އެމެރިކާގެ ރިއަލިޓީ ޓީވީގެ ރާނީ ކިމް ކާޑޭޝިއަން ވެސްޓް އަދި ފިރިމީހާ ކާންޔޭ ވެސްޓްއަށް އިތުރު ކުއްޖަކު ލިބިއްޖެ އެވެ. ސަރޮގެޓް ކޮށްގެން ލިބުނު މި އަންހެން ކުއްޖާއަކީ އެ ދެމަފިރިންނަށް ލިބުނު ތިން ވަނަ ދަރިފުޅެވެ.
"މި ދަރިފުޅު ލިބުމުގެ ނަސީބު އަހަރަމެންނަށް [އެ ދެމަފިރިންނަށް] ހޯދައިދިން ފަރާތަށް އިންތިހާއަށް ޝުކުރެވެރިވަން، އަދި މި ދަރިފުޅު ހެޔޮ ހާލުގައި އޮތުމަށް ޑޮކްޓަރުންނާއި ނަރުހުން ކޮށްދެއްވި މަސައްކަތައް ވެސް ޝުކުރު އަދާ ކުރަން." ތިން ވަނަ ކުއްޖެއް ލިބުންކަން ފޭނުންނާއި ހިއްސާކުރަމުން އޭނާގެ އޮފިޝަލް އެޕް މެދުވެރިކޮށް ބުނެފައިވެ އެވެ.
މި ދެމަފިރިން ކުއްޖެއް ހޯދަން ނިންމީ، ކިމްގެ ދެވަނަ ދަރިފުޅު ސެއިންޓް ވިހަން އުޅުމުގެ ތެރޭގައި ދިމާވި މައްސަލަތަކަކާއި ގުޅިގެން ދެން އެހެން ކުއްޖެއް ހޯދަން އުޅެފިނަމަ ކިމްގެ ފުރާނައަށް ނުރައްކާ ވެދާނެ ކަމަށް ޑޮކްޓަރުން ލަފާ ދެއްވުމުންނެވެ.
އެމެރިކާގެ ސެލެބްރިޓީ ސައިޓް ޓީއެމްޒެޑް އިން ރިޕޯޓުކުރި ގޮތުގައި އެ ކުއްޖާ ވިހޭ ވަގުތު ޑެލިވަރީ ރޫމްގައި ކިމް އާއި ކާންޔޭ ވެސް ތިއްބެވެ އަދި ކުއްޖާ އުރާލުމުގެ ފުރުސަތު އެންމެ ފުރަތަމަ ދިނީވެސް ކިމް އަށެވެ.
މި ކުއްޖާއަށް ކިޔާ ނަމެއް އަދި އެ ދެމަފިރިން ބުނެފައެއް ނުވެ އެވެ.