މިރޭ، ރެއާލް ބެޓިސްއާ ދެކޮޅަށް ނުކުންނަ މެޗަކީ، ސްޕެނިޝް ލީގްގައި ރެއާލް މެޑްރިޑްގެ ފަސް ވަނަ މެޗެވެ. ނަމަވެސް، ކްރިސްޓިއާނޯ ރޮނާލްޑޯ އަށް އެއީ ލީގް ފުރަތަމަ މެޗެވެ. ސްޕެނިޝް ސްޕަ ކަޕްގެ ފުރަތަމަ ލެގް މެޗުގައި، ދެއްކި ރަތް ކާޑާއެކު، ރެފްރީގެ ބުރަކަށީގައި ކޮށްޕާލުމުން، ރޮނާލްޑޯއަށް ކުރި ފަސް މެޗުގެ ސަސްޕެންޝަނަށް ފަހު، ޑޮމެސްޓިކް މެޗަކަށް ނުކުންނަ ފުރަތަމަ ދުވަހެވެ.
ސްޕަ ކަޕްގެ ފުރަތަމަ މެޗަށް ފަހު، 38 ދުވަސް ފާއިތުވެ ހިނގައްޖެ އެވެ. ރޮނާލްޑޯ އާއި އެންމެ ވާދަވެރި ބާސެލޯނާގެ ލިއޮނަލް މެސީ އަޮތީ، މާ ކުރީގަ އެވެ. ސްޕެނިޝް ލީގްގައި މެސީ މިހާތަނަށް ނުވަ ގޯލް ކާމިޔާބު ވަނީ ކޮށްފަ އެވެ. ރޮނާލްޑޯ ނުލައި، ރެއާލް ކުޅެން ޖެހުނު ލީގްގެ ހަތަރު މެޗުގެ ތެރެއިން ދެ މެޗުން އެ ޓީމު ވަނީ އެއްވަރުވެފަ އެވެ.
މެސީގެ ނުވަ ގޯލާއެކު، ސްޕެއިންގެ ލަނޑު ލިސްޓްގެ އެންމެ ކުރީގައި އޮތް އިރު، ރޮނަލްޑޯ އަދި މިރޭ ފަށާނީ އެވެ. ލަނޑު ލިސްޓްގައި މެސީއާ އެންމެ ގާތުގައި އޮތް ވެލެންސިއާގެ ސިމިއޯނޭ ޒާޒާ ވެސް ޖެހިފައިވަނީ މެސީ އަށް ވުރެ، ފަސް ލަނޑު މަދުންނެވެ. ސުވާލަކީ، ރޮނާލްޑޯ އަށް ރޭހުގައި މެސީއާ އަރާ ހަމަ ކުރެވިދާނެ ހެއްޔެވެ.
ރޮނާލްޑޯ އަށް ދިން ސަސްޕެންޝަންގެ އަދަބަށްފަހު، އޭނާ ބުނީ، އޭނާ އަށް އަދަބު ދިނީ އޭނާގެ އަޒުމު ދަށް ކޮށްލުމަށް ކަމަށާއި، ނަމަވެސް ކުރިއަށް ވުރެ ވަރުގަދަކޮށް އެނބުރި އަންނާނެ ކަމަށެވެ.
ރޮނާލްޑޯ ފުރަތަމަ މެޗަށް ނުކުންނަނީ ތާރިހީ ރެކޯޑެއް މުގުރާލުމުގެ ފުރުސަތު ރެއާލްގެ ޓީމަށް އޮތް ވަގުތެއްގަ އެވެ. ބްރެޒިލްގެ މަޝްހޫރު ޕެލޭ ސަންޓޯސްއަށް ކުޅުނު ދުވަސްވަރު، ޖެހިޖެހިގެން އެންމެ ގިނަ މެޗުގައި ލަނޑު ޖަހައިގެން ހެދި ރެކޯޑް އޮތީ ސަންޓޯސް އަތުގައެވެ. މިރޭ ގެ މެޗުގައި، ރެއާލް ލަނޑު ކާމިޔާބު ކޮށްފިނަމަ، 74 މެޗާއެކު ޖެހިޖެހިގެން އެންމެ ގިނަ މެޗުގައި ލަނޑު ޖެހުމުގެ ރެކޯޑް ރެއާލްއަށް ލިބޭނެ އެވެ. އެންމެ ފަހު ރެއާލް ސޮސިއެދާދުއާ ދެކޮޅަށް ކުޅުނު މެޗުގައި، ރެއާލް ވަނީ ސަންޓޯސްގެ ރެކޮޑާ އަރާ ހަމަ ކޮށްފަ އެވެ.