ޖީސީއީ އޯލެވެލްގައި ކުދިން ފާސްވާ ނިސްބަތް އިތުރުކުރަނީ ޓެސްޓުގައި ހަމައެކަނި މޮޅު ކުދިން ބައިވެރިކޮށްގެން ކަމަށާއި މިދިޔަ އަހަރު އޯ ލެވެލްގައި ބައިވެރިވި ކުދިންގެ 77 ޕަސެންޓް ކުދިން ފަސް މާއްދާއިން ފާސްވެފައިވާ ކަމަށް އެޑިއުކޭޝަނުން ބުނި ބުނުމަކީ ހަގީގަތް އޮޅޭގޮތަށް ބުނި ބުނުމެއް ކަމަށް އެމްޑީޕީން ތުހުމަތުކޮށްފި އެވެ.
އެމްޑީޕީން ބުނީ 77 ޕަސެންޓް ކުދިން ފަސް މާއްދާއިން ފާސްވެ، ހަތް ޕަސެންޓް ކުދިން ފޭލު ވެފައިވާކަމަށް އެޑިއުކޭޝަނުން ބުނީ ސްކޫލްތަކުގެ ތައުލީމީ ފެންވަރާ ބެހޭ ހިސާބުކިތާބު ގަޑުބަޑުކޮށް، ރައްޔިތުންނަށް އޮޅުވައިލުމުގެ ބޭނުމަށް ކަމަށެވެ.
މިދިޔަ އަހަރު ޖީސީއީ އޯލެވެލް އިމްތިހާނުގައި ބައިވެރިވި ކުދިންގެ ވަގުތީ ނަތީޖާ އެޑިއުކޭޝަން މިނިސްޓްރީން ވަނީ މިދިޔަ އާދީއްތަ ދުވަހު އިއުލާންކޮށްފަ އެވެ. އެގޮތުން މިދިޔަ އަހަރު ޖީސީއީގެ ތިން މާއްދާއިން ފާސްވި ކުދިންގެ ނިސްބަތް 93 ޕަސެންޓަށް އަރާފައިވާއިރު ފަސް މާއްދާއިން ފާސް ހޯދި ކުދިންގެ ނިސްބަތް 77 އަށް އަރާފައިވާކަމަށް އެޑިއުކޭޝަނުން ވަނީ ބުނެފަ އެވެ.
އެޑިއުކޭޝަން މިނިސްޓްރީން އެދުވަހު ހާމަކުރި ތަފާސްހިސާބާ މެދު ސުވާލު އުފައްދައި އެމްޑީޕީން މިއަދު ނެރުނު ނޫސްބަޔާނެއްގައި ބުނީ، އިމްތިހާންތަކުން ފާސް ނަތީޖާ އިތުރުކުރަން އެޑިއުކޭޝަން މިނިސްޓްރީން ގެންގުޅޭ ސިޔާސަތަކީ ގްރޭޑް ހަތަކާ ހިސާބުން މޮޅު ނޫން ކުދިން މަޖުބޫރު ނޫން މާއްދާތަކުން އިސްތިސްނާކުރަނީ ކަމަށެވެ. އަދި އެކުދިންނަށް ކޮންމެވެސް ދާއިރާއެއްގެ ތަމްރީން ހޯދަން އަންގައި އެ ތަމްރީން ހޯދާ ތަނަކުން އެކުދިންގެ ފޯމުގައި ސޮއިކޮށްފިނަމަ ފާސްވީ ކަމަށް ބަލައި އެ ކުދިން ފާސް ނަތީޖާތަކުގެ ތެރޭގައި ހިމަނަނީ ކަމަށެވެ.
"ދަރިވަރު ގްރޭޑް 7 ނިންމޭތަނުން އޭނާއަކީ ކިޔެވޭނެ ދަރިވަރެއްކަން ނުވަތަ ނުކިޔެވޭނެ ދަރިވަރެއްކަން މިނިސްޓްރީ އޮފް އެޑިޔުކޭޝަނާއި ސްކޫލްތަކުން ކަނޑައަޅައެވެ. ނުކިޔެވޭނެ ކަމަށް ބައްލަވާދަރިވަރުން ކިޔަވަން ޖެހެނީ ހަމައެކަނި މަޖުބޫރު ހަތަރު މާއްދާއެވެ. އެއާއެކު ކޮންމެވެސް ދާއިރާއަކު ތަމްރީނެކެވެ. އެ ދަރިވަރުން މި ތަމްރީނުން ފާސްވެއްޖެނަމަ ބައްލަވަނީ އޯ ލެވެލްގެ 4 މާއްދާއިން އޭނާ ފާސްވީ ކަމަށެވެ. ނުކިޔެވޭނެކަމަށް މިނިސްޓްރީ އޮފް އެޑިޔުކޭޝަނާއި ސްކޫލުން ކަނޑައެޅުއްވި ދަރިވަރުން، ސްކޫލުގެ މޮޅު ދަރިވަރުންގެ ތެރޭގައި ގުނައިލެވުނީއެވެ،" އެމްޑީޕީގެ ބަޔާނުގައި ބުނެފައިވެ އެވެ.
