ބޮލީވުޑްގެ ސުޕަހިޓް ފިލްމު "ނޯ އެންޓްރީ"ގެ ސީގުއެލް ފިލްމާ ބެހޭގޮތުން މިހާރު އެކި ކަހަލަ ވާހަކަތައް ދަނީ ދެކެވެމުންނެވެ.
ސަލްމާން ހާން އަދި އަނީލް ކަޕޫރު ފެނިގެންދިޔަ 2005 ވަނަ އަހަރު ނިކުތް މި ފިލްމުގެ ސީގުއްލްގެ ނަމަކީ "ނޯ އެންޓްރީ މެއި އެންޓްރީ" އެވެ. ރިޕޯޓުތައް ބުނާގޮތުން ސީގުއެލް ފިލްމުގެ ލީޑްއަކަށް ނަގާފައިވަނީ ބޮލީވުޑްގައި މިހާރު ފިޔަޖަހަމުންދާ ދެ ތަރިން ކަމުގައިވާ ރަންވީރު ސިންހު އާއި އަރުޖުން ކަޕޫރެވެ.
މި ފިލްމު ވެގެންދާނީ ރަންވީރު އަދި އަރްޖުން އެއްކޮށް ފެންނަ ދެ ވަނަ ފިލްމަށެވެ. މީގެ ކުރިން މި ދެ ތަރިން އެއްކޮށް ކުޅެފައިވަނީ ޕްރިޔަންކާ ޗޯޕްރާ އާއެކު ފެނިގެންދިޔަ ފިލްމު "ގުންޑޭ" އިންނެވެ.
ބޮނީ ކަޕޫރު އަދި އަނީސް ބަޒްމީ ޕްރޮޑިއުސް ކުރާ މި ފިލްމުގެ ލީޑު ކާސްޓު ގޮތުގައި ފުރަތަމަ ނަގަން ނިންމީ އޮރިޖިނަލް ފިލްމުގެ ލީޑުން ފެނިގެންދިޔަ ސަލްމާން އަދި އަނިލެވެ. ނަމަވެސް އެ ދެ މީހުން ޝެޑިއުލްތައް ތަން ނުދިނުމުގެ ސަބަބުން ނިންމީ އާ ދެ ތަރިންނާއެކު ފިލްމު ކުރިއަށް ގެންދާށެވެ.
އަންނަ ބުރާސްފަތި ދުވަހު ރިލީޒް ކުރަން ހަމަޖެހިފައިވާ ރަންވީރުގެ ފިލްމު "ޕަދްމާވަތް" އަށް އޭނާ ތައްޔާރުވަމުންދާއިރު، އަރުޖުން ދަނީ އޭނާގެ ކުރިއަށް އޮތް ފިލްމު "ސަންދީޕް އޯރް ޕިންކީ ފަރާރް" ގެ މަސައްކަތް ކުރަމުންނެވެ. މި ފިލްމުގައި އޭނާ ފެނިގެންދާނީ ޕަރިނީތީ ޗޯޕްރާ އާއެކު އެވެ.