ފީލް އިންވެސްޓްމެންޓްގެ ފަރާތުން "ފީލް މޯލްޑިވްސް" ގެ ނަމުގައި ރާއްޖޭގެ ޓޫރިޒަމް ދާއިރާގެ މައުލޫމާތުތައް ހިމެނޭ މޯބައިލް އެޕްލިކެޝަން ތައާރަފް ކޮށްފި އެވެ.
ފީލް އިންވެސްޓްމެންޓްގެ ޗީފް އޮޕްރޭޓިން އޮފިސަރު ހަސަން ލަބީ މިއަދު ވިދާޅުވީ، އެ އެޕްލިކޭޝަނަކީ ޓޫރިޒަމް ދާއިރާގައި ރާއްޖޭގައި ޕްރޮމޯޓް ކުރުމަށް ނެރުނު ފުރަތަމަ އެޕްލިކޭޝަން ކަމަށެވެ. އެ މޯބައިލް އެޕް މެދުވެރިކޮށް ރާއްޖޭގެ ހުރިހާ ރިސޯޓް ތަކަކާއި ހުރިހާ ގެސްޓްހައުސްތައް އަދި ސަފާރީ ބޯޓުތަކެއް އަގޯޑާ މެދުވެރިކޮށް ބުކްކޮށްލެވޭނެ ކަމަށް ހަސަން ލަބީ ވިދާޅުވި އެވެ.
"އެޕް މެދުވެރިކޮށް ރާއްޖޭގެ ހުރިހާ ގެސްޓްހައުސް ތަކަކާއި ރިސޯޓްތަކާއި ސަފާރީ ބޯޓްތަކުގެ މައުލޫމާތު ލިބެން ހުންނާނެ، މި އެޕްްގެ އެންމެ މުހިންމު އެއް ބަޔަކީ މީގެ ޝޮޕް، އެކަމުގެ މަސައްކަތް ތައް ދަނީ ކުރިއަށް، މަހެއްހާ ދުވަހުގެ ތެރޭގައި އެއްކޮށް ނިންމައި ލައިވް ކުރެވޭނެ،" އޭނާ ވިދާޅުވި އެވެ.
އޭނާ ވިދާޅުވީ، އެޕްލިކޭޝަން މެދުވެރިކޮށް މުޅި ރާއްޖޭގެ ޓޫރިޒަމް އެއް ޕްލެޓްފޯމަކުން ފެންނާނެ ކަމަށެވެ. އަދި ވިދާޅުވީ، އެޕްލިކޭޝަންގެ މެދުވެރިކޮށް ރިޒޯޓާއި ގެސްޓް ހައުސްތައް އަދި ސަފާރީތައް ބުކް ކުރުމަށް ދިވެހިންނަށް ހާއްސަ އަގުތަކެއް ހަމަޖައްސާފައިވާ ކަމަށެވެ.
"މި އެޕްލިކޭޝަންގެ މަސައްކަތް އެއްކޮށް ނިމުމުން ދުނިޔޭގެ ކޮންމެތަނެއްގައި ހުރެފައިވެސް ރާއްޖޭގެ ޓޫރިޒަމް ދާއިރާއާ ގުޅޭ ތަންތަން ބުކް ކޮށްލެވޭނެ، އޭރުން އަގޯޑާއިން ބުކް ކުރުމަށް ވުރެވެސް އަގު ހެޔޮވާނެ، އަދި އެޕް މެދުވެރިކޮށް ބޭނުންތަނަކުން ސުވެނިޔާ ގަތުމުގެ ފުރުސަތުވެސް ލިބޭނެ،" ހަސަން ލަބީ ވިދާޅުވި އެވެ.
ފީލް މޯލްޑިވްސް އެޕްގެ މެއިން ސްޕޮންސަ އަކީ އުރީދޫ އެވެ. މި އެޕްގެ އައިއޯއެސް އާއި އެންޑްރޮއިޑް އެޕްލިކޭޝަން ޑައުންލޯޑް ކުރެވޭނެ އެވެ.