ކުޅިވަރަށް އުމުރާނީ ހިޔާވަހި ކަމެއް ނުލިބުނު!

މަލްޓި ސްޕޯޓްސް ކޮމްޕްލެކްސްއެއް ރާއްޖޭގައި ބިނާކުރައްވާނެ ކަމަށް ސަރުކާރުގެ އެކި ފަންތީގެ ވެރިން އެކި ފޯރަމްތަކުގައި ވިދާޅުވެފައި ވެ އެވެ. ސްޕޯޓްސް ކޮމްޕްލެކްސްގެ ވާހަކައަކީ އަދި ކުޑަ ވާހަކަ އެވެ. ސަރުކާރުގެ މެނިފެނސްޓޯގައި އަދި މި އަށްވުރެ ގިނަ މަޝްރޫއުތަކުގެ ވާހަކަ އެބަހުއްޓެވެ. ކުޅިވަރުގެ ގާނުނުގެ ތެރެއިން އިންތިޒާމުވި ކުޅިވަރުގެ އާ އޮނިގަނޑުގެ މައްޗަށް ކުޅިވަރު ހިންގުމުގެ ނިޒާމު ކޮޅަށް ޖެހިއްޖެ އެވެ.

އެހެން ނަމަވެސް ކުޅިވަރުގެ އުމުރާނީ ތަރައްގީގައި ކޮޅަށް ޖެހުނު އިމާރާތެއް ނެތެވެ. މާލޭގެ މާފަނުންނު ކޮޅުގައި އެހަރަ ޒުވާނުންގެ މަރުކަޒުގެ އިންޑޯ ހޯލަކީ މިހާރުވެސް ހަތަރު ކުޅިވަރަކުން ބޭނުން ކުރަމުންދާ ހޯލެކެވެ. މެނިފެސްޓޯގެ ވައުދުތަކުގެ ގޮތުގައި އެ ކުޅިވަރުތަކަށް ވަކިވަކި އެރީނާތައް ގާއިމު ކުރެވޭނެ ކަމަށް ކަނޑައަޅާފައި ވެއެވެ. ނަމަވެސް އެއި އިމާރާތެއް ކޮޅަށް ޖެހިގެން ދާތަނެއް ނުފެނެ އެވެ.

ރަށްރަށާއި މާލޭ އޭރިއާގައި، ފުޓްސަލް ދަނޑުތައް ގާއިމު ކުރެވެ އެވެ. ރައީސުލްޖުމްހޫރިއްޔާގެ އޮފީހުން ނެރެފައިވާ، "ރަށްވެހި ތަރައްގީ" ފޮތުގައި ވާގޮތުން ސަރުކާރުން ވަނީ 70 ރަށުގައި ފުޓްސަލް ދަނޑު އަޅާފަ އެވެ. މިހާރުވެސް އިތުރު 100 ދަނޑު ހެދުމުގެ މަސައްކަތް ކުރިއަށްދާ ކަމަށާއި އަދި އަލަށް 26 ފުޓްސަލް ދަނޑު އަޅާނެ ކަމަށް ބުނެފައި ވެއެވެ. ނަމަވެސް ފުޓްސަލް ދަނޑުތަކުން ސީދާ ކުޅިވަރަށް ފައިދާ ކުރެއެކޭ ދެންނެވާކަށް ނެތެވެ. މުނިފޫހި ފިލުވާލުމުގެ ގޮތުން ކުޅެލުމަށް ފުޓްސަލް ދަނޑުތަކުގެ ބޭނުން ނުކުރެވޭ ވާހަކައެއް ނޫނެވެ.

