ތާރީހީ ލޯބީގެ ވާހަކައެއްގެ މައްޗަށް މަޝްހޫރު ޑައިރެކްޓަރު ސަންޖޭ ލީލާ ބަންސާލީ އުފައްދާފައިވާ ފިލްމު "ޕަދްމާވަތީ" އަށް ދިމާވަމަުން އަންނަ ދަތިތައް މިއިން ދުވަހަކު ނިމޭނެހެން ހީނުވެ އެވެ.
ޖައިޕޫރުގެ އޮގަނައިޒޭޝަނެއްގެ އެކްޓިވިސްޓުންތަކެއް ކަމަޑްވާ ކަރްނީ ސޭނާ ކިޔާ ގްރޫޕަކުން މި ފިލްމާ ދެކޮޅުވެރިވެގެން އުޅެނީ "ޕަދްމާވަތީ" ގެ ތާރީޚީ ހަގީގަތްތައް އޮޅުވާލާފައިވާ ކަމަށާއި ރާނީ ޕަދްމިނީއާ ގުޅޭ ދޮގު ވާހަކަތަކެއް ފިލްމުގައި ހިމަނާފައިވާ ކަމަށް ބުނެ އެވެ.
އެގޮތުން ކަރްނީ ސެނާއިން ވަނީ ޖެއިޕުރްގައި ފިލްމުގެ ޝޫޓިން ކުރިއަށް ގެންދަން ތައްޔާރުކޮށްފައި ހުރި އަގު ބޮޑު ސެޓާއި ތަނުގައި ހުރި ތަކެތީގެ އިތުރުން ޑައިރެކްޓަރު ބަންސާލީގެ ގައިގަ ވެސް ތަޅައިގަނެފަ އެވެ.
އެ ހަމަލާ އަށް ފިލްމުގެ ޝޫޓިން މަޑުޖައްސައި އަލުން މުމްބައި އަށް އައިސް، އަލުން ޝޫޓިން މަހަރާޝްތްރަ ސްޓޭޓްގެ އަވަށެއް ކަމަށްވާ ކޯލާޕޫރްގައި މާޗް މަހުގެ ތެރޭގައި އަލުން ފެށި ދުވަހު، މޫނު ނިވާކޮށްގެން ތިބި ބަޔަކު ވަނީ ފިލްމުގެ ޝޫޓިން ކުރިއަށް ދިޔަ ތަނަށް ގޮސްް ފިލްމުގެ ކޮސްޓިއުމްތައް ބަހައްޓާފައި ހުރި ޓެންޓަކަށް ޕެޓްރޯލް ބޮން އުކައި ފިިލްމުގެ ޖޫނިއާ އާޓިސްޓުން ބޭނުންކުރާ ހުރިހާ ކޮސްޓިއުމްތައް އަންދާލާފަ އެވެ.
މި ދެ ހާދިސާ އަށް ފަހު ބަންސާލީގެ ޕްރޮޑަކްޝަން އޮފީހުން ނެރުނު ބަޔާނެއްގައި "ޕަދްމާވަތީ" ގައި ރަންވީރު ސިންގް ކުޅޭ އަލާއުއްދީން ޚިލްޖީގެ ކެރެކްޓާ އާއި ދީޕިކާ ޕަދުކޯން ކުޅޭ ޕަދްމާވަތީ"ގެ ކެރެކްޓާގެ ހުވަފެނީ ލޯބީގެ މަންޒަރުތަކެއް ނުހިމެނޭނެ ކަމުގެ ޔަގީންކަން ދިނުމުން ވަނީ ފިލްމުގެ ޝޫޓިން އަމާންކަމާއެކު ކުރިއަށް ގެންދަން ފުރުސަތު ދީފަ އެވެ.
