ޕްރޮސިކިއުޓާ ޖެނަރަލް އައިޝަތު ބިޝާމް ޒިންމާ އަދާކުރައްވަމުން ނުދާ ކަމަށް ވިދާޅުވެ، ގާނޫނީ ވަކީލް މައުމޫން ހަމީދު އެކަމަނާއަށް ވަރަށް ބޮޑަށް ފާޑުވިދާޅުވެއްޖެ އެވެ.
ދިއްގަރު ދާއިރާގެ މެންބަރު އަހުމަދު ފާރިސް މައުމޫންގެ ޝަރީއަތާ ގުޅޭ ގޮތުން މިއަދު ހ. ތެމާގައި ބޭއްވި ނޫސްވެރިންގެ ބައްދަލުވުމުގައި މައުމޫން ހަމީދު ވިދާޅުވީ، ޕީޖީގެ ހަމައެކަނި މަސްއޫލިއްޔަތަކީ ދައުލަތުގެ ފާރާތުން ޖިނާއީ ދައުވާ އުފުލުން ނޫން ކަމަށާއި އެކަން އެކަމަނާއަށް ވެސް ވަރަށް ރަނގަޅަށް އެނގިލައްވާނެ ކަމަށެވެ. ޕީޖީގެ އިތުރު މަސްއޫލިއްޔަތެއް ވެސް ވާ ކަމަށާއި އެއީ އަސާސީ ހައްގުތައް ނަގަހައްޓައި ދިފާއުކުރުން ކަމަށެވެ.
"އަސާސީ ހައްގުތައް ނެގެހެއްޓުމަކީ ކޮބައިތޯ؟ އަސާސީ ހައްގުތައް ނެގެހެއްޓުމަކީ އަސާސީ ހައްގުތައް ނިގުޅައިގަނެގެންދާއިރު ލޯމަރައިގެން ހުރުމެއް ނޫން، ތިމަންނައަކަށް ނޭނގެއޭ ތިމަންއަކާ ބެހޭ ކަމެއް ނޫނޭ ވިދާޅުވެ ހުންނެވުމެއް ނޫން، އެއީ އެކަމެއް ހިނގާކަމުގެ އަޑު އެއްވެސް ދިމާލަކުން އެއްވެސް ގޮތަކަށް ހަބަރު ލިބިވަޑައިގެންފިނަމަ އެކަމަށް އަވަސްވެގަނެ ވީއެންމެ އަވަހަކަށް އެއަށް ފިޔަވަޅު އެޅުވުން،" މީގެކުރިން ޕީޖީގެ މަގާމަށް ޝައުގުވެރިކަން ފާޅުކުރެއްވި މައުމޫން ވިދާޅުވި އެވެ.
މައުމޫން ވިދާޅުވީ، ކުރީގެ ޕީޖީ އަހުމަދު މުއިއްޒު ވަނީ ހައްގުތައް ނެގެހެއްޓުމަށް ފިޔަވަޅުތަކެއް އަޅުއްވާފަ ކަމަށެވެ. އެކަމުގެ މިސާލެއް ވެސް މައުމޫން ދެއްކެވި އެވެ. އެގޮތުން ފަނޑިޔާރެއް ގާނޫނީ އިމުގެ ބޭރުން ނިޒާމުން ގެއްލުވާލީމަ އޭރުގެ ޕީޖީ ފިޔަވަޅުތަކެއް އެޅުއްވި ކަމަށެވެ. އަދި ސުޕްރީމް ކޯޓުގައި ސަލާމާތީ ބާރުތަކުން ތަޅު އެޅުއްވުމުން އެ މައްސަލާގައި ކޯޓަށް ވަޑައިގެން ދައުވާ އުފުލައި އެ މައްސަލަ ކާމިޔާބު ވެސް ކުރައްވާފައިވާ ކަމަށެވެ.
"އެހެންވީމަ މިއީ ހަގީގަތުގައި ހައްގުތައް ނެގެހެއްޓުމުގައި އަމަލުކުރަން ޖެހޭނެ ގޮތަކީ، އެގޮތަށް އަމަލު ނުކުރައްވާހާ ހާލު އަޅުގަނޑުމެން ކޮންމެ އަޑުއެހުމެއްގައި ވެސް ދަންނަވަމުން މިދަނީ އަސާސީ ހައްގުތައް އެބަ ގެއްލެއޭ، ދިއްގަރު ދާއިރާގެ މެންބަރު އަހުމަދު ފާރިސް މައުމޫންގެ ހައްގުތައް އެބަ ގެއްލެއޭ، ދިއްގަރު ދާއިރާގެ ރައްޔިތުންގެ ހައްގުތައް އެބަ ގެއްލެއޭ، ދައުލަތުގެ ހައްގު ވެސް އެބަ ގެއްލެއޭ، ރައްޔިތުންގެ މަޖިލީހުގެ މެންބަރެއް މިހެން ބަންދުކުރީމަ ކަސްތޮޅު މި އެޅުވެނީ ރައްޔިތުންގެ މަޖިލީހުގަ، އެހެނެއް ވެގެން ނުވާނެ، އެފަދަ ފުރުސަތެއް ދެވިގެން ނުވާނެ،" ފާރިސް މަޖިލީހަށް ހާޒިރުނުކުރާ މައްސަލައަށް އިޝާރަތް ކުރައްވާ ފާރިސްގެ ވަކީލްކަން ވެސް ކުރައްވާ މައުމޫން ވިދާޅުވި އެވެ.
ފާރިސް މަޖިލީހަށް ވަޑައިގަތުމަށް ޕީޖީއިން އެއްވެސް ހުރަހެއް އަޅާފައިނުވާނެ ކަމަށް ބުނުމުން ނުފުދޭ ކަމަށާއި ފާރިސް މަޖިލީހަށް ހާޒިރުކުރުމަށް ކަރެކްޝަންއަށް ޕީޖީއިން އަމުރުކުރަންޖެހޭނެ ކަމަށް މައުމޫން ވިދާޅުވި އެވެ. އެކަމުގައި ޕީޖީ ޒިންމާދާރުކުރުވާނެ ކަމަށް މައުމޫން ވިދާޅުވި އެވެ.
ފާރިސްގެ ހައްޔަރުކުރުމާއި ބަންދުކޮށްފައިވަނީ ވެސް ގާނޫނާ ހިލާފަށް ކަމަށާއި އެކަން ވެސް ޕީޖީއަށް އެނގިވަޑައިގަންނަވާނެ ކަމަށް މައުމޫން ވިދާޅުވި އެވެ. ފާރިސްގެ ފަރާތުން ފެށުނީންސުރެ ވެސް ކޮންމެ އަޑުއެހުމެއްގައި ވެސް އެކަން ފާހަގަކޮށްފައިވާ ކަމަށް މައުމޫން ވިދާޅުވި އެވެ. އަދި އެކަމާ ގުޅޭ ގޮތުން ޕީޖީއަށް އެކަށީގެންވާ ގާނޫނީ ޖަވާބެއް ދެވިފައިނުވާކަން ވެސް ފާހަގަކުރެއްވި އެވެ.