ބ. ކެންދޫއިން ފުރައިގެން މާލެ ދަތުރު ކުރަނިކޮށް ބަނޑޮސް އައިލެންޑް ރިސޯޓުގެ އިރުމަތީ ފަރަށް އެރި ބޯޓު ފުން ކުރުމުގެ މަސައްކަތް އަދިވެސް ކުރިއަށްދާ ކަމަށް އެމްއެންޑީއެފުން ބުނެފި އެވެ.
އެމްއެންޑީއެފުން ބުނީ ރޭ ފަރަށްއެރި ބޯޓު އަދިވެސް ފުން ނުވާ ކަމަށާއި ބޯޓު ފުން ކުރުމުގެ މަސައްކަތް ބޯޓުގެ ވެރިފަރާތުން ކުރަމުންދާ ކަމަށެވެ. އަދި އިތުރު އެހީ އަށް އޮޑީގެ ވެރިފަރާތުން އެދިއްޖެ ނަމަ އެހީތެރިކަން ފޯރުކޮށްދޭނެ ކަމަށް ވެސް އެމްއެންޑީއެފުން ބުންޏެވެ.
"އާންމު އުސޫލެއްގެ ގޮތުން އޮޑި ފުން ކުރުމުގެ މަސައްކަތް ކުރިއަށް ގެންދާނީ އޮޑީގެ ވެރިފަރާތުން، އޮޑީގެ ވެރިފަރާތުން އިތުރު އެހީ އަށް އެދިއްޖެ ނަމަ އެމްއެންޑީއެފުން ފޯރުކޮށްދޭނަން" އެމްއެންޑީއެފުން ބުންޏެވެ.
ކެންދޫން ފުރައިގެން މާލެ ދަތުރުކުރި "ފްލާވާ" ބޯޓު ފަރަށް އެރިކަމުގެ މައުލޫމާތު އެމްއެންޑީއެފަށް ލިބިފައިވަނީ ރޭ 22:20 ހާއިރު އެވެ. މައުލޫމާތު ލިބުމާއެކު އެމްއެންޑީއެފް ކޯސްޓްގާޑުގެ ލޯންޗެއް ވަނީ ޑައިވަރުންގެ ޓީމަކާއެކު އެސަރަހައްދަށް ގޮސް ހަރަކާތްތެރިވެފަ އެވެ. އަދި ހާދިސާ ހިނގި އިރު އެ ބޯޓުގައި 15 މީހުން ތިއްބެވެ. އޭގެ ތެރޭގައި އަންހެނަކާއި ކުޑަކުއްޖަކު ހިމެނެއެވެ. އަދި ބަނޑޮސް އައިލެންޑް ރިސޯޓުގެ ދޯންޏެއްގެ އެހީތެރިކަމާއެކު އެންމެން ވަނީ ބަނޑޮސް އައިލެންޑް ރިސޯޓަށް ގެންގޮސްދީފައެވެ. އެ ހާދިސާގައި އެއްވެސް މީހަކަށް އަނިޔާ ލިބިފައެއް ނުވެ އެވެ.