ރައީސް އަބްދުﷲ ޔާމީން އަބުދުލްގައްޔޫމްގެ މި ވެރިކަމުގައި މީހުން ހިތްހަމަ ނުޖެހޭ ކަންކަން ވެސް އެބަހުއްޓެވެ. ކުރިޔަށް ނުދާ ކަންކަން ވެސް އެބަހުއްޓެވެ. އެކަމަކު ތަރައްގީގެ ޕްރޮޖެކްޓް ތަކަކާއި ގިނަ މަޝްރޫއުތަކެއް ކުރިޔަށް އެބަދެ އެވެ. ރައްޔިތުންނަށް މަންފާ ލިބިގެންދާފަދަ ވަރަށް ގިނަ މަޝްރޫއުތަކެއް ފަށައިގެން އެބަ އުޅެއެވެ. އެންމެ ބޮޑު އިސްކަމެއް ދެވިފައިވާ އެއް ކަމަކީ ސިއްހީ ނިޒާމު ހަރުދަނާ ކޮށް ރައްޔިތުންނަށް ދުޅަހެޔޮ ސިއްހީ ނިޒާމެއް ފޯރުކޮށް ދިނުމެވެ. ރާއްޖޭގެ ކޮންމެ ސަރަހައްދަކަށް ބަލާލި ނަމަވެސް ސިއްހީ ނިޒާމަށް އިތުރު ދުޅަހެޔޮ ކަމެއް ގެނެސްދޭން ސަރުކާރުން ކުރިއަށްގެންދާ އެތައް ޕްރޮޖެކްޓްތަކެއް އެބަހުއްޓެވެ.
ސިއްހީ ނިޒާމަށް މި ރީޖަންގައި އެންމެ ބޮޑު ހޭދައެއް ކުރާ ގައުމަކީވެސް ރާއްޖެ އެވެ. ދިވެހި ދައުލަތުގެ ބަޖެޓުން ސިއްހީ ދާއިރާއަށް 26 ޕަސެންޓް ހާއްސަ ކޮށްފައި ވާއިރު ސިއްހީ ނިޒާމް ހަރުދަނާ ކުރަން ވަރަށް ގިނަ މަސައްކަތްތަކެއް ވޭތުވެދިޔަ ދުވަސްތަކުގައި ސަރުކާރުން ވަނީ ކުރަން ވެސް ފަށާފަ އެވެ. މިހާތަނަށް ސިއްހީ ދާއިރާ އިން ހިިންގާ އެންމެ ބޮޑު ޕްރޮޖެކްޓް ކަމަށްވާ އައިޖީއެމްއެޗާއި އިންވެގެން، ހަދަމުންދާ 25 ބުރީގެ ދަރުމަވަންތަ ހޮސްޕިޓަލަކީ ކޮންމެ ދިވެހި ރައްޔިތަކަށް ސިއްހީ ނިޒާމް އާ އުސްމިންތަކަކަށް ވާސިލުވަމުންދާ ކަމުގެ ހެއްކެކެވެ.
ދައުލަތުން 140 މިލިއަން ރުފިޔާ ހަރަދު ކޮށްގެން ގާއިމް ކުރާ 25 ބުރީގެ ދަރުމަވަންތަ ހޮސްޕިޓަލްގެ މަސައްކަތް ފެށީ މިދިޔަ އަހަރުގެ ޖޫން މަހު އެވެ. ޒަމާނީ ހިދުމަތްތަކާއެކު ސިއްހީ ނިޒާމަށް ގެންނަ ބޮޑު ބަދަލަކަށް ވެެގެން އަންނަ އަހަރުގެ މިނިވަން ދުވަހު އެ ހޮސްޕިޓަލް ހުޅުވާނެ އެވެ.
ދަރުމަވަންތައިގެ ހަ ބުރިއެއް ހާއްސަ ކުރަނީ ނޭޝަނަލް ޑައިގްނޯސްޓިކް ހިދުމަތަށެވެ. ޑޮކްޓަރަށް ދެއްކުމާއި، އެކަމާ ގުޅިގެން ކުރަންޖެހޭ ހުރިހާ ތަހުލީލުތަކެއް ވެސް އެ އިމާރާތަށް ބަދަލު ކުރާނެ އެވެ. ޖިމް ފެސިލިޓީޒާއި ޗައިލްޑް ކެއާ ސެންޓަރާއި ރިހެބިލިޓޭޝަން ސުއިޓެއް ހިމެނޭއިރު ހޮސްޕިޓަލުން ހިދުމަތް ހޯދާ ފަރާތްތަކަށް ޕްރައިވެޓް އެކަމޮޑޭޝަން ހަމަޖައްސަން ފަސް ބުރި ހާއްސަ ކުރެ އެވެ.
