މީގެ 75 އަހަރު ކުރިން ގެއްލިފައިވާ ދެމަފިރިއެއްގެ ހަށިގަނޑު ހަލާކު ނުވެ، ތާޒާކޮށް އޮއްވައި ސްވިޒަލޭންޑްގެ ފަރުބަދަމަތީ ހިސާބަކުން ފެނިއްފައިވާ ކަމަށް އެގައުމުގެ ނޫސްތަކުން އަންގާރަ ދުވަހު ބުނެފިއެވެ.
މާސެލިން އާއި ފްރެސައިން ޑިއުމޫލިން ގެއްލުނީ 1942 ވަނަ އަހަރުގެ އޮގަސްޓްމަހުއެވެ. ނަމަވެސް އެ ދެމަފިރިން ފެންނާނެކަމުހެ އުއްމީދު އެމީހުންގެ ހަތް ދަރިން ގެއްލުވައެއް ނުލައެވެ. ގެއްލުނު އިރު އެކަކުގެ އުމުރަކީ 40 އަހަރެވެ. އަނެކަކުގެ އުމުރަކީ 37 އަހަރެވެ. އެމީހުން ގެއްލުނީ ސްވިޒަލޭންޑްގެ ޗާންޑޮލިން ނަމަކަށް ކިޔާ އަވަށުގެ އުސް ހިސާބެއްގައިވާ ވިނަ ބިމެއްގައި ތިބި އެމީހުންގެ ގެރިތަކުން ކިރު ފެލުމަށް ގޮސް އުޅެނިކޮށެވެ. އެމީހުން އެނބުރި ނައުމުން އެމީހުންގެ ކުދިން ގެންދިޔައީ އާއިލާގެ އެކި މެމްބަރުންގެ ގެތަކަށެވެ.
އުމުރުން މިހާރު 79 އަހަރު ވެފައިވާ މާސެލިން ޔޫޑްރީ ޑިމޫލިން އަކީ އެމީހުންގެ އެންމެ ހަގު އަންހެން ދަރިއެވެ. ސްވިޒަލޭންޑްގެ ލި މާޓީން ނޫހަށް ދިން އިންޓަވިއުއެއްގައި އޭނާ ބުނެފަައި ވަނީ އުމުރު ހޭދަ ކުރީ މަންމައާ ބައްޕަ ފެންނާނެ ކަމުގެ އުއްމީދުގައި ކަމަށެވެ.
"އަހަރެމެން އުއްމީދުކުރީ އެމީހުންނަށް ޓަކައި ބާއްވަން ޖެހޭ ޖަނާޒާ ކޮންމެވެސް ދުވަހަކުން ބޭއްވޭނެ ކަމަށް،" ލިމާޓިން އަށް ދިން އިންޓަވިއުގައި ޔުޑްރީ ބުނިކަމަށް ސްކައި ނިއުސްގެ ހަބަރުގައި ވެއެވެ.
ސްވިޒަލޭންޑްގެ ވަލައިސް ކޭންޓަންގެ ފުލުހުން ބުނީ ކޮން ބައެއްކަން އަންގައިދޭ ލިޔެކިއުންތަކާއެކު ދެ ހަށިގަނޑު ފެނުނީ ސާންފްލޫރަން ނަމަކަށް ކިޔާ ގަނޑުފެނުގެ ސަރަހައްދުގައިވާ ސްކީ ކްރާ ތަނެއްގެ ކައިރިން ކަމަށެވެ. ދެހަށިގަނޑު ފެނުނީ އެތަނުގައި މަސައްކަތްކުރާ މީހަކަށެވެ. ހަށިގަނޑުތައް ފެނުނު ސަރަހައްދުގެ އުސްމިނަކީ ކަނޑުގެ ސަތަހައިން ފެށިގެން 8600 ފޫޓެވެ.
އެދެމީހުންނަކީ މާސެލިން އާއި ފްރެސައިން ޑިއުމޫލިން ކަން ރަސްމީކޮށް ކަށަވަރު ކުރުމަށް ޓަކައި ޑީއެންއޭ ޓެސްޓް ހަދާނެ ކަަމަށް ފުލުހުން ވަނީ ބުނެފައެވެ.
ދެހަށިގަނޑު ފެނުނު އިރު އޮތީ ވަރަށް ކައިރިކައިރިގައި ކަމަށާއި އެމީހުން ގެންގުޅުނު ތަކެތިވެސް ސަލާމާތުން ހުރި ކަމަށް މަންޒަރު ދުށް މީހުންނާ ހަވާލާދީ ނޫހުން ބުންޏެވެ.
"އެއީ ދެވަނަ ބޮޑުހަނގުރާމައިގެ ދުވަސްވަރުގެ ހެދުން އަޅައިގެން ތިބި އަންހެނަކާ ފިރިހެނެއް. އެމީހުންގެ ހަށިގަނޑު އޮތީ ވަރަށް ރަނގަޅަށް ޕްރިޒާވް ވެފައި. އެމީހުން ގެންގުޅުނު ތަކެތިވެސް ހުރީ ސަލާމަތުން،" ކޭބަލް ކާރާއި ސްކީ ލިފްޓްގެ ހިދުމަތްދޭ ކުންފުންޏެއްގެ ޑައިރެކްޓަރެއްގެ ގޮތުގައި މަސައްކަތްކުރާ ބާންހާޑް ޝާނެން ނޫހަށް ބުނެފައި ވެއެވެ.
ޔޫޑްރީ ޑިމޫލިން ބުނެފައި ވަނީ އޭނާގެ މަންމަ އެހާ އުސް ސަރަހައްދަކަށް އެރުމަކީ އާދަޔާ ހިލާފު ކަމެއް ކަމަށެވެ.
"މަންމަ އަބަދުވެސް އިންނާނީ މާބަނޑުވެފައި. ގަނޑުފެނުގެ އުދަނގޫ މާހައުލަކުން ނުއެއް އެރޭނެ،" އޭނާ ބުނެފައި ވެއެވެ.
ޔުޑްރީ ބުނެފަައި ވަނީ ޖަނާޒާގައި އޭނާ ކަޅު ހެދުން ނުލާނެ ކަމަށެވެ.
"ހުދު ހެދުން މާރަނގަޅުވާނެކަމަށް އަހަރެންނަށް ފެންނަނީ. އެއިން ރަމްޒުކޮށްދެނީ އުއްމީދު. އަހަރެން ދުވަހަކުވެސް އުއްމީދެއް ގެއްލުވައެއް ނުލަންް،" އޭނާ ބުނެގައި ވެއެވެ.
ޔޫޑްރީ ޑިމޫލިންގެ މައިންބަފަައިންގެ ހަށިގަނޑު ފެނުނީ ގަނޑުފެންތައް ވިރުމުގެ ސަބަބުންނެވެ.
75 އަހަރު ކުރިން ގެއްލުނު ސްޒިޒަލޭންޑްގެ ދެމަފިރިއެއްގެ ހަަށިގަނޑު. ފޮޓޯ: ދަ ޓެލެގްރާފް