އިނގިރޭސި ޝާހީ އާއިލާގައި މިހާރު ކައިވެންޏެއް ބައްލަވައިގަންނަ އުމުރުފުޅެއްގައި ހުންނެވީ ޕްރިންސެސް ޑައާނާގެ ހަގު ދަރިކަލުން ޕްރިންސް ހެރީގެ ލޯބިވެރިޔެއް ނެތުމަކީ ޝާހީ އާއިލާގެ އެންމެ ބޮޑު އެއް ކަންބޮޑުވުމެވެ. އުމުރުން 30 އަހަރުން މައްޗަށް ދިޔައިރުވެސް ޕްރިންސް ހެރީގެ ގިނަ ވަގުތު ހޭދަކުރައްވަނީ ޗެރިޓީ މަސައްކަތްތަކުގަ އެވެ.
ޕްރިންސް ހެރީގެ ލޯބިވެރިޔަކަށް ވާން ބޭނުންވާ އެތައް އަންހެން ކުދިންނެއް އިނގިރޭސިވިލާތުގައި ތިއްބާ ޕްރިންސް ހެރީ މިވަނީ އެމެރިކާގެ ޓީވީ ތަރިއަކާއި ލޯބީގެ ގޮތުން ގުޅިފަ އެވެ. ޕްރިންސް ހެރީގެ އާ ލޯބިވެރިޔަކީ ޓީވީ ސީރީޒް "ސުއިޓްސް"ގެ ތަރި މާކަލް އެވެ. މާކަލް އާއި ލޯބީގެ ގޮތުން ގުޅިގެން އުޅޭތާ އަހަރެއް ފަހުން ފުރަތަމަ ފަހަރަށް ދެ މީހުން އެކުގައި މިވަނީ އާންމުންގެ ތެރެއަށް ނުކުމެފަ އެވެ.
ޕްރިންސް ހެރީ އާއި މާކަލް މިވަނީ ޓޮރޮންޓޯގައި އޮތް ވީލް ޗެއާ ޓެނިސް މެޗެއް ބަލައިލަން ގޮސްފަ އެވެ. އެ މެޗަކީ އާންމުކޮށް ހުޅުވާލައިގެން އެންމެނަށްވެސް ވަދެވޭ ގޮތަށް ކުރިއަށް ގެންދިޔަ މެޗެކެވެ.
މިމަހުގެ ކުރީކޮޅު ވެނިޓީ ފެއާ މެގަޒިން އަށް މާކަލް ދިން އިންޓަވިއުއެއްގައިވަނީ ޕްރިންސް ހެރީ އާއި ލޯބީގެ ގޮތުން ގުޅިގެން އުޅޭކަމަށް އިއުތިރާފްވެފަ އެވެ.
އެ ދެ މީހުން އެކުގައި ފުރަތަމަ ފަހަރަށް ފެނިލި ނަމަވެސް ގިނަ ބަޔަކު އަންނަނީ ޕްރިންސް ހެރީ އައި މާކަލްގެ ކައިވެނި ބޯމަތިވަމުން އަންނަ ކަމަށް ބުނެ ވާހަކަ ފަތުރަމުންނެވެ.
ޕްރިންސް ހެރީ މީގެ ކުރިން ކައިވެނި ބައްލަވައިގެންފައި ނުވި ނަމަވެސް މާކަލް ވަނީ މީގެ ކުރިން ކައިވެންޏެއް ކޮށްފަ އެވެ. ކުރިން އޭނަ ކައިވެނިކޮށްފައިވަނީ އެމެރިކާގެ ޓީވީ ތަރި ޓްރެވާ އެގަލްސަން އާ އެވެ. އަދި މިހާރު އަންނަނީ މާކަލްގެ ކައިވެންޏަށްފަހު ކުދިން ބަލަހައްޓާނެ މީހަކާއި ގުޅޭގޮތުން ޓްރެވާ އާ މަޝްވަރާކުރަމުން ކަމަށް ހަބަރުތައް ބުނެފަ އެވެ. ޕްރިންސް ހެރީ މީގެ ކުރިން ލޯބީގެ ގޮތުން ގުޅިފައިވަނީ ދެ މީހަކާ އެވެ. އެއީ ޗެލްސީ ޑޭވީ ނަމަކަށްކިޔާ އަންހެނަކާއި ބޯނަސް ނަމަކަށްކިޔާ މީހަކާ އެވެ. ބޯނަސްއާ ރުޅިވެފައިވަނީ 2014 ވަނަ އަހަރު އެވެ.