ސުވާލު އުފެދާ ގޮތަށް، ރެފްރީ ނިންމި ނިންމުންތަކާއެކު ފަހަތުން އަރައި ބާސެލޯނާއިން ޑިޕޯޓިވޯ އަލަވޭސްގެ މައްޗަށް 2-1 ކާމިޔާބު ހޯދައިފި އެވެ.
ބާސާގެ ޖޯޒީގައި، ފިލިޕޭ ކުޓީނިއޯ ފުރަތަމަ 11 ގައި ހިމެނިގެން ކުޅުނު ފުރަތަމަ މެޗުގައި، އޭނާ ވަނީ ރަނގަޅު ކުޅެއް ދައްކާފަ އެވެ. ނުރައްކާތެރި ބައެއް ހަމަލާތައް އަލަވޭސްގެ ގޯލަށް އޭނާ ފޮނުވާލި އެވެ.
މެޗުގައި ވަރަށް ބޮޑަށް ސުވާލު އުފެދުނު ރެފްރީގެ ދެ ނިންމުމެއް ދިޔަ އެވެ. އަލަވޭސްއިން އުފެއްދި ހަމަލާއެއް، ބާސާގެ ޕެނަލްޓީ އޭރިއާ ތެރެއިން އެ ޓީމުގެ ޑިފެންޑަރު ސެމިއުލް އުމްޓިޓީގެ އަތުގައި ޖެހުނެވެ. އަލަވޭސްއިން ޕެނަލްޓީއަކަށް އެޕީލް ކުރި ނަމަވެސް ރެފްރީ ނިންމީ ޕެނަލްޓީއެއް ނޫން ކަމަށެވެ.
މެޗުގައި، ފުރަތަމަ ލަނޑު ކާމިޔާބު ކުރީ އަލަވޭސްއިންނެވެ. މެޗުގެ 23 ވަނަ މިނެޓްގައި ކާމިޔާބު އެ ލަނޑު ކާމިޔާބު ކުރީ ސްވިޑެންގެ ސްޓައިކަރު ޖޯން ގްޑެޓީ އެވެ. އެ ލަނޑު ޖެހުމުގައި އޭނާގެ އިންޑަވިޖުއަލް ހުނަރު ވަރަށް ބޮޑަށް ބޭނުން ކޮށްފައި ވެއެވެ.
ބާސާއިން ނަތީޖާ ހަމަހަމަ ކުރީ މެޗުގެ 72 ވަނަ މިނެޓްގައި ލުއިސް ސުއަރޭޒް ކާމިޔާބު ކުރި ލަނޑުންނެވެ. އެ ލަނޑާ މެދުވެސް ސުވާލު އުފެދުނެވެ. ސުއަރޭޒް ފޮނުވާލި ބޯޅަ ގޯލް ތެރެއަށް ވަނީ، ބާސާގެ ޖެރާޑް ޕީކޭ އަތުގައި ޖެހިފަ އެވެ. ނަމަވެސް ރެފްރީ ނިންމީ ޕީކޭ އަތުގައި ބޯޅަ ޖެހުނީ އޭނާ ގަސްތުގައި ނޫން ކަމަށެވެ.
ބާސާ މެޗުން މޮޅުކޮށްދިން ލަނޑު ލިއޮނަލް މެސީ ކާމިޔާބު ކުރީ މެޗުގެ 84 ވަނަ މިނެޓްގައެވެ. އޭނާ ލަނޑު ޖެހީ އަލަވޭސްގެ ޕެނަލްޓީ އޭރިއާ ބޭރުން ލިބުނު ހިލޭ ޖެހުމެއްގައެވެ.