ނަޕޯލީގެ މަސައްކަތް މިހާރު ހުރީ އެއް ވަނަ ލެވަލްގައި ކަމަށް، އިޓަލިއަން ލީގްގައި ބޮލޯނިއާ ބަލިކޮށް ތާވަލުގެ އެއް ވަނަ މަގާމަށް އަލުން ޖެހިލި ނަޕޯލީގެ ކޯޗް މައުރީސިއޯ ސާރީ ބުނެފި އެވެ.
މެޗު ފެށިގެން 30 ވަނަ ސިކުންތުގައި ބޮލޯނިއާ އިން ވަނީ އެ ޓީމުގެ ލަނޑު ކާމިޔާބު ކޮށްފަ އެވެ. އެ ލަނޑު ކާމިޔާބު ކުރީ ރޮޑްރިގޯ ޕަލާސިއޯ އެވެ. މެޗުގެ އެހާ ކުރީ ކޮޅުގައި ބޮލޯނިއާ އިން ލީޑް ނެގި ނަމަވެސް ނަޕޯލީގެ ކުޅުންތެރިން އޯވާޓޭކް ކުރި ގޮތާމެދު ސާރީ ހުރީ ވަރަށް ބޮޑަށް ހިތްހަމަ ޖެހިފަ އެވެ.
"އެ ގޯލް ވަނުމަށް ފަހުވެސް އަހަރެމެންގެ ކުޅުންތެރިން މަސައްކަތް ކުރީ ވަރަށް ރަނގަޅަށް،" ސާރީ ބުންޏެވެ. "ކުޅުންތެރިންގެ ރިއެކްޝަން ވަރަށް ވަރުގަދަ، އާންމު ގޮތެއްގައި އަހަރެމެންގެ ޓީމުގެ ތޫނު ފިލިކަން ހުންނަން ޖެހޭ ވަރަށް ފުރަތަމަ ހާފުގައި ނެތް ނަމަވެސް ވަރަށް ރަނގަޅަށް މަސައްކަތް ކުރި."
ބޮލޯނިއާއިން ފުރަތަމަ މިނެޓްގައި ލީޑް ނެގި ނަމަވެސް އޭގެ ހަތަރު މިނެޓް ފަހުން ނަޕޯލީން ވަނީ ނަތީޖާ ހަމަހަމަ ކޮށްފަ އެވެ. އެއީ މާރިއޯ ރޫއީ ނެގި ހުރަހެއް، ބޮލީނިއާގެ އިބްރާހިމް އެމްބޭގެ ފައިގައި ޖެހިފައި ބައިކޮޅަށް ވަން ލަނޑެކެވެ. އެމްބޭ މަސައްކަތް ކުރީ އެ ބޯޅަ ދިފާއު ކުރާށެވެ. ނަމަވެސް އޭނާގެ ފައިގައި ޖެހިފައި ބޯޅަ ވަނީ ބައި ކޮޅަށެވެ.
ނަޕޯލީގެ އަނެއް ދެ ލަނޑު ކާމިޔާބު ކުރީ ޑްރައިސް މާޓަންސް އެވެ. ނަޕޯލީގެ ދެ ވަނަ ލަނޑު އޭނާ ކާމިޔާބު ކުރީ ލިބުނު ޕެނަލްޓީ އަކުންނެވެ.
"އަދަދުން ބަލާއިރު މިދިޔަ ތިން މަހު އަހަރެމެންނަށް މުޅި ޓީމު އެކުގައި ޕްރެކްޓިހެއް ނުކުރެވުނު، މިހާރު ދެހަފުތާ ކުރިން ޓީމު ދަނީ ވަރަށް ރަނގަޅަށް މަސައްކަތް ކުރަމުން މިހާރު ޓީމުގެ މަސައްކަތް ހުރީ އެންމެ މަތީ ލެވަލްގައި."
އެއް ވަނައިގައި ނަޕޯލީ އޮތް ނަމަވެސް، ޕޮއިންޓްގެ ގޮތުން އެ ޓީމާއި ދެ ވަނައިގައި އޮތް ޔުވެންޓަސްއާ ދެމެދު ހުރީ އެއްވަރަކަށެވެ. ދެ ޓީމަށް 22 ޕޮއިންޓެވެ. ސާރީ ބުނީ ނަޕޯލީއާ ޔުވެންޓަސްއާ އަޅާ ނުކިޔޭނެ ކަމަށެވެ. ޔުވެންޓަސް އަކީ ހުރިހާ ގޮތަކުން ވެސް ނަޕޯލީއަށް ވުރެ ވަރުގަދަ ޓީމެއް ކަމަށެވެ.
"އަހަރެމެން އަޅާ ނުކިޔަން ޔުވެންޓަސްއާ، ހުރިހާ ގޮތަކުން ވެސް އެ ޓީމަކީ މަތީގައި އުޅޭ ޓީމެއް، އެ ޓީމު ކުޅުނު މެޗުތަކުގެ ތެރެއިން 90 ޕަސަންޓް މެޗުތަކުން އެ ޓީމު ވަނީ މޮޅުވެފައި."