ދިރާގުން ގެސްޓްހައުސްތަކަށް ހާއްސަކޮށް "ގެސްޓްހައުސް ޓީވީ" ގެ ހިދުމަތް ތައާރަފު ކުރަން ތައްޔާރު ވެއްޖެ އެވެ.
ޕެރަޑައިސް އައިލެންޑް ރިސޯޓުގައި މިހާރު ކުރިއަށްދާ މޯލްޑިވްސް ގެސްޓްހައުސް ކޮންފަރެންސް 2017 ގައި އެ ކުންފުނިން ވަނީ ގެސްޓްހައުސް ޓީވީގެ ހާއްސަ ޕްރެޒެންޓޭޝަނެއް ދީފަ އެވެ.
މި ޕްރެޒެންޓޭޝަންގައި އެ ކުންފުނީގެ އޮފިޝަލަކު ވިދާޅުވި މި ހިދުމަތް ވެގެންދާނީ ގެސްޓްހައުސްތަކަށް އަންނަ ޓޫރިސްޓުންނަށް ގިނަ ފަސޭހަ ތަކެއް ހޯދޭނެ ހިދުމަތަކަށެވެ. މިގޮތުން މި ހިދުމަތް މެދުވެރިކޮށް ޓޫރިސްޓު މީހާގެ ހިޔާލު ހޯދުން ފަދަ ގިނަ ހިދުމަތްތަކެއް ލިބޭނެ ކަމަށް އޭނާ ވިދާޅުވި އެވެ.
"ގެސްޓްހައުސްގައި ލިބެން ހުރި ހިދުމަތްތަކާއި ސްކޯންކިން އަދި މިފަދަ ގިނަ ތަންތަނުގެ މައުލޫމާތު ވެސް މިޓީވީން ލިބެން ހުންނާނެ،" އޮފިޝަލް ވިދާޅުވި އެވެ.
ދިރާގުން މި ހިދުމަތް ތައާރަފު ކުރާނެ ތާރީހެއް އަދި އިއުލާނެއް ނުކުރެ އެވެ.
ޖޯއީބޮކްސް މެދުވެރިކޮށްދޭ "ދިރާގު ޓީވީ" ގެ ހިދުމަތް ފެށުމާއެކު އެ ކުންފުނިން ވަނީ މި ދާއިރާ އަށް ބޮޑު ކުރިއެރުމެއް ގެނެސްދީފަ އެވެ. އެ ކުންފުނިން ވަނީ މަޝްހޫރު އޭއެންއީ ޗެނަލްއާ ގުޅިގެން އިތުރު ފަސް ޗެނަލެއްވެސް ދާދިފަހުން ތައާރަފުކޮށްފަ އެވެ. އެ ޗެނަލްތަކުގެ ތެރޭގައި ހިމެނެނީ ހިސްޓްރީ ޗެނަލްއަކާއި ލައިފްޓައިމް އަދި އެފްވީއައިގެ ނަމުގައި ތައާރަފުކުރި ޗެނަލެއްގެ އިތުރުން އެޗްޓޫ ޗެނަލާއި ކްރައިމް އިންވެސްޓިގޭޝަން ޗެނަލެކެވެ. މި ޗެނަލްތަކަކީ މިހާރު ރާއްޖޭގައި އާއްމުކޮށް ފެންނަ ޗެނަލްތަކާ ހިލާފަށް ގިނަ ބަޔަކު ބަލާ ޗެނަލްތަކެވެ. މި ޗެނަލްތަކަށް މަހަކު 80 މިލިއަން ވިއުސް ލިބޭ ކަމަށްވެ އެވެ.