ޔުވެންޓަސްގެ އިޓަލީގެ ގޯލް ކީޕަރު ޖިއަންލުއީޖީ ބުފޮން ކޮޅަށް، ބާސެލޯނާގެ ލިއޮނަލް މެސީ ލަނޑު ކާމިޔާބު ކޮށް ޔުވެންޓަސްއާ ދެކޮޅަށް 3-0 ބާސާ މޮޅުކޮށްދީފި އެވެ.
ޔުވެންޓަސްގެ މުހިންމު ފަސް ކުޅުންތެރިން ނުލައި ކުޅުނު މެޗުގައި، ބާސާގެ ތިން ގޯލްގެ ތެރެއިން ދެ ގޯލްވެސް ކާމިޔާބު ކުރީ މެސީ އެވެ. ބުފޮން ކޮޅަށް ގޯލް ނުޖެހޭ ކަމަށް ބުނެ މެސީ އަށް ކުރިމަތިވެފައިވާ ފާޑު ކިޔުން އޭނާ ހުއްޓުވާލީ، ފުރަތަމަ ހާފުގެ އެންމެ ފަހު މިނެޓްގައި، ލުއިސް ސުއަރޭޒް ތަނަވަސް ކޮށްދިން ފުރުސަތަކުން ކާމިޔާބު ކުރި ލަނޑުން ނެވެ.
ބުފޮން ކޮޅަށް ގޯލް ނުޖެހި، މެސީ ވަނީ ހަތަރު މެޗު ފުރިހަމަ ކޮށްފަ އެވެ. އެހެން ކަމުން، މެސީ އަށް ބުފޮން ކޮޅަށް ލަނޑު ޖެހުނީމެޗުގެ ވަގުތުން ބަލާނަމަ 315 މިނެޓް ފަހުން ނެވެ.
ރޭގެ މެޗުގައި ބާސާގެ އާ އެޓޭކިން ޓްރިއޯ ކަމަށްވާ، އުސްމާން ޑެމެބެލޭ އާއި މެސީ އާއި ސުއަރޭޒްގެ ކޮމްބިނޭޝަން ފުރަތަމަ ފަހަރަށް މެޗަކުން ފެނިގެން ގޮސްފަ އެވެ. ބާސާގެ ހަމަލާ ތަކުގައި ވިދުން ގަދައީ މެސީގެ ނަމަވެ. ބާސާގެ ދެ ވަނަ ލަނޑު އީވާން ރެކިސިޗް ކާމިޔާބު ކުރިއިރު މެސީ ވަނީ އެ ލަނޑުގައިވެސް ހިއްސާ ވެފައެވެ.
ރޭގެ މެޗުގައި ބާސާގެ ޕޮސެޝަން ގޭމްގެ ރީތި ފުލޯއެއް ދަނޑުމަތިން ފެނިގެން ދިޔަ އެވެ. ނަމަވެސް، ޔުވެންޓަސް ވަނީ ކައުންޓަ އެޓޭކްގައި ފުރުސަތުތައް ތަނަވަސް ކޮށްފަ އެވެ.
ބާސާގެ ދެ ވަނަ ލަނޑު 56 ވަނަ މިނެޓްގައި އީވާން ރަކިޓިޗް ކާމިޔާބު ކުރީ މެސީ، ޔުވެންޓަސްގެ ޑިފެންޑަރުން ކައިރިން ނައްޓާލުމަށްފަހު، އޭރިއާ ތެރޭގައި ހުރި ލުއިސް ސުއަރޭޒްއަށް ތަނަވަސް ކޮށްދޭން އުޅުނު ބޯޅަ، ޔުވެންޓަސްގެ ޑިފެންޑަރު ސްޓެފަނޯ ސްޓްރާރޯ ފައިގައި ޖެހިފައި ރީބައުންސް ވެގެން އައި ބޯޅަ ގޯލް ތެރެއަށް ފޮނުވާލައިގެން ނެވެ.
މެޗުގެ 69 ވަނަ މިނެޓްގައި، ބާސާގެ ތިން ވަނަ ލަނޑު މެސީ ކާމިޔާބު ކުރީ ކެޕްޓަން އަންދުރޭ އިނިއެސްޓާ ތަނަވަސް ކޮށްދިން ބޯޅަ އަކުން ނެވެ.
މެޗަށް ފަހު ވާހަކަ ދައްކަމުން، ބާސާގެ ކޯޗް އެރުނަސްޓޭ ވަލްވެރުޑޭ ބުނީ މެސީ އަށް ބޯޅަ ލިބިއްޖެނަމަ ޓީމަށް ފައިދާ ހުރި ކޮންމެވެސް ގޮތެއް ވާނެ ކަމަށް އަބަދުވެސް ހިތައް އަރާ ކަމަށެވެ.
"ލިއޯ [މެސ] އަށް ބޯޅަ ލިބިއްޖެނަމަ އަހަރެން ހިތައް އަރާ ކޮންމެވެސް ގޮތެއް ވާނޭ އެއީ އަހަރެމެންނަށް ފައިދާ ހުރި ގޮތަކަށް ވާނީ،" އެތުލެޓިކް ކުލަބުގެ ކުރީގެ ކޯޗް ބުންޏެވެ. "ލިއޯ އެ ކާމިޔާބު ކުރީ ތަފާތު ގޯލެއް މިހާރު ނަސީބު އެއޮތީ އޭނާ ކޮޅަށް ބުރަވެފަ ކޮންމެ ތާކުންވެސް އޭނާ އަށް ގޯލް ޖެހޭނެ މި ކުލަބުގެ ތާރީހްގައި އެންމެ މުހިންމު ކުޅުންތެރިޔާ."
ބެލްޖިއަމްގެ އަންޑާލެކްޓްއާ ދެކޮޅަށް ކުޅުނު ބަޔާން މިޔުނިކުންވެސް މެޗު ކާމިޔާބު ކުރީ 3-0 ން ނެވެ. އެ ޓީމުގެ ލަނޑުތައް ޖެހީ، ރޮބަޓް ލެވަންޑޮސްކީ އާއި ތިއާގޯ އަލްކަންޓާރާގެ އިތުރުން ޔޫޝުއާ ކިމިކް އެވެ.