ފަލަ މީހުންނަށް ބުލީކޮށް ބާކީ ކުރުމަކީ މަދުން ނަމަވެސް ދިވެހިންގެ ތެރޭގަވެސް އޮންނަ ކަމެކެވެ. އެ މީހުންނާ ދިމާއަށް މަލާމާތުގެ ގޮތުގައި ފާޑުފާޑުގެ އެއްޗެހި ބުނެ ޖަޖް ކުރުމެވެ. އާންމު މީހުންގެ ދިިރިއުޅުމަށް އެމީހުންގެ ދިރިއުޅުން ބައްޓަން ކޮށް ތަންތަނަށް ގޮސް އުޅޭއިރު ލަދުގަންނަވާލާ ދެރަކޮށްލާފަ އެބަހުއްޓެވެ.
ހާއްސަކޮށް ބައެއް ކަހަލަ ގޮނޑި ފަދަ ތަކެއްޗަކީ "ކަލޭ މެންނަށް ހާއްސަ އެއްޗެއް ނޫނޭ، ތިއުޅެނީ ތި ހަލާކުކޮށްލަންށޭ"، ފަދަ އެއްޗެހި ބުނެ އެވެ. ފަލަ މީހުންނަށް ހާއްސަ އެއްޗެހި ބާޒާރުން ގަންނަންވެސް ނުލިބެ އެވެ. ލާ އަންނައުނުގެ ވާހަކައެއް ނޫނެވެ. އެ މީހުންނަށް ހާއްސަ އެނދުފަދަ ތަކެއްޗެވެ.
އެހެން ނަމަވެސް ބަހާމާސްގަ މިވަނީ ފަލަ މީހުންނަށް ހާއްސަ ރިސޯޓެއް ހުޅުވާފަ އެވެ. އެ ރިސޯޓު އޮންނަނީ ނަސާއޫގެ އިރުމަތީގަ އެވެ. ރިސޯޓުތަކަށް ގޮސް އެހެން މީހުން އުޅޭހެން ޕޫލަށް އެރިލާ، ސަން ބެޑުގައި އޮށުވެލައިގެން އޮންނަންވީ އެވެ. މޫދަށް ނުވަތަ ޕޫލަށް އެރިލަން ފަސޭހަ ކަހަލަ ހެދުމެއް ލައިގެން ގޮނޑުދޮށުގަވެސް ހިނގަން ވީ އެވެ. އެކަމަށް ފާޑު ކިޔާ ޖަޖުކުރާނެ މީހަކު ނުހުންނާނެ އެވެ.
ެއެ ރިސޯޓުގައި ބޭނުންކުރާ ހުރިހާ އެއްޗަކީވެސް ފަލަ މީހުންނަށް ހާއްސަކޮށް ތައްޔާރުކޮށްފައިވާ އެއްޗެއްސެވެ. އެނދު ފަދަ ތަކެތި ތައްޔާރުކޮށްފަ ހުރީ ސްޓީލް ބޭނުންކޮށްގެންނެވެ. ދޮރުތައްވެސް ފުޅަލެވެ.
މިއީ ޖޭމްސް ކިންގް ނަމަކަށް ކިޔާ މީހެއްގެ ހިޔާލެވެ. އެއީ ރިސޯޓުގެ ފައުންޑަރެވެ. ފަލަ ކަމަށް ބުނެ އެހެން މީހުންގެ ތެރޭގައި ޗުއްޓީ ހޭދަކުރަން ފުރުސަތު ނުދިން މީހުންނަށް މިއޮތީ "ދުނިޔެމަތީގެ ސުވަރުގެ" އެއް ތައްޔާރުކޮށްދީފަ އެވެ. ދަތުރުކޮށް އެ ރިސޯޓަށް ގޮސް ހަމަޖެހިލާ އަރާމުކޮށްލާށެވެ. އެ ރިސޯޓުގަ ސްވިމިންސޫޓް ލައިގެން ގޮނޑުދޮށުގަ ހިނގަންވީ އެވެ. ޖަޖު ކުރާނެ މީހަކު ނުހުންނާނެ އެވެ.
ކިންގްގެ ހިޔާލަށް އެފަދަ ރިސޯޓެއް ހުޅުވުމުގެ ހިޔާލު އައީ މީގެ 15 ވަރަކަށް އަހަރު ކުރިން އޭނާ ހޮޓަލެއްގަ މަސައްކަތް ކުރިއިރު އެވެ. އެ ހޮޓަލަށް އައި ފަލަ އަންހެން ގެސްޓެއް އިށީނުމުގެ ސަބަބުން ބީޗް ގޮނޑިއެއް ހަލާކުވެ އޭނާގެ އަތުން 150 ޑޮލަރު ޗާޖް ކުރުމުންނެވެ. އޭގެ ފަހުގަ އެތައް ދިރާސާއެއް ކޮށް، އަމިއްލަ ރިސޯޓެއް ހުޅުވޭވަރުވުމުން އޭނާގެ ހިޔާލުގަ އަމަލީ ސިފަ ޖެއްސީ އެވެ. މީގެ ކުރިން އެތައް ބަޔަކަށް އެ ހިޔާލު ދިން ނަމަވެސް އެއްވެސް މީހަކު އަމަލީ ސިފަ ގެނެސްފަ ނެތުމުންނެވެ.
ރިސޯޓަށް ބޭނުންވާ ފަރުނީޗަރު ގަންނަން ނުލިބުމަކީ ޗެލެންޖަކަށް ވިޔަސް ކިންގް ނިންމައިގެން ހުރީ ކޮންމެވެސް ގޮތަކުން އެކަން ކުރާށެވެ. އެހެން ކަމުން ފަސޭހައިން ހަލާކުނުވާނޭ ފެންވަރުގައި އޭނާ ވަނީ ފަރުނީޗަރުތައް ހައްދާފަ އެވެ.
"ހޮސްޕިޓަލު އެނދު ނޫނީ ފަލަ މީހުންނަށް ހާއްސަ އެނދެއް ބާޒާރުގަ ނެތް، އަހަރެން ހެދި ދިރާސާތަކުން ދެއްކި ގޮތުގަ އާންމުކޮށް ފަލަ މީހުން ނިދާ އުޅެނީ ތަޅުންމަތީ ގޮދަޑި އަޅައިގެން، އެކަމަކު މި ރިސޯޓުގައި ހުންނާނީ އެމީހުންނަށްވެސް އަރާމުކޮށް ނިދާލެވޭނެ އެނދު،" ކިންގް ބުނެފައިވެ އެވެ.
އެ ރިސޯޓުގަ 24 ކޮޓަރި އާ ފަސް މޭލުގެ ޕްރައިވެޓް ބީޗެއްވެސް އޮވެ އެވެ. ކެއުންވެސް ވަރަށް ބަރާބަރަށް ފޯރުކޮށްދެ އެވެ. އެހެން ނަމަވެސް ގްރޫޕްކޮށް ބުކް ކުރަން ޖެހެ އެވެ. ގްރޫޕެއްގަ އެންމެ ގިނަ ވެެގެން ހިމެނޭނީ 29 މީހުންނެވެ.
އެ ރިސޯޓު އެންމެ ފުރަތަމަ ހުޅުވާފައިވަނީ 2015 ވަނަ އަހަރު އާދައިގެ ގޮތަކަށެވެ. އެހެން ނަމަވެސް އެ ރިސޯޓު އިތުރަށް ތަރައްގީ ކުރުމަށްފަހު މި އަހަރު ވަނީ އަލުން ހުޅުވާފަ އެވެ.