ލުބުނާނުގެ ބޮޑުވަޒީރުކަމުން އިސްތިއުފާ ދެއްވާފައިވާ ސައުދުލް ހަރީރީ އެނބުރި އަމިއްލަފުޅު ގައުމަށް ވަޑައިގަންނަވަން އެމެރިކާއިން ގޮވާލައިފިއެވެ.
ޕްރޮކްސީ ހަނގުރާމައެއް ކުރުމަށް އެއްވެސް ބަޔަކު ލުބުނާނު ބޭނުން ނުކުރުމަށް އިންޒާރު ކުރައްވައި އެމެރިކާގެ ސެކްރެޓަރީ އޮފް ސްޓޭޓް ރިކްސް ޓިލާސަން ނެރުއްވި ބަޔާނެއްގައި ވިދާޅުވެފައި ވަނީ ހަރީރީ މިނިވަންކޮށް ހުންނެވިކަމުގެ ކަށަވަރުކަން އެމެރިކާއަށް ލިބިފައިވާ ކަމަށެވެ.
ޓިލާސަން މިމޭރުމުން ވާހަކަފުޅު ދައްކަވާފައި މިވަނީ ސައުދީ އަރަބިއްޔާއިން އުޅެނީ ހަރީރީ ހައްޔަރުކޮށްގެން ކަމަށް ލުބުނާނުގެ ބައެއް އޮފިޝަލުންނާއި ހިޒްބުﷲ އިން ތުހުމަތުކޮށްފައިވައި ވަނިކޮށެވެ.
ލުބުނާނުގެ ބޮޑުވަޒީރު ކަމުން އިސްތިއުފާ ދެއްވިކަން ހަރީރީ އިއުލާނު ކުރެއްވީ ސައުދީ އަރަބިއްޔާގެ ޓީވީތަކުން ދެއްކި ތަގުރީރެއްގައެވެ. އިސްތިއުފާ ދެއްވި ސަބަބެއް ކަަމަށް ވީޑިއޯގައި އޭނާ ވިދާޅުވެފައި ވަނީ ހިޒްބުﷲ އިން އޭނާގެ ފުރާނަފުޅަށް ނުރައްކާ ކުރިމަތިކުުރުމެވެ.
ޝިޔައީންނަށް ވާގި ދިނުމަށް ސޫރިޔާއާއި ޔަމަނުުގައި ވެސް ހަނގުރާމަކުރަމުން އަންނަ ހިޒްބުﷲ އަކީ އެމެރިކާއިންް އެގައުމުގެ ބައިވެރިން ޓެރަރިސްޓް ޖަމާއަތެެއްގެ ގޮތުގަައި ލިސްޓްކޮށްފައިވާ ޖަމާއަތެކެވެ. ނަމަވެސް އެޖަމާއަތަކީ ލުބުނާނުގެ ސަރުުކާރުގައިވެސް ބައިވެރިވާ، އެގައުމުގައި ވަރަށް ނުފޫޒު ގަދަ ޖަމާއަތެކެވެ. އެޖަމާއަތަށް މާލީ ގޮތުން އެހީތެރިވަނީ އީރާނުންނެވެ.
ޓިލާސަންގެ ބަޔާނުގައި ގޮވާލައްވާފަައި ވަނީ " ބޮޑުވަޒީރު ލުބުނާނަށް އެނބުރި ވަޑައިގެން ހާލަތު އޮތް ގޮތް އޮޅުން ފިލުވައި ދެއްވުމަ"ށެވެ.
ޕްރޮކްސީ ހަނގުރާމައެއް ކުރުމަށް ލުބުނާނު ބޭނުން ނުކުރުމަށް އޭނާ ގޮވައިލެއްވި ގޮވައިލުން ރައްދުވަނީ އީރާނަށާއި ސައުދީ އަށެވެ. އެއީ އީރާުން ވާގިދޭ މީހުންނާއި ސައުދީން ވާގިިދޭ މީހުންގެ މެދުގައި ލުބުނާނުވައި ހަނގުރާމައެއް ފެށިދާނެކަމަށް ބެލެވިފައި ވާތީއެވެ.
ސައުދީއާއި އެގައުމަށް ވާގިދޭ ގައުމުތަކުން މިހާރު ވަނީ އެގައުމުތަކުގެ ރައްޔިތުން ލުބުނާނަށް ދަތުރުނުކުރުމަށާއި މިހާރު ގޮސް ތިބި މީހުން ވެސް އަނބުރައި އައުމަށް އަންގާފައެވެ.
ބުރާސްފަތި ދުވަހު ރޮއިޓާސް ބުނީ ހަރީރީ ސަލާމަތް ކުރުމަށް ސައުދީއަށް ފިއްތުންތައް ކުރިމަތިކޮށްދޭން އަރަބި ގައުމުތަކުގައި ލުބުނާނުން އެދޭނެ ކަމަށް އެ އެޖެންސީއާ ވާހަކަ ދެއްކި އޮފިޝަލަކު ވިދާޅުވި ކަމަށެވެ.