"ފުޓްސަލް ދަނޑުތަކުގެ މަޝްރޫގެ ވާހަކަ އެކުލަވާލަން ވާހަކަ ދެއްކުނީ މިގޮތަކަށް ނޫން، ފުޓްސަލް ދަނޑަކީ ކުދިކުދި އާބަދީތަކަށް އަމާޒުކޮށްގެން ކުރަން އުޅުނު ކަމެއް، އެއީ އެރަށްރަށުގައި އިލެވެން ސައިޑް ފުޓްބޯޅަ ކުޅެވޭ ވަރަށް މީހުން ހަމަ ނުވެދާނެތީ އެރަށްރަށަށް ހާއްސަކޮށް އެކަން ކުރަން ވިސްނުން ގެންގުޅުނު ކަމެއް،" ޕީޕީއެމްގެ މެނިފެސްޓޯ އެކުލަވާލުމުގައި ހަރަކާތްތެރިވި ކުރިން ކުޅިވަރު ދާއިރާގައި މަސައްކަތް ކުރެއްވި ބޭފުޅަކުން ނަން ނުޖަހާ ގޮތަށް ވިދާޅުވި އެވެ.

"ކޮންމެ ރަށެއްގައި ފުޓްސަލް ދަނޑު ހަދާ ވާހަކަ ލިޔެފައި އޮތީމަ، އަޅުގަނޑު އޭރު ފާރިސް މައުމޫނަށްވެސް ދެންނެވި މިއޮތީ އެންމެ ރަނގަޅަކަށް ނޫނޭ، ބޮޑެތި ރަށްރަށުގައި ސީދާ ފުޓްބޯޅަ ދަނޑުތައް ތަރައްގީ ކުރުމަށް އިސްކަން ދެއްވުން މާބޮޑަށް ފައިދާ ވާނެޔޭ."

ބޮޑެތި ރަށްރަށަށް ބާލާއިރު، އެ ރަށްރަށުގައި ރަނގަޅު ފުޓްބޯޅަ ދަނޑެއް އޮތް ރަށެއް މަދެވެ. ރާއްޖޭގެ ރަށްރަށުގައި ގްރާސްރޫޓް ލެވަލްގައި ކުޅުންތެރިން އުފައްދަން މަސައްކަތް ކުރެވޭ ރަށެއް ނެތެވެ.

"ސީދާ ފުޓްބޯޅަ ދަނޑުތަކުގައި ޓާފް އަޅައި ދިނަސް އަޅުގަނޑުމެންނަށް ވަރަށް ފަސޭހަ ވާނެ،" ރަށެއްގައި އަމިއްލަ ފުޓްބޯޅަ އެކެޑެމީއެއް ހިންގާ ކުރިން ގައުމީ ޓީމަށް ކުޅުނު ކުޅުންތެރިޔަކު ބުންޏެވެ. "މާލޭގެ ކުޅިވަރު އެކުވެނީގައި މިއޮންނަ ޓާފް ދަނޑު ކަހަލަ ދަނޑެއް ރަށްރަށުގައި ހެދިޔަސް މާ ބޮޑަށް ފައިދާ ވާނެ އަނެއްކާ އަތޮޅު މުބާރާތް މުޅި ރާއްޖޭގައި ކުޅޭއިރު އެ މުބާރާތްވެސް ރަނގަޅު ދަނޑުތަކުގައި ބޭއްވުން މުހިންމު."

ރާއްޖޭގައި ފުޓްސަލް ވޯލްޑްކަޕެއް ބޭއްވުމުގެ ވާހަކަ، ކުރީގެ ޔޫތު މިނިސްޓަރު މުހައްމަދު މަލީހް ޖަމާލު ދެއްކެވި އެވެ. އޭގެފަހުން އެ މަގާމަށް ވަޑައިގެންނެވި ކުރީގެ މިނިސްޓަރު އަހްމަދު ޒުހޫރު 2016 ގެ ޖޫން މަހު، ގައުމީ ފުޓްބޯޅަ ދަނޑުގެ ވީއައިޕީ ރޫމުގައި ބޭއްވި ނޫސް ކޮންފަރެންސެއްގައި ވިދާޅުވީ ރާއްޖޭގައި ގާއިމު ކުރާ ފުޓްސަލް ދަނޑުތަކަކީ ބައިނަލްއަގްވާމީ ފެންވަރުގެ ދަނޑުތައް ކަމަށެވެ. ހަގީގަތުގައި ކުރީގެ ދެ މިނިސްޓަރުންގެ ވާހަކަވެސް ގޯހެވެ.

