންމީދު ކުރަނީ ދަނޑުމަތީގައި ކުރި މަސައްކަތެކޭ އެއްގޮތަށް އާ މަސައްކަތުގައި ވެސް ޕާފޯމް ކުރެވޭނެ ކަމަށް."
ރޯމާއަށް 307 ލަނޑު ޖަހައިދީގެން އެ ޓީމުގެ އެންމެ ގިނަ ލަނޑު ޖެހި ކުޅުންތެރިޔާގެ ރެކޯޑް އޮތް ކުޅުންތެރިޔާ ބުނީ، ރޯމާގައި ކުޅުނު ފަހު މެޗު ނިމެން އޭނާ ބޭނުން ނުވި ކަމަށެވެ.
ތޮޓީ މަސައްކަތް ކުރާނީ ރޯމާގެ ޑިރެކްޓަރެއްގެ ގޮތުގަ އެވެ. "އަހަރެން މިހާރު މަސައްކަތް ކުރާނީ ރޯމާގެ ޔޫތު ޓީމާއި ކުލަބު ރައީސް އަށް އަހަރެންގެ އެހީ ފޯރު ކޮށްދޭން، އަހަރެންގެ އަސްލު ރޯލަކީ ކޮބައިތޯ ދެނެގަންނަން ހަ މަސް ނުވަތަ އެއް އެއް އަހަރު ނުވަތަ ދެ އަހަރު ހޭދަ ވާނެ، ނޫނީ އަހަންނަކަށް ނޭނގެ އެކަމަށް ކިހާ ދުވަހެއް ވާނެ ކަމެއްވެސް."