ދަރުމަވަންތަ ހޮސްޕިޓަލް ނިމުމާއެކު އައިޖީއެމްއެޗަށް މިހާރު ދިމާވެފައިވާ އެންމެ ބޮޑު ދަތި، އެނދުގެ ދަތިކަމަށް ވަރަށް ބޮޑު ހައްލެއް ލިބިގެންދާނެ އެވެ. އަައިޖީއެމްއެޗަކީ މިއަދު ގާތްގަނޑަކަށް 250 ހާއި 300 ދެމެދުގެ އަދަދަކަށް އެނދުގެ ހިދުމަތް ދެމުންދާ ހޮސްޕިޓަލެކެވެ. ދަރުމަވަންތަ އިމާރާތް ނިމުމާއެކު އައިޖީއެމްއެޗާއި ދަރުމަވަންތަ ހޮސްޕިޓަލުން 500 އެނދުގެ ހިދުމަތަށް ލިބޭނެ އެވެ.
"ރައީސް ޔާމީންގެ އަމާޒަކީ މި ރީޖަންގައި އެންމެ ފެންވަރު ރަނގަޅު ހޮސްޕިޓަލަށް ދަރުމަވަންތަ ހޮސްޕިޓަލް ވެގެން ދިއުން، އަދި މި ހޮސްޕިޓަލްގެ ސަބަބުން ހުސްނުވާ އާސަންދާގެ ދަށުން ބޭރަށް ސިއްހީ ހިދުމަތް ހޯދަންދާ ފަރާތްތައް މަދުވެގެން ދިއުން، އެކަމުގެ ސަބަބުން ގައުމަށް އެތަށް ޑޮލަރެއް އިތުރުވެގެން ދާނެ، އެކަމުގެ ސަބަބުން ގައުމުގެ އެތަށް ފައިސާއެއް ރައްކާ ކުރެވިގެން ދާނެ، ސިއްހީ ނިޒާމަށް ހެޔޮ ބަދަލުތަކެއް އަތުވެގެންދާނެ" ހެލްތް މިނިސްޓަރު އަބުދުﷲ ނާޒިމް ވިދާޅުވި އެވެ.
މި ރީޖަންގައި ހުރި އެންމެ ފެންވަރު ރަނގަޅު ހޮސްޕިޓަލަށް ދަރުމަވަންތަ ހޮސްޕިޓަލް ހެދުމަށް ސަރުކާރުން މަސައްކަތް ކުރަމުންދާއިރު، ހުޅުމާލެ ޔޫތް ސިޓީގައި ސަރުކާރުން ގާއިމް ކުރަމުންދާ ޓްރީޓޮޕް ހޮސްޕިޓަލަކީވެސް މި ރީޖަންގައި އަރައިގެން އަންނާނެ އެފަދަ ދެވަނައެއް ނެއް ހޮސްޕިޓަލް އަކަށް ވެގެންދާނެ އެވެ. ގާތްގަނޑަކަށް 90 މިލިއަން ޑޮލަރު ހަރަދު ކޮށްގެން ގާއިމްކުރާ މި ހޮސްޕިޓަލް ވެގެންދާނީ ރާއްޖޭގެ އެންމެ ފުރަތަމަ ޓާޝަރީ ހޮސްޕިޓަލަށެވެ. މިއަހަރު ހުޅުވާ މި ހޮސްޕިޓަލަކީ ވަރަށް ގިނަ އާ ހިދުމަތްތަކެއް ލިބިގެންދާނެ ހޮސްޕިޓަލަކަށްވާއިރު މިއީ ސިއްހީ ދާއިރާއަށް އަންނާނެ އެންމެ ބޮޑު އިންގިލާބީ ބަދަލެވެ.
