ޗެމްޕިއަންސް ލީގް ގުރޫޕް 'އީ' ގައި ސޮލޮވޭނިއާގެ އެންކޭ މަރިބޯރުއާ ދެކޮޅަށް ރަޝީޔާގެ ސްޕާޓެކް މޮސްކޯ ކުޅުނު މެޗުގައި ސްޕާޓޭކް ސަޕޯޓަރުން ރެފްރީއަށް އަމާޒު ކޮށް އަލިފާން ބޮޅަ އުކައިފި އެވެ. ސްޕާޓެކުން ލީޑްގައި ވަނިކޮށް މަރިބޯރުން ވަނީ ފަހު ވަގުތު ނަތީޖާ އެއް ވަރު ކޮށްފަ އެވެ.
ލަނޑެއް ނުޖެހި ފުރުސަތުތައް ބޭކާރު ވެގެންދިޔަ މެޗުގެ ފުރަތަމަ ހާފުގައި، ސްޕާޓެކް ސަޕޯޓަރުން ވަނީ ޖަރުމަންގެ ރެފްރީ ޑެނީޒް އައިޓެކެން، ސެން ސާކަލް އޭރިއާ ތެރޭގައި ހުއްޓިގެން ހުއްޓައި އޭނާ އާ ދިމާލަށް އަލިފާން ބޯޅަ އުކާފަ އެވެ. ނަމަވެސް އޭނާގެ ގަޔާ ހަމަޔަށް އަލިފަން ބޯޅަ ފޯރާފަ އެއް ނުވެ އެވެ.
މެޗު ފެށުމުގެ ކުރިން ދަނޑު ބޭރުގައިވެސް، ސްޕާޓެކް ސަޕޯޓަރުން ވަނީ، ހަމަނުޖެހުން ހިންގާފަ އެވެ. ސޮލެވޭނިއާގެ ފުލުހުން ވަނީ މޫނު ނިވާ ކޮށްގެން ގޭންގް ހަރަކާތް ހިންގަމުން ދިޔަ ސްޕާޓެކް ސަޕޯޓަރުން ހުއްޓުވުމަށް ޓަކައި، ދަނޑި ބުރިން ކުރިމަތި ލާފަ އެވެ. ސްޕާޓެކް ސަޕޯޓަރުންގެ ހަމަނުޖެހުންތަކާ ގުޅިގެން ޔޫއެފްއާގެ ސަސްޕެންޝަން އެ ކުލަބާ ދެކޮޅަށް އައުން ވަރަށް ގާތެވެ.
ސްޕާޓެކް ސަޕޯޓަރުންގެ އެ އަމަލަކީ ފުރަތަމަ ފަހަރެއް ނޫނެވެ. ދެހާސް ފަނަރަ ވަނަ އަހަރު ރަޝިޔާ ޓްލާއަށް ނިސްބަތްވާ އެފްސީ އާސެނަލް ޓްލާއާ ދެކޮޅަށް ސްޕާޓެކް ކުޅުނު މެޗެއްގައިވެސް، ސަޕޯޓަރުން ހަމަ ނުޖެހުން ހިންގުމުން، 8500 ޕައުންޑުން ސްޕާޓެކް ޖޫރި މަނާ ކުރި އެވެ. ސަޕޯޓަރުން ދަނޑުގައި ހަމަނުޖެހުން ހިންގުމުން، ކުޅުން މެދު ކަނޑާލަން ޖެހި އަމިއްލަ ޓީމަށް އެކަމުގެ ނޭދެވޭ އަސަރު ކޮށްފައިވެސް އެބަހުއްޓެވެ.
މެޗުގެ 59 ވަނަ މިނެޓްގައި، އެލެކްސެންޑާ ސަމޭޑޯވް ސްޕާޓެކްއަށް ލީޑް ނަގައިދީފައި ވަނިކޮށް، މެޗުގެ 85 ވަނަ މިނެޓްގައި މަރިބޯރު އަށް ނަތީޖާ ހަމަހަމަ ކޮށްދިނީ ޑޮމެޔަން ބޯހަރު އެވެ.
