ނިމުނު ދެހާސް ސަތާރަ ވަނަ އަހަރު ފުލުހުންގެ އިދާރާއަށް ހުށަހެޅި ޖިނާއީ ކުށްތަކުގެ އަދަދު 2016 ވަނަ އަހަރާ އަޅާ ބަލާއިރު ފަހެއް ޕަސެންޓް ދަށަށް ގޮސްފައިވާ ކަމަށް ފުލުހުންގެ ތަފާސް ހިސާބުތަކުން ދައްކައިފި އެވެ. މިދިޔަ އަހަރު އެ މުއައްސަސާއަށް 12775 މައްސަލައެއް ހުށަހަޅާފައިވާއިރު އެންމެ ގިނައީ ވައްކަމާއި ފޭރުމުގެ މައްސަލަތަކެވެ.
ފުލުހުންގެ އާންމުކުރި ތަފާސް ހިސާބުތަކުން ދައްކާގޮތުން މިދިޔަ އަހަރު އެ އިދާރާއަށް ވައްކަމާއި ފޭރުމުގެ 4167 މައްސަލައެއް ހުށަހަޅާފައިވެއެވެ. އަދި މާރާމާރީގެ 770 މައްސަލައަކާއި މަސްތުވާތަކެތީގެ ދެހާހަށްވުރެ ގިނަ މައްސަލަ ހުށަހަޅާފައިވާއިރު މުދަލާއި ތަކެއްޗަށް ގެއްލުންދިނުމުގެ 455 މައްސަލައެއްވެސް ވަނީ ހުށަހަޅާފައެވެ. މި މައްސަލަތަކުގެ ތެރެއިން މިދިޔަ އަހަރު އިތުރުވުމެއް އައިސްފައިވަނީ މުދަލާއި ތަކެއްޗަށް ގެއްލުންދިނުމުގެ ބައިންނެވެ. އެ ކެޓަގަރީން 2016 ވަނަ އަހަރު ހުށަހަޅާފައިވަނީ 359 މައްސަލައެވެ. 2017 ވަނަ އަހަރު ނިމުނު އިރު އައިސްފައިވަނީ 21 ޕަސެންޓުގެ އިތުރުވުމެކެވެ.
2016 ވަނަ އަހަރާ އަޅާ ބަލާއިރު، ޗެކް ބައުންސް ކުރުމުގެ މައްސަލަތައް ރިޕޯޓުކުރި އަދަދު ވެސް މިދިޔަ އަހަރު އިތުރެވެ. ޗެކް ބައުންސްކުރުމުގެ 287 މައްސަލައެއް މިދިޔަ އަހަރު ހުށަހަޅާފައިވާއިރު އެ އަދަދު 2016 ގައި އުޅެނީ 265 ގައެވެ. ޖިންސީ ގޯނާގެ 417 މައްސަލައެއް ރިޕޯޓުކޮށްފައިވީ ނަމަވެސް 2016 ވަނަ އަހަރާއި ބަލާއިރު އެ އަދަދުވެސް ވަނީ ދަށްވެފައެވެ.
މިދިޔަ އަހަރަކީ މާރާމާރީގެ ބޮޑެތި މައްސަލަތަކެއް ފެންމަތިވެގެން އައި އަހަރެކެވެ. ނަމަވެސް މާރާމާރީ ރިޕޯޓުކޮށްފައިވާ ޖުމްލަ ނިސްބަތް 2016 ވަނަ އަހަރާ އަޅާ ބަލާއިރު މިދިޔަ އަހަރު ދަށްވެފައިވެ އެވެ. މިދިޔަ އަހަރު 770 މާރާމާރީ ހިންގާފައިވެ އެވެ.