ޓްރީޓޮޕް ހޮސްޕިޓަލުން ލިބިގެންދާނެ ބައެއް ހިދުމަތްތަކަށް ދާއިރު އެންމެ ފާހަގަ ކޮށްލެވޭ އެއް ކަމަކީ ރާއްޖޭގައި އަލަށް އޯޕެން ހާޓް ސާޖަރީގެ ހިދުމަށް ދިނުމެވެ. އެކަމަށް ހާއްސަ ޑޮކުޓަރުވެސް ވަނީ ރެކްރޫޓު ކޮށްފައެވެ. ޓެކްނޮލޮޖީ ގޮތުން ކުރިއަރަމުންދާ އިރު މި ހޮސްޕިޓަލުން މިވަނީ ސިއްހީ ނިޒާމް ޓެކްނޮލޮޖީއާ ވަރަށް ބޮޑަށް ގުޅާލާފަ އެވެ. އެގޮތުން މި ހޮސްޕިޓަލަކީ ފަހުގެ ޓެކްނޮލޮޖީ އާއެކު ފުލީ އޮޓޯމެޓިކު ހޮސްޕިޓަލަކަށް ވެގެންދާނެ އެވެ. ހަމަ އެއާއެކު ދުނިޔޭގެ އެކި ހިސާބު ތަކުގައިވާ ޓުރީ ޓޮޕް ހޮސްޕިޓަލް ތަކާއި އެއް ނެޓްވޯކަކުން މި ހޮސްޕިޓަލް ގުޅާލެވިފައިވާނެ އެވެ. މި ހޮސްޕިޓަލަކީ ދިވެހީންގެ ވަރަށް ބޮޑު އުންމީދަކާ ގުޅިފައިވާ ހޮސްޕިޓަލެކެވެ. ޓްރީ ޓޮޕް ހޮސްޕިޓަލުން ދިވެހީންނަށް ވަރަށް ގިނަ ހިދުމަށް ތަކެއް ފުޅާ ދާއިރާއެއްގައި ލިބިގެންދާނެ އެވެ.
ގައުމު ކުރިއަރަމުންދާ ވަރަކަށް ސިއްހީ ނިޒާމުވެސް ހަރުދަނާވެ ކުރިއަރުވަން ޖެހެ އެވެ. މިއަހަރު ޓްރީޓޮޕް ހޮސްޕިޓަލް ހުޅުވުމުން މި ރީޖަންގެ އެހެން ހޮސްޕިޓަލްތަކަށް ގޮން ޖަހާލެވޭ ވަރުގެ ހޮސްޕިޓަލް އަކަށް ވެގެން ދިއުމާއެކު ސިއްހީ ދާއިރާގައި ރާއްޖެއަށް ކުރިޔަށް ދިގު ފިޔަވަޅެއް އަޅައިލެވޭނެ އެވެ.
"މި ހޮސްޕިޓަލަކީ ދިވެހިންގެ އުންމީދުތަކާއި ގުޅިފައިވާ ހޮސްޕިޓަލެއް. މި ހޮސްޕިޓަލުގެ ސަބަބުން ރާއްޖޭގެ ސިއްހީ ނިޒާމަށް ބޮޑެތި ބަދަލުތަކެއް އައިސް އިތުރު ފަސޭހަ ކަމެއް ލިބިގެން ދާނެ،" މިނިސްޓަރު ވިދާޅުވި އެވެ.
ސިއްހީ ނިޒާމު އިތުރަށް ހަރުދަނާ ކުރުމަށް ސަރުކާރުންދަނީ ވަރަށް ގިނަ ކަންކަން ކުރަމުންނެވެ. އަދި ވަރަށް ގިނަ ކަންކަން ކޮށްފައި ވެއެވެ. ސަރުކާރުން މާލޭ ރީޖަންއަށް އަމާޒުކޮށް ފެންވަރު ރަނގަޅު ދެ ހޮސްޕިޓަލް ގާއިމް ކުރަމުންދާއިރު ހުޅުމާލޭ ހޮސްޕިޓަލްގައި އަންނަ މަހު ކެންސަރު ބައްޔަށް ފަރުވާ ކުރަން ފެށުމަށް ވަނީ ނިންމާފަ އެވެ. ރާއްޖެއިން ބޭރަށް ގޮސް ކުރަންޖެހޭ ގިނަ އޮޕަރޭޝަންތަކާއި ޓެސްޓްތައް އަމިއްލަ ވަޒަނަށް ގެނެސްދިނުމަށް މަސައްކަތް ކުރެ އެވެ.
