މީގެ 12 އަހަރު ކުރިން އޯގަސްޓް މަހުގެ 12 އަދި 13 ވަނަ ދުވަހަކީ ރާއްޖޭގެ އާ ސަފުހާއެއް ލިޔަން ފެށި ދުވަހެވެ. ހާއްސަކޮށް 13 ވަނަ ދުވަހެވެ. ކަޅު ހުކުރެވެ. އެ ދުވަހަކީ އޭރުގެ ރައީސް މައުމޫން އަބްދުލް ގައްޔޫމްގެ ވެރިކަމާ ދެކޮޅަށް ގިނަ އަދަދެއްގެ ރައްޔިތުންތަކެއް ފާޅުގައި ތެދުވި ދުވަހެވެ. މުޅި ޖުމްހޫރީ މައިދާން ފުރާލި އެވެ. އިސްލާހީ ހަރަކާތަކަށް ގޮވާލި އެވެ.
އެ ދުވަހަށްފަހު ރައީސް މައުމޫން ވެސް އިސްލާހީ އެޖެންޑާއެއް އިއުލާންކުރި އެވެ. މިހާރު މި ދެކޭ ގާނޫނު އަސާސީ އާއި އިސްލާހުވެފައިވާ ކަންކަމަކީ އެ ދުވަހު ފެށުނު ހަރަކާތުގެ ސަބަބުން ރާއްޖެ ދެކެމުންދާ ކަންކަމެވެ.
އޯގަސްޓް 12 އަދި 13 ގައި މާލޭގައި ރައްޔިތުން އެއްވީ، ޖަލުގައި ވަރަށް އަނިޔާވެރި ގޮތަކަށް އީވާން ނަސީމް މަރާލެވުނުތާ އެއް އަހަރުވެފައިވާން ކައިރިވެފައި ވަނިކޮށެވެ. އެ ދުވަހު ރައްޔިތުން ތެދުވީ ވެސް އަނިޔާއާ ދެކޮޅަށެވެ. އަނިޔާވެރިކަން ހުއްޓާލުމަށް ގޮވަމުންނެވެ. އިސްލާހީ ހަރަކާތުގައި އެ ދުވަހު ގިނަ ރައްޔިތުންތަކެއް ބައިވެރިވި އެވެ. އޭގެ ގިނަ ރައްޔިތުންނަކީ މިހާރު އެމްޑީޕީގެ މެންބަރުންނެވެ. އެ ދުވަހު އިސްކޮށް އުޅުއްވި ބޭފުޅުންނަކީ އެމްޑީޕީގެ ފައުންޑަރުންނެވެ.
އިސްލާހީ ހަރަކާތުގެ ތެރެއިން އުފެދިގެން އައި އެމްޑީޕީއަށް އެ ދުވަސްވެފައި އޮތީ ވަރަށް ހާއްސަ ދުވަހަކަށެވެ. "ކަޅު ހުކުރު"ގެ ނަމުގައި މިދިޔަ 11 އަހަރު ވެސް އެ ދުވަސް ފާހަގަކުރި އެވެ. އެމްޑީޕީ ވުޖޫދަށް އައި ފަހުން ވެސް އެ ދުވަސް ކޮންމެ އަހަރަކު ހާއްސަ ދުވަހެއްގެ ގޮތުގައި ފާހަގަކުރި އެވެ. އަނިޔާއާ ދެކޮޅު ދުވަހެއްގެ ގޮތުގަ އެވެ.
ނަމަވެސް މިއީ މުޅިން ތަފާތު އަހަރެެކެވެ. "ކަޅު ހުކުރު"ގެ ވާހަކަ ދައްކާނެ އެމްޑީޕީގެ އިސް ބޭފުޅެއް މި އަހަރު ނުވި އެވެ. ޕާޓީގެ ރައީސް މުހައްމަދު ނަޝީދު ވެސް ފުއްދާލެއްވީ ކުރެއްވި "ފިނި" ޓްވީޓަކުންނެވެ. ދުވަހާ ގުޅިގެން ހަރަކާތެއް ވެސް އެމްޑީޕީއިން ނުބާއްވަ އެވެ. މީގެ ކުރިން އެމްޑީޕީ އިން ކޮންމެ އަހަރަކު އޮގަސްޓް 12،13 އައީ ކަޅުހުކުރުގެ ގޮތުގައި ފާހަގަ ކުރަމުން އެވެ. އެމްޑީޕީއިން މިހާރު ގުޅިފައިވާ ޕާޓީތަކާއެކު ސިލްސިލާކޮށް ބާއްވަމުން އަންނަ ހަރަކާތްތައް ވެސް އެ ދުވަހަށް ކުއްލިއަކަށް ހުއްޓުނެވެ. ބާއްވަން އިއުލާންކުރި ޖަލްސާ ވެސް ފަސްކުރި އެވެ.
