ފުލުހުން ހައްޔަރުކޮށްފައި ހުރި ރައްޔިތުން މަޖިލީހުގެ ދިއްގަރު ދާއިރާގެ މެންބަރު ފާރިސް މައުމޫން ޕެޓިޝަން ކޮމެޓީގައި ބައިވެރިވެވޭ ގޮތަށް ކޮމެޓީ ބާއްވައިދިނުމަށް އެދި އިދިކޮޅު ބައެއް މެންބަރުން އަމީން އާންމަށް ސިޓީއެއް ފޮނުވައިފި އެވެ.
ހެންވޭރު އުތުރު ދާއިރާގެ މެންބަރު އަބުދުﷲ ޝާހިދާއި ގަލޮޅު ދެކުނު ދާއިރާގެ މެންބަރު އަހުމަދު މަހުލޫފުގެ އިތުރުން ހެންވޭރު ދެކުނު ދާއިރާގެ މެންބަރު މުހައްމަދު އަބުދުލް ކަރީމް ސޮއި ކުރައްވާ ރައްޔިތުން މަޖިލީހުގެ އަމީން އާންމު އަހުމަދު މުހައްމަދަށް ފޮނުއްވި ސިޓީގައި ބުނެފައި ވަނީ، މިއަދުގެ ޕެޓިޝަން ކޮމެޓީގައި ނިންމެވި ގޮތަށް މަޖިލީހުގެ 123 ވަނަ މާއްދާގެ ދަށުން ކޮމެޓީގައި ފާރިސް ބައިވެރިވެވޭގޮތަށް ބާއްވާ ދެއްވުމަށެވެ.
މިއަދު ބޭއްވި ޕެޓިޝަން ކޮމެޓީގައި ފާރިސް ހިމެނިވަޑައިގަންނަވާތީ އެ މެންބަރު ހާޒިރުކޮށްގެން ކޮމިޓީ ބައްދަލުވުން ކުރިޔަށް ގެންދިޔުމަށް އަބްދުﷲ ޝާހިދު ހުށަހެޅުއްވި ހުށަހެޅުމަށް ތާއީދު ލިބުނެވެ. އަދި އެ ހުށަހެޅުމަށް ކޮމިޓީގައި ހާޒިރުވެ ތިބި އެއްވެސް މެންބަރަކު ދެކޮޅު ނުހައްދަވާތީ ފާރިސް ހާޒިރު ކުރުމަށް ފަހުގައި ނޫނީ ޕެޓިޝަން ކޮމިޓީ ކުރިއަށް ނުގެންދިޔުމަށް ނިންމި އެވެ.
ފާރިސް ހާޒިރު ކުރުމަށް ކޮމިޓީން ނިންމާފައިވާ އިރު ޝަހުސު އޮޅުވާލުމުގެ މައްސަލާގައި އޭނާގެ މައްޗައްކޮށްފައިވާ ދަައުވާގެ ޝަރިއްޔަތެއް މިއަދު ކޯޓްގައި ކުރިއަށް އެބަދެ އެވެ. ފާރިސް ހައްޔަރު ކުރީ އޭނާ މެންބަރުންނަށް ރިޝްވަތު ދެއްވި ކަމަށް ބުނާ މައްސަލައިގެ ތަހުގީގަށެވެ. އެ މައްސަލައިގެ ތަހުގީގު ނިންމައި ޝަރީއަތް ނިމެންދެން ފާރިސް ބަންދުގައި ބަހައްޓަން ކްރިމިނަލް ކޯޓުން ވަނީ އަމުރުކޮށްފަ އެވެ.