އެކި ކަންކޮޅު ތަކުގައި ވެސް ހޮސްޕިޓަލްތަކާއި ކޮންމެ ރަށެއްގައި ފާމަސީއެއްގެ އިތުރުން ކޮންމެ ރަށަކަށް އެމްބިއުލާންސާއި ސީ އެމްބިއުލާންސްގެ ހިދުމަތްވެސް މިންވަރެއްގައި މިހާރު ވަނީ ތަރައްގީ ކޮށްފައެވެ. އެންމެ ފާހަގަ ކޮށްލެވެނީ ހދ. ކުޅުދުއްފުއްޓާއި އައްޑޫ ސިޓީގައި ގާއިމްކުރާ ޓާޝަރީ ހޮސްޕިޓަލެވެ. އައްޑޫ ސިޓީގެ އިކުއެޓޯރިއަލް ކޮންވެންޝަން ސެންޓަރު (އީސީސީ) ގައި ގާއިމްކުރާ ހޮސްޕިޓަލް ވެގެންދާނީ 100 އެނދުގެ ހޮސްޕިޓަލަކަށެވެ. އަދި ކުޅުދުއްފުށީ ހޮސްޕިޓަލް ވެގެންދާނީ 150 އެނދުގެ އިމާރާތަކަށެވެ. ދެ އަހަރެއްހާ ދުވަހުގެ ތެރޭގައި މަސައްކަތް ނިމި ހުޅުވުމުން ވަރަށް ގިނަ ބަޔަކަށް މާލެ ނައިސް ބޭނުންވާ ހިދުމަތް ލިބޭނެ އެވެ.
ރާއްޖޭގެ ސިއްހީ ނިޒާމް ތަރައްގީގެ އާ ބާބުތަކެއް ލިޔަމުންދާއިރު ބޭރު ދުނިޔޭގެ އެކި ކަންކޮޅުތަކުންވެސް ދަނީ ތައުރީފު އޮއްސަމުންނެވެ. އެގޮތުން ދުނިޔޭގެ ސިއްހަތު ޖަމިއްޔާ އިން މި ސަރަހައްދަށް ކަނޑައަޅާފައި ހުންނަވާ ރީޖަނަލް ޑިރެކްޓަރު ޑރ. ޕޫނަމް ކެތްރަޕަލް ސިންހާ ވިދާޅުވި ގޮތުގައި ސިއްހީ ދާއިރާ އަށް 26 ޕަސެންޓް ހަރަދު ކުރާއިރު އެއީ ވަރަށް ބޮޑު އަދަދެކެވެ. މި ރީޖަންގައި ސިއްހީ ދާއިރާ އަށް މިހާ ބޮޑު ހޭދައެއް ކުރާ އިތުރު ގައުމެއް ނެތެވެ.
"ރާއްޖޭގެ ސިއްހީ ނިޒާމަށް ސަރުކާރުން ވަރަށް ބޮޑު އަހަންމިއްޔަތުކަމެއް ދީ އެކަމަށް ވަރަށް ބޮޑު ހޭދައެއް ކުރޭ، އޭގެ ސަބަބުން ރާއްޖޭގެ ސިއްހީ ނިޒާމު ވަރަށް ބޮޑަށް ހަރުދަނާ ވެފައިވަނީ، ރާއްޖެއިން ހިމަބިހި ފަދަ ބަލިތައް ނައްތާލުމުގައި އެންމެ ބޮޑު އެހީއަކަށް ވެގެންދިޔައީ ސިއްހީ ނިޒާމަށް ސަރުކާރުންދޭ އަހަންމިއްޔަތު އިތުރުވެ ކުރާ ހަރަދު އިތުރުވުމުގެ ސަބަބުން،" ޕޫނަމް ވިދާޅުވި އެވެ.
ކުރީގެ ސަރުކާރުތަކާ އަޅާބަލާއިރު މިސަރުކާރުން ސިއްހީ ނިޒާމް ހަރުދަނާ ކުރުމަށް ކުރަމުންދާ މަސައްކަތަށް އޭ ރިޕޯޓް ދޭވަރު ވެއެވެ. ސިއްހީ ނިޒާމަށް ކުރާ ހޭދަ 130 ޕަސެންޓަށް ވަނީ އިތުރު ވެފައެވެ. ރައީސް ޔާމީންގެ އަމާޒަކީ މި ރީޖަންގައި ސިއްހީ ގޮތުން އެންމެ ރަނގަޅު ގައުމަށް މިގައުމު ހެދުން ކަމަށާއި ބޭރު ގައުމަށް ބޭސްފަރުވާއަށް ދިއުން ހުއްޓުވުމެވެ. މި ރީޖަންގެ އެހެން ގައުމުތަކުގެ ސިއްހީ ނިޒާމަށް ގޮންޖަހާލެވޭ ވަރުގެ ބޮޑު ތަރައްގީއެއް ގެނެސްދިނުމެވެ.