"ކަޅު ހުކުރު" މި އަހަރު އެމްޑީޕީއިން ފާހަގަ ނުކުރީ، އެ ޕާޓީގެ ފަޅީގައި އޭރު "އަނިޔާވެރި ވެރިއެއް" ކަމަށް ގޮވި ރައީސް މައުމޫން ހުންނެވުމުން ކަމަށް ވެދާނެ އެވެ. ރައީސް މައުމޫންއާ ހިލާފު ވާހަކައެއް ދައްކަން މިހާރު އެމްޑީޕީ އޮތީ ތައްޔާރަށް ނޫން ކަމުގައި ވެދާނެ އެވެ. ނަމަވެސް މިކަމަކީ އެ ޕާޓީގެ އާންމު މެންބަރުންގެ ހިތްތައް މުޅިން ރުހޭ ކަމެއް ނޫނެވެ.
އެ ދުވަހުގެ މަސައްކަތަކީ އެ މެންބަރުންގެ ވެސް ބުރަ މަސައްކަތަކަށްވާއިރު ދުވަހުގެ ވާހަކަ ދައްކާލާނެ ލީޑަރަކު ނުވުމަކީ އެ މެންބަރުން ކަންބޮޑުވާނެ ކަމެކެވެ. ސިޔާސީ ފިކުރު ނުވަތަ ފަޅި ބައްދަލުކުރާއިރަށް އެމީހަކު ކޮށްފައިވާ ގޯސް ކަންތައްތައް ފުހެވޭ ކަމީ މި ރާއްޖޭގެ ސިޔާސީ މައިދާނުގެ ހަގީގަތެވެ. އެކަން ވަރަށް ރަނގަޅަށް މި ދަނީ ފެންނަމުންނެވެ. އެ ދުވަހުގެ ހަރަކާތްތަކުގައި އިސްވެ ހުންނެވި ގާސިމް އިބްރާހިމް ވެސް އިދިކޮޅު އެމްޑީޕީއާއެކު ހުންނެވިއިރު އެ ދުވަހު ގާސިމަށް ލިބުނު އަނިޔާގެ ވާހަކަ ހުދު ގާސިމް ވެސް މިއަދު ނުދައްކަވަ އެވެ.
އަނިޔާއާ ދެކޮޅު ދުވަހެއްގެ ގޮތުގައި "ކަޅު ހުކުރު" އެމްޑީޕީއިން ފާހަގަކުރިއިރު މިހާރު ވެސް އެމްޑީޕީއިން ކުރަމުންދާ ކަމަކީ އެއީ އެވެ. އެމްޑީޕީއިން އިސްވެ އޮވެ މިހާރު ހިންގާ ސިޔާސީ ހަރަކާތްތަކީ މި ސަރުކާރުގެ އަނިޔާވެރިކަމާ ދެކޮޅަށް ކަމަށް ބުނެ ހިންގާ ހަރަކާތްތަކެެވެ. އެހެންކަމުން އަނިޔާއާ ދެކޮޅު ދުވަހު އަނިޔާގެ ވާހަކަ ދައްކާލަން ވެސް ނުކެރުމަކީ ވަރަށް ހައިރާން ކުރުވާ ކަމެކެވެ. މިރޭ ކުނޫޒުގައި ރައީސް މައުމޫންއާއެކު އެމްޑީޕީއިން ވެސް ބައިވެރިވާ ޖަލްސާއެއް ބާއްވާއިރު އޯގަސްޓް 12 އަދި 13 ވަނަ ދުވަހުގެ ވާހަކަ ދައްކާލަން ކެރޭނެ ލީޑަރަކު ވޭތޯ އާންމު މެންބަރުން ބަލާނެކަން ކަށަވަރެވެ.