ފިލްމުގެ ޝޫޓިންގެ ބޮޑުބައި ނިމި ފުރަތަމަ ޕޯސްޓަރު ވަނީ މިދިއަ ހަފްތާގެ ތެރޭގައި އާންމުކޮށްފަ އެވެ. ދިޕިކާ ރާނީގެ ޕަދްމިނީގެ ގޮތުގައި ފެނިގެންދާ ޕޯސްޓަރާ އެކު އަނެއްކާ ވެސް ވެސް ކަރްނީ ސެނާގެ ރުޅިގަނޑު ފަޅައިގެން ދިޔައީ އެވެ. މި ފިލްމުގެ ޕޯސްޓަރުތަކުގައި ހުޅުޖަހައި، ފިލްމު ރިލީޒްކުރަން ހުރަސްއަޅާނެ ކަމުގެ އިންޒާރުދީފަ އެވެ.
މި ފިލްމު ރިލީޒްނުކުރެވޭނެ ކަމަށް ބުނަމުން އެ ގްރޫޕްގެ ބައެއް މެމްބަރުން ވަނީ ބަންސާލީ ވަނީ ފިިލްމު ރިލީޒްކުރުމުގެ ކުރިން އެމީހުންނަށާއި ތާރީހު ދިރާސާކުރާ ފަރާތްތަކަށް ފިލްމު ދައްކައި، އެމީހުންގެ ހުއްދަ ލިބިގެން ނޫނީ ފިލްމު ރިލީޒްނުކުރާނެ ކަމުގެ ޔަގީންކަން ދީފައި ކަމަށެވެ. ނަމަވެސް ބަންސާލީ ވައުދާ ހިލާފުވެފައިވާތީ ފިލްމު ރިލީޒްކުރަން އެއްވެސް ޖާގައެއް ނުދޭނެ ކަމަށް އެ ގްރޫޕުގެ ރައީސް ނަރައިން ސިންގް ދިވްރަލަ ވަނީ ބުނެފަ އެވެ.
"ޖެއިޕޫރްގައި ފިލްމު ޝޫޓްކުރި އިރު ބަންސާލީ ބުނެފައިވަނީ ފިލްްމު ދައްކާނަމޭ. އެކަމަކު އެމީހުންގެ އެއްވެސް ހަބަރެއް ނުވޭ އެއްވެސް ބަޔަކު އަހަރުމެންނަށް ނުގުޅާ. އަހަރުމެން ގްރޫޕުގެ މެމްބަރުން ހުއްދަނުދެނީސް މި ފިލްމެއް ރިލީޒްނުކުރެވޭނެ،" ނަރައިން ބުނެފައިވެ އެވެ.
އޭނާ އިތުރަށް ވަނީ މީޑިއާ ރިޕޯޓްތަކުން އެމީހުންނަށް އެނގިފައިވާ ގޮތުގައި މި ފިލްމުގައި ތާރީހީ ގޮތުން ދޮގު މައުލޫމާތުތައް ހިމެނެ އެވެ. އަދި މި ފިލްމަކީ ޕަދްމާވަތީ ބަދުނާނުވާ ގޮތަށް އުފައްދާފައިވާ ފިލްމަކަށް ވުމުން ފިލްމު ރިލީޒްކުރަން އެއްވެސް ފުރުސަތެއް ނުދޭނެ ކަމަށެވެ.
ރާނީ ޕަދްމިނީގެ ރޯލުން ދިޕިކާ ޕަދުކޯން ފެނިގެންދާއިރު، އޭނާގެ ފިރިމީހާގެ ރޯލުން ފެނިގެންދަނީ އެކްޓަރު ޝާހިދު ކަޕޫރެވެ. އަދި ރަންވީރު ސިންގް ފެނިގެންދަނީ ދިޕިކާއާ ހެދި މޮޔަވެފައި ހުންނަ ރަސްކަލެއް ކަމަށްވާ އަލާއުއްދީން ޚިލްޖީގެ ރޯލުންނެވެ.
މި ފިލްމު ރިލީޒްކުރުމަށް ހަމަޖެހިފައިވަނީ ޑިސެމްބަރު 1 ވަނަ ދުވަހު އެވެ.