މި އަހަރުގެ ޖުމްހޫރީ ދުވަހުގެ ރަސްމީ ޖަލްސާ، ނޮވެންބަރު 11 ވަނަ ދުވަހުގެރޭ ބާއްވަވާ ގޮތަށް ހަމަޖައްސަވައިފިއެވެ. ކުރިން ހަމަޖައްސާފައި އޮތީ ގައުމީ ދުވަސް ދިމާވަނީ، ނޮވެންބަރު މަހުގެ 19 ވަނަ ދުވަހަށް ކަމަށްވާތީ ޖުމްހޫރީ ދުވަހާއި ގައުމީ ދުވަސް ކައިރި ކައިރީގައި އަންނާތީ، ދެ މުނާސަބަތާ ގުޅުވައިގެން ނޮވެންބަރު މަހުގެ 16 ވަނަ ދުވަހުގެރޭ ޖަލްސާއެއް ބާއްވާށެވެ.
ރައީސް އޮފީހުން ބުނީ ނޮވެންބަރު 11 ވަނަ ދުވަހުގެރޭގެ ޖަލްސާގައި، ސަރުކާރުން ކޮންމެ އަހަރަކު ދޭ ގައުމީ އިނާމާއި، މަތީދަރަޖަ ހޯދާ ފަރާތްތަކަށް ރައީސުލްޖުމްހޫރިއްޔާ ދެއްވާ އިނާމު ދިނުން އޮންނާނެ ކަމަށާއި ކީރިތި ގުރުއާން ހިތުދަސްކޮށްގެން ހާފިޒްކަމުގެ ސަނަދު މިއަހަރު ހާސިލުކުރި ފަރާތްތަކަށާއި ސާނަވީ އިމްތިހާނުން މުޅި ދުނިޔެއިން އެއް ވަނަ ހޯދި ދަރިވަރުންނަށާއި، މަތީ ސާނަވީ އިމްތިހާނުން މުޅި ދުނިޔެއިން އެއް ވަނަ ހޯދި ދަރިވަރުންނަށް، ރައީސް ދެއްވާ މެޑެލް ދެއްވުންވެސް އޮންނާނެ ކަމަށެވެ.
މިއަހަރުގެ ގައުމީ ދުވަސް ވަކިން ފާހަގަކުރައްވާ ގޮތަށް ނިންމެވުމާ ގުޅިގެން، ގައުމީ ދުވަހަށް ވަކި ހާއްސް ޕްރޮގްރާމެއް މިނިސްޓްރީ އޮފް ހޯމްއެފެއާޒުން އެކުލަވައިލައްވާ ގޮތަށް ވެސް މިހާރު ވަނީ ހަމަޖައްސާފަ އެވެ.
މި ނިންމެވުން އާއިރު ނޮވެމްބަރު 17 ވަނަ ދުވަހުގެ ރޭ ބާއްވާ ޖަލްސާއެއްގައި ރައީސްގެ އާ މެނިފެސްޓޯގެ ބައެއް ވާހަކަތަކާއި އުފާވެރި އެހެން ހަބަރުތަކަކާއެކު ބައްދަލު ކުރައްވާނެ ކަމަށް ރައީސް އަބްދުﷲ ޔާމީން ވަނީ ވިދާޅުވެފަ އެވެ.