އެ ގުރޫޕްގައި ހިމެނޭ އަނެއް ދެ ޓީމު ކަމަށްވާ ލިވަޕޫލް އާއި ސެވިއްޔާ ކުޅުނު މެޗުގައި، ލިވަޕޫލަށް ލިބުނު ޕެނަލްޓީ ރޮބާޓޯ ފާމިނޯ އަށް ނާކާމިޔާބު ވުމުން، ލިވަޕޫލް މެޗު ނިމުނީ 2-2 ން އެއްވަރު ވެގެން ނެވެ. މިދިޔަ އަހަރު ޔޫރޮޕާ ލީގްގެ ފައިނަލުގައި ކުޅުނު މި ދެ ޓީމު އޭގެ ފަހުން ކުޅުނު ފުރަތަމަ މެޗުގައި، ފުރަތަމަ ލީޑް ނެގީ ސެވިއްޔާއިން ނެވެ. މެޗު ފެށިގެން ފަސް ވަނަ މިނެޓްގައި، އެ ޓީމަށް ލީޑް ނަގައިދިނީ ވިސާމް ބެން ޔަދެރު އެވެ. އޭނާ ލަނޑު ޖެހީ ސާޖިއޯ އެސްކަޑޭރޯ ދިން ފުރުސަތަކުން ނެވެ.
އޭގެ ފަހުން މެޗުގެ 21 ވަނަ މިނެޓްގައި އަލްބާޓޯ މޮރޭނޯ ތަނަވަސް ކޮށްދިން ފުރުސަތަކުން، ލިވަޕޫލަށް ނަތީޖާ ހަމަހަމަ ކޮށްދިނީ ފާމިނޯ އެވެ. މެޗުގެ 37 ވަނަ މިނެޓްގައި، މުހައްމަދު ސަލާހް ވަނީ ލިވަޕޫލަށް ލީޑް ނަގައިދީފަ އެވެ. ޕެނަލްޓީ އޭރިއާ ބޭރުން އޭނާ ފޮނުވާލި ބޯޅަ ގޯލް ތެރެއަށް ވަނީ ސެވިއްޔާގެ ކުޅުންތެރިޔެއްގެ ފައިގައި ޖެހިފައި މިސްރާބު ބަދަލު ވެގެން ނެވެ.
ލިވަޕޫލަށް ޕެނަލްޓީ އެއް ލިބުނީ އެ ޓީމުގެ ހާފުގެ ތެރެއިން، ލިވަޕޫލްގެ ސެޑިއޯ މާނޭއާ، ސެވިއްޔާގެ ކެޕްޓަން ނިކޮލަސް ޕަރޭހާ ފައުލު ކުރުމުން ނެވެ. އޭގެ ކުރިން، ޕަރޭހާ އަތުގައިވެސް ބޯޅަ ޖެހި، ލިވަޕޫލްގެ ކުޅުންތެރިން ޕެނަލްޓީ އަށް އެޕީލްވެސް ކުރި އެވެ. ޕެނަލްޓީގައި ފާމިނޯ ފޮނުވާލި ޕެނަލްޓީ އަމާޒުވީ ގޯލް ދަނޑި އަށެވެ. ސެވިއްޔާގެ ކީޕަރު ސާޖިއޯ ރިކޯ ޑަިއިވް ކުރީވެސް ނުބައި ފަރާތަށެވެ.
ސެވިއްޔާއަށް ނަތީޖާ ހަމަހަމަ ކޮށްދިނީ، ޔޯކިން ކޮރެއާ އެވެ. މެޗުގެ 94 ވަނަ މިނެޓްގައި ލިވަޕޫލްގެ ޖޯއޭ ގޮމޭޒްއަށް ވަނީ ދެ ވަނަ ރީނދޫ ކާޑާއެކު ރަތް ކާޑު ދައްކައި ދަނޑުން ފޮނުވާލާފަ އެވެ.