މިދިޔަ މޭ މަހު ދިވެހި ސަރުކާރާއި ޔޫރަޕިއަން ޔޫނިއަން (އީޔޫ) ގެ ގައުމުތަކާ ދެމެދު ބޭއްވި ސިޔާސަތުތަކާބެހޭ މަޝްވަރާ ބައްދަލުވުމުގައި މިއަދު ގޮނޑި ގެއްލުނު މެންބަރުންނަކީ ޕީޕީއެމްގެ މެންބަރުންނެއް ނޫން ކަން އެޓާނީ ޖެނަރަލް މުހައްމަދު އަނިލް ވިދާޅުވެފައިވާ ކަމަށް އިނގިރޭސިވިލާތުގެ ފަރާތުން ރާއްޖެއާ ސްރީލަންކާއަށް ކަނޑައަޅާފައި ހުންނަ ސަފީރު ޖޭމްސް ޑައުރިސް ވިދާޅުވެއްޖެ އެވެ.
ޖޭމްސް މިހެން ވިދާޅުވީ، ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހިމް (ވައްޑޭ) އާއި ވިލިނގިލީ ދާއިރާގެ މެމްބަރު ސައުދު ހުސައިނާއި މަޑުއްވަރީ ދާއިރާގެ މެމްބަރު މުހައްމަތު އަމީތު އަދި ދިއްދޫ ދާއިރާގެ މެމްބަރު އަބްދުއްލަތީފް މުހައްމަދު ރައްޔިތުން މަޖިލީހުގައި ތަމްސީލު ކުރާ ގޮނޑީ ގެއްލުނު ކަމަށާއި ބައި އިލެކްޝަން ބާއްވަން ނިންމާފައިވާ ކަމަށް އިލެކްޝަން ކޮމިޝަން (އީސީ) އިން އިއުލާން ކުރުމާ ގުޅިގެނެވެ.
"މޯލްޑިވްސް އީޔޫ ޕޮލިސީ ޑައިލޮގް" ގެ ނަމުގައި ބަނޑޮސް އައިލެންޑް ރިސޯޓުގައި ކުރިޔަށް ދިޔަ އެ ބައްދަލުވުމުގައި އީޔޫގެ ފަރާތުން ނުވަ ގައުމެއްގެ ސަފީރުން ބައިވެރިވެ އެވެ. އަދި ރާއްޖެ ފަރާތުން ފޮރިން މިނިސްޓަރު ޑރ. މުހައްމަދު އާޒިމްއާ އަނިލްއާއި ސަރުކާރުގެ އިސް މަގާމުތަކުގެ ބޭފުޅުން ބައިވެރިވެވަޑައިގަތެވެ.
އެ ދުވަސްވަރު ވައްޑޭއާ އަމީތުއާ އަދި ސައުދު ޕީޕީއެމް އިން ވަކިކޮށް އެކަން ވަނީ އިއުލާން ކޮށްފަ އެވެ. ނަމަވެސް އެ މެންބަރުން ގޮނޑި ގެއްލުނު ކަމަށް އީސީއިން ކަނޑައެޅީ ސުޕްރީމް ކޯޓުން މި މަހުގެ 13 ވަނަ ދުވަހު ކުރި ހުކުމުގައި ޕާޓީ ބަދަލުކޮށްފި ނަމަ ނުވަތަ ވަކިވެއްޖެ ނަމަ ނޫނީ ވަކިކޮށްފި ނަމަ މެންބަރުންގެ ގޮނޑި ގެއްލޭނެ ކަމަށް ކުރި ހުކުމަށް ރިއާޔަތްކޮށެވެ. ނަމަވެސް އެ ހުކުމް އިތުރަށް ތަރުޖަމާކޮށް މިދިޔަ އާދީއްތަ ދުވަހު އެ ކޯޓުން ނެރުނު އަމުރާ ގުޅިގެން ޕީޕީއެމް އިން ވަކިވާން އެދުން މެންބަރުންގެ ގޮނޑި ގެއްލޭނެ ކަމާ މެދު އޮތީ ވަރަށް ބޮޑަށް ސުވާލު އުފެދިފަ އެވެ.