އެ ބަޔާނުގައި ބުނީ، ގްރޭޑް ނުވައެއްގެ ފަހު ޓާމް ނަތީޖާއަށް ބެލުމަށްފަހު ދަށް މާކްސް ލިބޭ ކުދިން ދަސްވާރު ޕްރޮގްރާމަށް "މަޖުބޫރުން" ބަދަލުކުރާ ކަމަށެވެ. ނަމަވެސް އެތައް ހަރުފަތެއްގައި އެތައް ގޮތަކަށް ފުރާނާލައިގެން ބައެއް ކުދިންނަށް އިމްތިހާނުގައި އެއްގޮތަކަށް ވެސް ބައިވެރި ނުވެވޭނެ ގޮތް ހަދައި، ފާސްވާނެކަމަށް މިނިސްޓްރީއަށް ފެންނަ ދައިވަރުން ވަކި މާއްދާތަކެއްގައި ބައިވެރިކުރައްވައިގެން ނަތީޖާ މަތިކަމަށް ދެއްކުނަސް އެއީ އެކަން ކުރެވޭނެ ގޮތެއް ކަމަށް އެ ޕާޓީން ނުދެކޭ ކަމަށެވެ.
"ދަސްވާރު ޕްރޮގްރާމުގައި ބައިވެރިވާ ކުދިން ކިޔަވާ ވަގުތުގެ ބައެއް ހޭދަކުރަން ޖެހެނީ ރެސްޓޯރެންޓެއް، ފާމަސީއެއް، ނުވަތަ ގެސްޓުހައުސް އެއް ފަދަ ސްކޫލުން ބޭރު ކޮންމެވެސް ތަނެއްގައެވެ. އެ ތަންތަނަކީ މުގައްރަރެއް އޮވެގެން މާ ބޮޑު ބެލުންތެރިކަމެއް އޮވެގެން ޕްރޮގްރާމް ކުރިޔަށް ގެންދާ ތަންތަނެއް ވެސް ނޫނެވެ. އެހެން ނަމަވެސް، އެ ދަރިވަރަކު ކުރަންޖެހޭ ކަމެއް ކުރަން އެނގޭކަމަށް ބުނެ ފުރަންޖެހޭ ފޯމެއް އެތަނަކުން ފުރައިފިނަމަ ބައްލަވަނީ އެ ދަރިވަރު ޖީސީއީއޯ ލެވެލްގެ ތިން މާއްދާއަކުން ފާސް ވީ ކަމަށެވެ. އެކަމަކު އެއީ ތައުލީމުގެ ހަގީގީ ފެންވަރުކަމަށް ބެލެވޭނެ ގޮތެއް އޮތްނާނެ ކަމަކަށް މި ޕާޓީއަކުން ނުދެކެމެވެ،" ބަޔާނުގައި ބުންޏެވެ.
ކުދިންގެ ކިޔެވުމުގެ ކަންކަން އެހެން ގެންދާނަމަ ފުރިހަމަ ތައުލީމު ނުލިބި ނިމޭ ކުދިން ގިނަވެ ކުށްތަކަށް އަރައިގަންނަ ކުދިންވެސް އިތުރުވަމުންދާނެ ކަމަށް ދެކޭ ކަމަށް ވެސް އެޕާޓީގެ ބަޔާނުގައި ބުންޏެވެ.
އެމްޑީޕީން މިހެން ބުނެފައިވާއިރު ކުދިންގެ ތައުލީމަށް އަންނަ ކުރިއެރުމާ ދޭތެރޭ ހަގީގަތާ ހިލާފު ވާހަކަ ނުފެތުރުމަށް މިނިސްޓަރު އާއިޝަތު ޝިހާމް ވަނީ އިލްތިމާސްކުރައްވާފަ އެވެ. އެކަމަނާ ވިދާޅުވީ، ތައުލީމީ ދާއިރާ އަދި އެހެނިހެންވެސް ރައްޔިތުންނަށް ހިދުމަތްދޭ ޓެކްނިކަލް ދާއިރާތަކުގައި ޑޭޓާ އެނަލައިޒްކުރުމަކީ ވަކި ސަރުކާރެއް އައިސްގެން ސިޔާސީ ގޮތަކުން ބަދަލުވާއެއްޗިސްތަކެއް ނޫން ކަމަށެވެ. އެ މިނިސްޓްރީން މިހާރުވެސް ޑޭޓާ އެނަލައިޒްކުރަން ބޭނުންކުރާ މިންގަނޑުތަކަކީ މީގެ ކުރީގެ ސަރުކާރުތަކުން ވެސް ބޭނުންކުރި ސްޓެންