ޗެމްޕިއަންސް ލީގްގެ ގުރޫޕް 'އެޗް' ގައި ސައިޕްރަސްގެ އަޕެއޮލް ނިކޯސިއާގެ މައްޗަށް 3-0 ގެ ނަތީޖާ އަކުން ކަމިޔާބު ހޯދައި އުނދަގޫ ދެ މެޗަށް ފަހު ރެއާލު މެޑްރިޑް ކުރީގެ ފޯމަށް އެނބުރި އަތުވެއްޖެ އެވެ.
އެ ގުރޫޕްގެ އަނެއް ދެ ޓީމު ކަމަށްވާ، ޓޮޓެންހަމް ހޮސްޕާ، މި ސީޒަންގައި އެ ޓީމުގެ ހޯމް ދަނޑުގެ ގޮތުގައި ބޭނުން ކުރާ ލަންޑަންގެ ވެމްބްލީ ސްޓޭޑިއަމްގައި، ޖަރުމަންގެ ބްރޫޝިއާ ޑޯޓްމަންޑް އަތުން ކާމިޔާބު ހޯދީ 3-1 އިން އެވެ.
ސްޕެނިޝް ލީގްގައި އެންމެ ފަހުން، ރެއާލް ކުޅުނު ދެ މެޗުންވެސް އެޓީމަށް މޮޅެއް ނުލިބެ އެވެ. އޭގެ ފަހުން، ރޭ ކުޅުނު ފުރަތަމަ މެޗުގައި ރެއާލްގެ ތިން ލަނޑުގެ ތެރެއިން ދެ ލަނޑު ކާމިޔާބު ކުރީ ސްޕެއިންގެ ޑޮމެސްޓިކް މުބާރާތުގެ ފަސް މެޗަށް ސަސްޕެންޑް ކޮށްފައި ހުރި ކްރިސްޓިއާނޯ ރޮނާލްޑޯ އެވެ.
ފަލަމަސްގަނޑަށް ލިބުނު އަނިޔާއެއްގައި، ކުޅުމާ ދުރުގައި ހުރި ސެންޓާ ފޯވަޑް ކަރީމް ބެންޒެމާގެ ބަދަލުގައި، ސެންޓާ ފޯވަޑްގެ ދައުރު އަދާ ކުރީ ރޮނާލްޑޯ އެވެ. ރޮނާލްޑޯ އާންމު ކޮށް ކުޅޭ ވިންގް ބެލެހެއްޓީ، މި ސީޒަންގައި ރަނގަޅު ފޯމެއްގައި ކުޅެމުން ގެންދާ އިސްކޯ އެވެ. ބޭލް ވަނި އޭނާގެ ރަސްމީ ވިންގް ވަރަށް ބަލަހައްޓާފަ އެވެ. ރެއާލްގެ ފުރަތަމަ ލަނޑު މެޗުގެ 12 ވަނަ މިނެޓްގައި ކާމިޔާބު ކުރުމުގައި ކުރުމުގައި އެންމެ ކުރިއަށް ކުޅެމުންދާ އެ ތިން ކުޅުންތެރިންގެ ދައުރުވެސް ހިއްސާވި އެވެ. އަޕެއޮލްގެ ހާފުގެ ތެރެއިން އިސްކޯ އަށް ލިބުނު ބޯޅަ އޭނަ ދިނީ އަރިމަތީގައި ހުރި ބޭލް އަށެވެ. ބޭލް ވަނީ ޕެނަލްޓީ އޭރިއާ ތެރޭގައި ހުރި ރޮނާލްޑޯ އަށް އެބޯޅަ ތަނަވަސް ކޮށްދީފަ އެވެ. ގޯލްގެ އަރިމައްޗަށްވާ ގޮތަށް ހުރެފައި، ރޮނާލްޑޯ އެ ބޮލަ ފޮނުވާލީ ގޯލްގެ ދުރު ކަނަށެވެ.
އޭގެ ފަހުންވެސް ބޭލް ވަނީ ރޮނާލްޑޯއަށް ބޯޅައެއް ހުރަސްކޯށްދީފަ އެވެ. ރޮނަލްޑޯ ބޮލުން ފޮނުވާލި ބޮޅަ އަމާޒުވީ ގޯލްގެ އަރިމަތީ ދާގަނޑަށެވެ. މެޗުގެ 33 ވަނަ މިނެޓްގައި ވެސް ބޭލް ވަނީ އަނެއްކާވެސް ރޮނަލްޑޯއަށް ބޯޅައެއް ތަނަވަސް ކޮށްފަ އެވެ. ރޮނަލްޑޯއަށް ބޮޅައާ ދުރުގައި ހުރުމުން ރަނގަޅަށް އެބޯޅާ ފޮނުވާ ނުލެވުނެވެ.
ދެ ވަނަ ހާފުގައި، ޑެނީ ކަރަވާހާލް ތަނަވަސްކޮށްދިން ހިތްގައިމު ބޯޅައަކުން ރޮނަލްޑޯ ފޮނުވާލި ބޯޅަ، އަޕެއޮލްގެ ގޯލް ދަނޑީގައި ޖެހިފައި އެ ބޯޅަ ވެއްޓުނީ ގޯލް ލައިން މައްޗަށެވެ. ރޮނާލްޑޯ ވަނީ ގޯލެއް ކަމަށް އެޕީލްވެސް ކޮށްފަ އެވެ. ނަމަވެސް ގޯލް ލައިން ޓެކްނޮލިޖީން ފެންނަ ގޮތުގައި އެ ބޮޅަ ޖެހުނީ ގޯލް ލައިނާއި ލައިނުން އެތެެރެއާ ދެމެދަށެވެ. މުޅި ބޯޅަ ލައިނުން އެތެރެވެފައެއް ނުވެ އެވެ. ރެއަލްގެ ދެ ވަނަ ލަނޑު ރޮނާލްޑޯ ކާމިޔާބު ކުރީ ލިބުނު ޕެނަލްޓީ އަކުން ނެވެ. ރެއާލްގެ ތިން ވަނަ ލަނޑު ކެޕްޓަން ސާޖިއޯ ރާމޮސް ކާމިޔާބު ކުރީ އަޕެއޮލް އޭރިއާ ތެރޭގައި ހުރެފައި ބައިސްކަލް ކިކަކުން ނެވެ.
ރޭ ވެމްބްލީގައި ޓޮޓެންހަމް، ބުރޫޝިއާ ޑޯޓްމަންޑާ ދެކޮޅަށް ކުޅުނު މެޗަކީ، ވެމްބްލީގައި ޑޯޓަމަންޑް ކުޅުނު ދެ ވަނަ މެޗެވެ. އެ ޓީމުގެ ފުރަތަމަ މެޗަކީ 2013 ވަނަ އަހަރު ގެ ޗެމްޕިއަންސް ލީގް ފައިނަލުގައި ވާދަވެރި ބަޔާން މިޔުނިކާ ދެކޮޅަށް ކުޅުނު މެޗެވެ. އެ ފަހަރުގެ ފައިނަލުގައި ޑޯޓްމަންޑް ބަލިވީ 2-1 ން ނެވެ.
ރޭ ކުޅުނު މެޗުގައި ފުރަތަމަ ލީޑް ނެގީވެސް ޓޮޓެންހަމްއިން ނެވެ. މެޗު ފެށިގެން ހަތަރު ވަނަ މިނެޓްގައި އެޓީމަށް ލީޑް ނަގައިދިނީ ސަން ހިއުންގް މިން އެވެ. މެޗުގެ 11 ވަނަ މިނެޓްގައި އަންޑްރީ ޔާމެލެންކޯ ވަނީ ޑޯޓްމަންޑަށް ނަތީޖާ ހަމަހަމަ ކޮށްދީފަ އެވެ. ޓޮޓެންހަމް މޮޅު ކޮށްދިން އަނެއް ދެ ލަނޑު ކާމިޔާބު ކުރީ ހެރީ ކޭން އެވެ.