ގާނޫނު އަސާސީގައި ބުނާ ގޮތަށް ވެރިކަން ނުކުރެވޭނަމަ އިސްތިއުފާ ދެއްވާފައި ވަޑައިގެންނެވުމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެ އެވެ. ގާސިމް މިހެން ވިދާޅުވެފައިވަނީ ރައީސް އަބުދުﷲ ޔާމީން އަބުދުލް ގައްޔޫމް ގާނޫނު އަސާސީ އޮތްގޮތުން ވެރިކަން ކުރެވުމަށް ދަތިތަކާއި ކުރިމަތިވާ ކަމަށް ވިދާޅުވެފައިވާތީ އެވެ.
ކުނޫޒުގައި މިރޭ ބޭއްވި ޖަލްސާގައި ވާހަކަ ދައްކަވަމުން ގާސިމް ވިދާޅުވީ ގައުމެއްގެ އަމާން ކަމާއި ހަމަޖެހުން ބިނާ ވެފައިވަނީ އެތަނެއްގެ އޮންނަ ދުސްތޫރަކަށް ބޯލަނބައި ކިޔަމަން ވެގެން ކަމަށާއި ރައީސް އަބުދުﷲ ޔާމީން އަށް ގާނޫނީ ހަމަތަކުގެ މަތީން ވެރިކަން ކުރެވެން ނެތް ނަމަ އިސްތިއުފާ ދެއްވުމަށެވެ. އަދި ގަނޫނު އަސާސީ ވަކި ގޮތަކަށް ބަދަލު ކޮށްގެން ގައުމު ހިންގަން ފުރުސަތު ނުދޭނެ ކަމަށާއި ގާނޫނަށް ބަދަލު ގެންނެވޭނީ މަޖިލިސް މެދުވެރިކޮށް ކަމަށާއި އެކަން ކުރެއްވުމަށް މަޖިލީހަށް ހުށަހެޅުއްވުމަށް ގާސިމް ވިދާޅުވި އެވެ.
ގާސިމް ވިދާޅުވީ ގާނޫނު އަސާސީން ރައްޔިތުންނަށް ލިބިދޭ އަސާސީ ހައްގުތަކާއި މިނިވަންކަން ހޯދައި ދިނުމުގައި ތިންބާރު ވަކިވެފައިވާ ނިޒާމެއް ގާއިމްވެފައި އޮންނަ ޖެހޭ ކަމަށާއި މިނިވަން މުއައްސަސާތަކުން ވެސް ގާނޫނު އަސާސީގައި ބަޔާންކޮށްފައިވާ ގޮތަށް ޒިންމާތައް އަދާކުރަން ޖެހޭ ކަމަށެވެ.
"ގައުމެއްގެ އަމާން ކަމާއި ހަމަޖެހުން ބިނާ ވެފައިވަނީ އެތަނެއްގެ އޮންނަ ދުސްތޫރީއަށް ބޯ ލަނބައި ކިޔަމަން ވެގެން. ވެރިކަމުގައި ހުންނަވާ ބޭފުޅަކު ގާނޫނު އަސާސީ އޮތްގޮތުން ވެރިކަން ކުރެވެން ނެއް ކަމަށް ވިދާޅުވާނަމަ އިސްތިއުފާ ދެއްވާފައި ވަޑައިގަންނަވާ، ބޭނުން ފުޅުވާގޮތަކަށް ގާނޫނު ބަދަލެއް ނުކުރެވޭނެ، އެކަން ނިންމާނީ ރައްޔިތުން މަޖިލީހުން، މީގެ ކުރިންވެސް ކުރީ އެގޮތަށް މިހާރުވެސް ގާނޫނު ބަދަލުކުރަން ބޭނުންފުޅު ނަމަ ރައްޔިތުން މަޖިލީހަށް ހުށަހަޅައިގެން ކުރުމަށް ގޮވާލަން،" ގާސިމް ވިދާޅުވި އެވެ.