ފުޓްސަލް ވޯލްޑްކަޕާއި، އިންޓަނޭޝަނަލް ސްޓޭންޑަޑް ފުޓްސަލް ދަނޑުތަކުގެ ކެޓަގަރީއަށް ރާއްޖޭގައި މި އަޅާ ފުޓްސަލް ދަނޑުތައް ފެތޭނެ އެއްވެސް ސްޓޭންޑަޑެއް ނެތެވެ. ބައިނަލްއަގްވާމީ ލެވަލްގައި ފުޓްސަލް ދަނޑުތަކަކީ އިންޑޯ ކުޅިވަރެކެވެ. އިންޓަނޭޝަނަލް ފުޓްސަލް މުބާރާތް ބާއްވާނަމަ އެކަމަށް އޮތީ އެންމެ ތަނެކެވެ. ޒުވާންނުންގެ މަރުކަޒުގެ އިންޑޯ ކޯޓެވެ. ބާސެކްޓްބޯޅަ އާއި ވޮލީ އަދި ނެޓްބޯޅައިގެ އިތުރު ޓީޓީން ވެސް މިހާރު ބޭނުން ކުރަމުންދާ ހޯލެވެ.

ސަރުކާރުގެ ކުޅިވަރުގެ އުމުރާނީ ވައުދުތައް

މަތީގައި އެވާ ކަންކަން ފުރިހަމަ ކުރެވިފައި ހުރި ނަމަ، ރާއްޖޭގެ ކުޅިވަރުގެ އުމުރާނީ ތަރަގައްގީގައި މިހާރު އެ ސޯސިއޭޝަންތަކަށް ދިމާވެފައިވާ ދަތިތަކަށް ހައްލެއް ލިބިގެން ދިޔައީހެވެ. މެނިފެސްޓޯގައި މިއަހަރާ ހަމަޔަށް އެ ތަންތަން ހުޅުވުމަށް ވަނީ އަމާޒު ކަނޑައަޅާފަ އެވެ.

ހުޅުމާލޭގައި ސިންތެޓިކް ދުވާ ޓްރެކެއް ގާއިމު ކުރެވިއްޖެ އެވެ. ހުޅުމާލޭގައި ގާއިމު ކުރާ ފުޓްބޯޅަ ސްޓޭޑިއަމްގެ ވާހަކަވެސް ދެކެވުނެވެ. އޭގެ މަސައްކަތް މިދިޔަ އަހަރު ފަށާ ގޮތަށް ކުރިން އޮތީ ވާހަކަ ދެކެވިފަ އެވެ. އެއީ ގަތަރު އެހީގެ ދަށުން އިމާރާތް ކުރާ ސްޓޭޑިއަމްއެކެވެ. ރާއްޖެއިން ގަތަރާއެކު އޮތް ސިޔާސީ ގުޅުން ކަނޑާލައިފި އެވެ. އާ ސްޓޭޑިއަމްގެ މަޝްރޫއަށް ދެން ވާނެ ގޮތެއް ނޭންގެ އެވެ.

ޓީޓީއަށް މިހާރު ހާއްސަ ހޯލެއް ނެތެވެ. ހޭންޑްބޯލްއަކީވެސް އިންޑޯ ކުޅިވަރެކެވެ. ބައިނަލްއަގްވާމީ ލެވަލްގައި ވާދަ ކުރަނީ އިންޑޯ ކޯޓްގައެވެ. ގައުމީ ޓީމު އެކުލަވާލައި ޕްރެކްޓިސް ކުރަނީ އައުޓްޑޯ ވެލި ކޮޓްގައެވެ. ބާސެކްޓަށް ހާއްސަ އިންޑޯ އެރީނާގެ މަސައްކަތް ކުރުމަށް ގެޒެޓްވެސް ކުރެވުނެވެ. ނަމަވެސް އަމަލީ މަސައްކަތެއް ނުފެށުނެވެ. ކުޅިވަރު އިންފްރާސްޓްރަކްޗާގެ ވައުދުތަކުގެ ވާހަކަ ދެކެވެއެވެ. ނަމަވެސް ކުޅިވަރަށް އުމުރާނީ ހިޔާވަހި ކަމެއް ނުލިބުނެވެ.