ވަކި ލިމިޓެއްގެ ތެރޭގައި އުޅެން ޖެހުމުން ދިމާވާ މައްސަލަތަކެއް ދައްކުވައިދޭ ދިވެހި ފިލްމު "ހައްދު" ޕްރިމިއާކޮށްފި އެވެ. ހައްދު ޕްރިިމިއާކުރީ މިއަދު ހަވީރު ޝްވެކް ސިނަމާގައި ބޭއްވި ރެޑްކާޕެޓް ހަފްލާއެއްގަ އެންވާރަމެންޓަލް ޕްރޮޓެކްޝަން އޭޖެންސީ (އީޕީއޭ) ގެ ޑިރެކްޓާ ޖެނެރަލް އިބްރާހިމް ނައީމް އެވެ.
މާލެ ޝްވެކް ސިނަމާ އާއި ހުޅުމާލެ ޝްވެކް ސިނަމާ އަދި އޮލިމްޕަހުގައި ހައްދުގެ 18 ޝޯ އަޅުވާނެ އެވެ. ފިލްމުގެ ޓިކެޓް މިހާރުދަނީ ވިއްކަމުންނެވެ. އޮލިމްޕަހުގެ ފުރަތަމަ ޝޯ ވެސް މިހާރު ވަނީ ފުލްވެފަ އެވެ. ފިލްމުގެ އެއް ޕްރޮޑިއުސަރު އަދި ޑައިރެކްޓަރު އަބްދުލްފައްތާހު ބުނީ އެ ފިލްމު ބަލަން ކޮންމެެހެން މާލެ އަންނަން ނުޖެހޭނެ ކަމަށާއި ހުޅުމާލޭގަ އާއި ރާއްޖޭގެ މީހުން އެންމެ ގިނަ ހިސާބުތަކުގައި ފިލްމު އަޅުވާނެ ކަމަށެވެ. އައްޑު އަތޮޅު އަދި ހދ. ކުޅުދުއްފުށީގައި ފިލްމުގެ ޕްރިމިއާ ހަފްލާއެއްވެސް ބާއްވާނެ އެވެ. އެ ދެ ޝޯވެސް މިހާރު ވަނީ ފުލްވެފަ އެވެ.
ހައްދު ޕްރޮމޯޓުކޮށްފައިވަނީ ސިނަމާގައި ރިކޯޑުތައް މުގުރާލާނެ ފިލްމެއްގެ ގޮތުގަ އެވެ. އަދި ފައްތާހު ވެސް ވަނީ އެ ފިލްމަކީ ދިވެހި ފިލްމު އިންޑަސްޓްރީގައި ބެންޗްމާކަކަށް ވާނެ ކަމަށެވެ.
ފައްތާހު އަދި ބަތަލާ ނިއުމާ މުހައްމަދު ޕްރޮޑިއުސްކުރި ފިލްމުގެ ލީޑުރޯލު ކުޅެފައިވަނީ އަހްމަދު ޝިބާން، މަރިޔަމް އައްޒަ އަދި އައިމިނަތު ރިޝްފާ އެވެ. ޝިބާނަކީ ފިލްމީ ދާއިރާއަށް މުޅިން އަލަށް ނުކުތް ތަރި އެކެވެ. ސަޕޯޓިން ތަރިންގެ ގޮތުގައި އަލީ އާޒިމް (ދޮން އައްޔަ) މުހައްމަދު ރަޝީދު (ދަރާ)، މަރިޔަމް ޝަކީލާ، ފައުޒިއްޔާ ހަސަން ފެނިގެންދެ އެވެ. އަދި ހާއްސަ ފެނިލުމެއްގައި ނުޒުހަތު ޝުއައިބު (ނުޒޫ) އަދި ނޫސްވެރިޔާ އަހްމަދު ފައިރޫޒް ފެނިގެންދެ އެވެ.
ހައްދުގެ ސްކްރީންޕްލޭ ހަދާފައިވަނީ މަހުދީ އަހްމަދު އެވެ. ފިލްމުގައި ހަ ލަވައެއް ހިމެނޭއިރު ލަވަތައް ކިޔާފައިވަނީ މުހައްމަދު އަބްދުލް ގަނީ (ތޭރަވާ) އާއި އަންހެނުން މަރިޔަމް އަޝްފާ އަދި އެ ދެ މީހުންގެ ދަރިފުޅު ޔޫސުފް އަލްސަން އެވެ. ފިލްމުގެ ކޮންމެ ލަވައެއްގެ މަސައްކަތް ކޮށްފައިވަނީ ވަކި މިއުޒީޝަނެއް ކަމަށް ފައްތާހު ކުރިން ބުނެފައިވެ އެވެ.
އެ ފިލްމުގެ މަންޒަރުތައް ނަގާފައިވަނީ ހއ. ކެލާ، ރ. ވާދޫ އަދި މާލޭގަ އާއި ބައެއް ރިސޯޓުތަކުގަ އެވެ.
ހައްދަކީ ފައްތާހުގެ 12 ވަނަ ފީޗާ ފިލްމެވެ.