މަސްޖިދުލް އަޤުޞާގެ ދޮރުކޮޅުތަކުގައި މެޓަލް ޑިޓެކްޓަރު ހަރުކޮށް، ވަކި އުމުރެއްގެ މީހުންނަށް ނޫނީ އެ މިސްކިތަށް ނުވަދެވޭ ގޮތް ހަދައިގެން އުޅޭތީ ގުދުސްގައި ކުރަމުން ދިޔަ މުޒާހަރާތައް ރޫޅާލުމުގައި އިޒްރޭލު ފުލުހުން އަނެއްކާވެސް ފަލަސްތީނު މީހަކު މަރާލައިފިއެވެ.
ޕެލަސްޓީނިއަން އިންްފޮމޭޝަން ސެންޓަރުން ބުނީ ޔޫސުފް ކަޝޫރު ނަމަކަށް ކިޔާ އުމުރުން 24 އަހަރުގެ ޒުވާނާ މަރުވީ ގުދުސްގެ އަލް އައިޒަރިޔާ ނަމަކަށް ކިޔާ އަވަށުގައި މުޒާހަރާ ކުރަމުންް ދިޔަ މީހުންނަށް އިޒްރޭލުން ދިން ހަމަލާއެއްގައި މެޔަށް ލިބުނު ގެއްލުމެއްގެ ސަބަބުން ކަމަށެވެ.
މަސްޖިދުލް އަޤުޞާގެ ބާބުލް އަސްބާތު ނަމަކަށް ކިޔާ ދޮރުކޮޅުގެ ކައިރީގައި އިޒްރޭލު ފުލުހުންނާ ފަލަސްތީނު މީހުންނާ ދެމެދު އިއްޔެވެސް ވަރުގަދަ ކުރިމަތިލުންތަކެއް ހިނގިއެވެ. ކުރިމަތިލުން ހިނގީ އެތަނުގައި ނަމާދު ކުރަން ތިބި މީހުންނަށް އިޒްރޭލު ފުލުހުން ހަމަލާ ދިނުމުންނެވެ. އިޒްރޭލު ފުލުހުން ނަމާދު ކުރަން ތިބި މީހުންގެ ތެރެއަށް ސައުންޑް ބޮމާއި ނުބައިވަސްދުވާ ފެން އުކިއެވެ.
ފަލަސްތީނުގެ ރެޑްކްރެސެންޓް ސޮސައިޓީން ބުނީ ރޭ ގުދުސްގައި ޖުމްލަ 67 މީހަކަށް ފަރުވާދޭން ޖެހުނު ކަމަށެވެ.
ގުދުސްގައި މިހާރު ހިނގަމުންދާ ހަމަނުޖެހުންތައް ފެށުނީ މިހިނގާ ޖުލައިމަހުގެ 14 ވީ ހުކުރު ދުވަހު މަސްޖިދުލް އަޤުޞާގައި ހުކުރު ނަމާދު ކުރިޔަ ނުދީ އިޒްރޭލުން އެ މިސްކިތް ބަންދުކުރުމުންނެވެ. އިޒްރޭލުން އެ ފިޔަވަޅު އެޅީ މިސްކިތުގެ ކައިރީގައި އިޒްރޭލުގެ ދެ ފުލުހަކަށް ބަޔަކު ބަޑިން ހަމަލާދީ މަރައިލުމުންނެވެ. ހަމަލާ ދިނީ އިޒްރޭލުގެ ރަށްވެހިކަން އޮންނަ އަރަބީންގެ ދެމީހެކެވެ. އިޒްރޭލު ފުލުހުން ދިން ހަމަލާގައި އެދެމީހުން މަރުވިއެވެ.
މަސްޖިދުލް އަޤުޞާ ހުންނަ އިރުމަތީ ގުދުސް އިޒްރޭލުން ހިފީ 1967 ވަނަަ އަހަރު އަރަބިންނާ ދެކޮޅަށް ކުރި ހަނގުރާމައިގައެވެ.
އިޒްރޭލަކީ އިނގިރޭސިން ފަލަސްތީނު އަޅުވެތިކޮށް، އެތަނުގައި ޔަހޫދީން އާބާދުކޮށް، ޔަހޫދީންނަށް 1948 ވަނަ އަހަރު އުފައްދައިދީގެން އުޅޭ ދައުލަތެކެވެ. އެދައުލަތް އުފެއްދީ ފަލަސްތީނުގެ އެތައްހާސް މީހުންނެެއް މަރައި ދެން ތިބި މީހުން ގެދޮރުން ބޭރުކޮށްގެންނެވެ.
ގުދުސްގައި އިޒްރޭލު ފުލުހުން ދިން ހަމަލާއެއްގައި ޒަހަމްވި ފަލަސްތީނު މީހަކަށް ފަރުވާދެނީ. އިޒްރޭލުން ދިން ހަމަލާއެއްގައި އިއްޔެގައި އެކަކު މަރުވި. ފޮޓޯ: ޕެލަސްޓީނިއަން އިންފޮމޭޝަން ސެންޓަރު