ލުބުނާނުގެ ބޮޑުވަޒީރުކަމުން އިސްތިއުފާދެއްވިކަން މިދިޔަ ހޮނިހިރު ދުވަހު ހަރީރީ އިއުލާނު ކުރެއްވީ ހައިރާން ކުރުވަނިވި ގޮތަކަށެވެ. އޭނާ އެކަން އިއުލާނު ކުރެއްވީ ސައުދީގައި ހުންނަވައިގެންނެވެ. އެކަމުގެ ސަބަބުން ލުބުނާނުގައި ބޮޑު ސިޔާސީ މައްސަލަ ގަނޑެއް އުފެދުމުގެ އިތުރުން ސައުދީއާއި އީރާނާ ދެމެދު ހިނގާ އަރައިރުމުގެ މެދަށް ލުބުނާނު ވަނީ ވެއްޓިފައެވެ.
ހަރީރީ ބަންދުގައި ހުންނެވި ކަމަށް ދެކެވޭ ވާހަކަ ސައުދީ ސަރުކާރުންނާއި އޭނާގެ އެހީތެރިން ދޮގު ކުރެއެވެ. ނަމަވެސް އެކަން ދޮގު ކުރައްވައި ހަަރީރީ އަމިއްލަފުޅަށް އެއްވެސް ބަޔާނެއް އަދި ނުނެރުއްވައެވެ.
" ލުބުނާނުން އުޅެނީ ބޮޑުވަޒީރު ސައުދު އަލް ހަރީރީ ދޫކޮށްލަން ސައުދީ އަށް ފިއްތުންތައް ކުރިމަަތިކުރަން އަރަބި ގައުމުތަކުގެ ކިބައިން އެދެން،" ސަރުކާރުން ރަސްމީކޮށް އަދި އިއުލާނު ނުކުރާތީ ނަންް ހާމަ ކުރަން ބޭނުން ނުވާ އޮފިޝަލަކު ބުނި ކަމަށް ރޮއިޓާސްގެ ހަބަރުގައި ވއެވެ.
އޭަނާ ބުނެފައި މިނިވަންކަން ނަގާލާފައި ސައުދީގެ ވެރިރަށް ރިޔާޒުގައި ހަރީރީ ބެހެއްޓުމަކީ ލުބުނާނުގެ ސިޔާދަތަށް ދިން ހަމަލާއެއް ކަމަށެވެ.
"އަހަރެމެންގެ ޝަރަފަކީ އޭނާގެ ޝަރަފު،" އޮފިޝަލް ބުނި ކަމަށް ހަބަރުގައި ވެއެވެ.
ސައުދާއި އޭނާގެ ބައްޕާފުޅު ރަފީގު ހަރީރީއަކީ ސައުދީގެ ރަށްވެހިކަން އޮންނަ، އެގަމުގެ މަދަދު ވަރަށް ބޮޑަށް ލިބިވަޑައިގެންފައިވާ ބޭފުޅުންނެވެ. ރަފީގުލް ހަރީރީ ވަނީ ކުރިން އަވަހާރަވެފައެވެ.
ލުބުނާނުގައި އަޣުލަބިއްޔަތު އޮންނަނީ ޝިޔައީންނަށް ކަމަށް ވިޔަސް ސުންނީ އާއިލާއެއް ކަމަށްވާ ހަރީރީ އާއިލާއަށް އެގައުމުގެ ސިޔާސީ ދާއިރާގައި ބާރު ހޯދައިދިނީ ސައުދީންނެވެ. ސައުދީން ވަނީ ދާފި ފަހުން ހަރީރީގެ ސަރުކާރަށް އެއް ބިލިޔަން ޑޮލަރުގެ ހަތިޔާރު ދިނުމަށް އެއްބަސް ވެފައެވެ.
ކޮރަޕްޝަނާ ދެކޮޅަށް ކަމަާށް ބުނެ ސައުދީ ސަރުކާރުން ވަނީ މިދިޔަ ހޮނިހިރު ދުވަހު ޝާހީ ހާންދާނުގެ އެތައް ބޭފުަޅުންނަކާއި ބައެއް ވަޒީރުން ހަައްޔަރުކޮށްފައެވެ. އެކަމުގެ ތެރޭގައި ބައެއް އަމީރުން އަވަހާރަވި ކަމަށް ހަބަރު ވަނީ ފެތުރިފައެވެ. އެ ފިޔަވަޅަކީ ރަސްގެފާނު ސަލްމާން ބިން އަބުދުލް އަޒީރު އަލް ސައުދުގެ ދަރިކަލުން އަދި ވަލީ އަހުދު މުހައްމަދު ބިން ސަލްމާނުގެ ބާރު ގަދަކުރެއްވުމަށް އެޅި ފިޔަވަޅުތަކެއް ކަަމަށް މަސްރަހު ދިރާސާކުރާ ފަރާތްތަކުން އަންނަނީ ބުނަމުންނެވެ.
އެމެރިކާގެ ސެކްރެޓަރީ އޮފް ސްޓޭޓް ރިކްސް ޓިލާސަން. ފޮޓޯ: ބީބީސީ