ޕީއެސްޖީގެ ފޯވަޑް ނޭމާ، މި ސީޒަނަށް ފަހު ވެސް އެ ޓީމު ދޫކޮށް ނުލާނެ ކަމަށާއި އޭނާ ޕީއެސްޖީގައި ހުރީ އުފަލުން ކަމަށް ޕީއެސްޖީގެ ރައީސް ގަތަރުގެ ނާސެރް އަލް ހެލަފީ ވިދާޅުވެއްޖެ އެވެ.
މި ސީޒަން ނިމުމަށް ފަހު، ނޭމާ ރެއާލް މެޑްރިޑަށް ބަދަލުވާން ބޭނުންވާ ކަމަށް، މީޑިއާ އިން ދަނީ ވާހަކަ ދައްކަމުންނެވެ. އަދި ނޭމާ ޕީއެސްޖީގައި ހުރީ ހިތްހަމަ ޖެހިގެން ނޫން ކަމަށްވެސް ރިޕޯޓް ކޮށްފައި ވެއެވެ.
އަލް ހެލަފީ ވިދާޅުވީ، އެގޮތަށް ވާހަކަ ދައްކަނީ ޕީއެސްޖީގެ ބާރު ކަނޑުވާލުމަށް ކަމަށެވެ. ނޭމާ އާއި އޭނާގެ އާއިލާވެސް ޕީއެސްޖީއާ މެދު ހިތް ހަމަޖެހޭ ކަމަށެވެ.
"އަހަރެން ވަނީ އޭނާ [ނޭމާ] އާ ވާހަކަ ދައްކާފަ، އަދި އޭނާގެ އާއިލާއާވެސް އަހަރެން ވާހަކަ ދެއްކިން،" އޭނާ ޕެރިހުގައި ހުރީ ހިތްހަމަ ޖެހިގެން،" ގަތަރުގެ ބިލިއަނަރު ވިދާޅުވިއެވެ. "މި ސީޒަން ނިމުމަށް ފަހު އޭނާ ޓީމު ދޫކޮށް ނުލާނެ."
"އަހަންނަށް ހިވާގޮތުން ނޭމާ އަދި ކަވާނީ އާ ދެމެދު ވެސް އޮތީ ވަރަށް ރަނގަޅު ގުޅުމެއް، ނަމަވެސް ކަލޭމެން [ނޫސް ވެރިން] އަނެއްކާ ފާޑު ކިޔާ، ކަލޭމެން މަސައްކަތް ކުރަނީ އެ ދެ ކުޅުންތެރިންގެ ދެ މެދުގައި ނެތް މައްސަލައެއް ފެންމަތި ކުރަން، އެއީ ކުލަބަށް އެންމެ ރަނގަޅު ގޮތެއް ނޫން އަހަރެމެން ޖެހޭ މެޗުތަކަށް ވެސް ފޯކަސް ކުރަން."
ޗެމްޕިއަންސް ލީގްގެ ދެ ވަނަ ބުރުގައި ޕީއެސްޖީ ވާދަ ކުރާނީ ރެއާލް މެޑްރިޑާ ދެކޮޅަށެވެ. ފުރަތަމަ ލެގް މެޗު އޮންނާނީ އަންނަ މަހު 15 ވަނަ ދުވަހު އެވެ.
"އަހަރެން ވަރަށް ހިތް ހަމަޖެހޭ [ރެއާލް] މެޑްރިޑާއެކު ވަރުގަދަ މެޗެއް ކުޅެން ޖެހުމުން، އެހަރެމެން މިހާރު ސަމާލުކަން ދެނީ އެކަމަށް."
ފްރާންސް ލީގްގައި ރޭ ޕީއެސްޖީ ކުޅުނު މޮންޓެޕްލިއާ ދެކޮޅަށް ކުޅުނު މެޗު ކާމިޔާބު ކުރީ 4-0 ން ނެވެ. ނޭމާ ވަނީ ދެ ލަނޑު ކާމިޔާބު ކޮށްފަ އެވެ. އަނެއް ދެ ލަނޑު ކާމިޔަބު ކުރީ ކަވާނީ އާއި އޭންހަލް ޑީމާރިއާ އެވެ.