ގާސިމް އިތުރަށް ވިދާޅުވީ ޖުމްހޫރީ ޕާޓީން، ރައީސް ޔާމީންގެ ކޯލިޝަނާއި ވަކިވުމުން، އެ ޕާޓީގެ މެންބަރުން ޕީޕީއެމާ ގުޅުނު އިރު އެޓާނީ ޖެނެރަލް އަށް ދުސްތޫރީ މައްސަލަ ނުފެނި މިއަދު އެ މައްސަލަ ފެނުމަކީ ހިތާމަ ކުރާ ކަމެއް ކަމަށެވެ. އަދި ގަނޫނު އަސާސީއާއި ސުޕްރީމް ކޯޓުން ނެރެފައިވާ އަމުރުން މެންބަރުން ވަކި ނުކުރެވޭނެ ކަމަށް ވަރަށް ރަނގަޅަށް ސާފު ވެގެންދާނެ ކަމަށް ގާސިމް ވިދާޅުވި އެވެ.
ގާސިމް އިތުރަށް ވިދާޅުވީ ގޮނޑި ގެއްލުނު ކަމަށް ނިންމި ނިންމުމުގައި ފަހު ބަސް ބުނުމުގެ ބާރު އޮތީ ސުޕްރީމް ކޯޓަށް ކަމަށާއި އެ މައްސަލަ ލަސް ނުކުރައްވައި އަވަހަށް ނިންމާދިނުމަށެވެ. އަދި އެ މައްސަލަ އަވަހަށް ބަލަލއި ރަނގަޅު ނިންމުމެއް ނިންމަވނެ ކަމުގެ ޔަގީން ކަން އެބައޮތް ކަމަށް ގާސިމް ވިދާޅުވި އެވެ.
ދިއްގަރު ދާއިރާގެ މެންބަރު ފާރިސް މައުމޫން ހައްޔަރުކޮށް ބަންދު ކޮށްފައިވަނީ ގާނޫނާ ހިލާފަށް ކަމަށާއި އޭނާ ހައްޔަރު ކޮށްފައިވަނީ ތަހުގީގު ކޮށް ނުނިމޭ މައްސަލައެއްގައި ކަމަށެވެ. އަދި ގޮނޑި ގެއްލުނު ހަތަރު މެންބަރުންގެ މައްސަލަ ސުޕްރީމް ކޯޓުން ބަލައިގެންފައިވާއިރު އެބޭފުޅުން ޖަލަށް ލުމުގެ ހައްގެއް ނޯންނާނެ ކަމަށާއި އެބޭފުޅުން ވީ އެންމެ އަވަހަކަށް ދޫކޮށްލަން ޖެހޭ ކަމަށް ގާސިމް ވިދާޅުވި އެވެ.
"ގޮނޑި ގެއްލޭ މައްސަލަ ސުޕްރީމް ކޯޓަށް ބަލައިގަތުމުން އޭގެން އިނގެނީ އެ މައްސަލައަށް އަދި ވަކި ގޮތެއް ނިންމަންދެއް މެންބަރުންގެ ގޮނޑި ނުގެއްލޭކަން، އެހެން ކަމުން އެ މެންބަރުން މަޖިލީހުގެ އިދާރާއަށް ވަން ކަމުގެ ތުހުމަތުގައި ޖަލަށް ލުމުގެ ހައްގެއް ނޯންނާނެ. ސުޕްރީމް ކޯޓުން ވަކި ގޮތެއް ނިންމަންދެން ހައްޔަރެއް ނުކުރެވޭނެ، ވީ އެންމެ އަވަހަށް އެ ބޭފުޅުން ދޫކޮށްލުމަށް ގޮވާލަން،" ގާސިމް ވިދާޅުވި އެވެ. "ގައިރު ގާނޫނީ އަމަލުތަކަށް ކިޔަމަން ނުވުމަށް ފުލުހުންނާއި ސިފައިންނަށް ގޮވާލަން، ގާނޫނު އަސާސީގައި ބަޔާން ކޮށްފައިވާ ގޮތުގެ މަތިން އަމަލު ކުރުމަށް ގޮވާލަން"