ގަވާއިދާ ހިލާފަށް ދުންފަތުގެ އިސްތިއުމާލްކުރުމުން ކުރާ ޖޫރިމަނާގެ ފައިސާ މީރާއަށް ބަލައިގަންނަ ގޮތަށް ދުންފަތް ކޮންޓްރޯލް ކުރުމާ ބެހޭ ގަވާއިދު ބަދަލު ކުރަން ވިސްނަމުން ދާ ކަމަށް ހެލްތް މިނިސްޓަރު، އަބްދުﷲ ނާޒިމް ވިދާޅުވެއްޖެ އެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ)ގެ މަސައްކަތްތަކާއި ބެހޭގޮތުން މައުލޫމާތު ދިނުމަށް މިއަދު ދިވެހި ރާއްޖޭގެ އަޑުގެ ސެނެކޯ މާލަމުގައި ބޭއްވި ރަސްމިއްޔާތެއްގައި ވާހަކަ ދައްކަވަމުން މިނިސްޓަރު ވިދާޅުވީ ދުންފަތް ކޮންޓްރޯލް ކުރުމުގެ ގޮތުން އާންމު ތަންތަނުގައި ދުންފަތުގެ އިސްތިއުމާލު ކުރުން މަނާކުރި ނަމަވެސް ބައެއް މައްސަލަތަކާއި ހުރެ އެންމެ އެކަށީގެންވާ ނަތީޖާ ނުނެރެވުން ކަމަށެވެ.
މިނިސްޓަރު ވިދާޅުވީ އާންމު ތަންތަނުގައި ދުންފަތުގެ އިސްތިއުމާލު ކުުރުމުން ޖޫރިމަނާ ފައިސާ މިހާރު ދައްކަން ޖެހެނީ ހެލްތު މިނިސްޓްރީއަށް ކަަމަށާއި އޭގެ ބަދަލުގައި މޯލްޑިވްސް އިންލަންޑް ރެވެނިއު އޮތޯރިޓީ (މީރާ) މެދުވެރިކޮށް ޖޫރިމަނާ ފައިސާ ބަލައިގަތުމުގެ އިންތިޒާމްތައް ހަމަޖައްސަން މަޝްވަރާކުރަމުން އަންނަ ކަމަށެވެ.
"ފައިން ކުރީމަ ފައިން ނުދައްކާވެސް އެތައް ބަޔަކު އެބައުޅޭ، ދެން އެމީހުން ހޯދާ ފަހާނެ ގޮތެއް މި ސިސްޓަމަކު އެހާ ފަސޭހަ އެއް ނޫން، އަޅުގަނޑުމެން ބޭނުންވަނީ އެއް ގޮތަކުން ނުވެއްޖެޔާ އަނެއް ގޮތަކުންވެސް ދުންފަތް ކޮންޓްރޯލް ކުރަން އަތުކުރި އޮޅާލައިގެން، އެކަމުގައި އަޅުގަނޑުމެންގެ އިހުލާސްތެރި ނިޔަތް އެބައޮތް،" މިނިސްޓަރު ވިދާޅުވި އެވެ. "މިސާލަކަށް ދުއްވާ އެއްޗެހީގައި ޖޫރިމަނާ ކުރީމަ ވަރަށް ރަނގަޅު އުސޫލެއް އެބައޮތް، އިހަށް ދުވަހު އަޅުގަނޑުގެ ރަހުމަތްތެރިޔަކު އެހެން ކަމެއްގައި މީރާއަށް ދިޔައީމަ ބުނީ ތިބޭފުޅާގެ ޕާކިން ސްޓިކާއެއްގެ ފީ ނުދައްކާ އެބައޮތޭ އެ ފައިސާ ދެއްކީމަ ނޫނީ މިކަމެއް ނުވާނޭ، އެހެންވީމަ ދުންފަތުގެ ޖޫރިމަނާ ނުދައްކާ ފަރާތްތަކާއި ދޭތެރޭ ކިހިނެއްތޯ މިކަން ހައްލުކުރާނީ އެކަންކަން ބަލަން މަޝްވަރާކުރަމުން މި އަންނަނީ،"
ދުންފަތް ބޭނުންކުރާ މިންވަރު ކޮންޓްރޯލް ކުރުމަށް ސިނގިރޭޓުގެ އަގު ބޮޑުކޮށް ވަކިވަކި ސިނގިރޭޓު ވިއްކުންވެސް ވަނީ މަނާކޮށްފަ އެވެ. އަދި ގްރެފިކް ވާނިން ދިނުމަށް ސިނގިރޭޓު ފޮށީގެ ބޭރުގައި ދުންފަތުން ލިބޭ ގެއްލުންތައް އަންގައިދޭ މަންޒަރުތަކާިއ މެސެޖުތައް ހިމެނުމުގެ މަސައްކަތް ކުުރުމަށް ކަމާބެހޭ ދާއިރާތަކުން މަޝްވަރާކުރަމުން އަންނަ ކަމަށް މިނިސްޓަރު ވިދާޅުވި އެވެ. ދުންފަތުގެ އުފެއްދުންތަކުގައި މަންޒަރު ޖަހާ ދުންފަތުގެ އުފެއްދުންތަކުގައި މަންޒަރު ފެންނަ ގޮތަށް އިންޒާރު ޖެހުމަކީ ރާއްޖޭން 2005 ވަނަ އަހަރު ސޮއިކޮށް އަމަލުކުރަން ފަށާފައިވާ ބައިނަލް އަގުވާމީ މުއާހަދާއަކުން ރާއްޖެއަށް ލާޒިމުކުރާ ކަމެކެވެ.
ތަފާސް ހިސާބުތަކުން ދައްކާ ގޮތުގައި މިދިޔަ އަހަރު އެކަނިވެސް ރާއްޖެއަށް 1.1 ބިލިއަން ރުފިޔާގެ ސިނގިރޭޓު ރާއްޖެ އެތެރެކޮށްފައިވެ އެވެ.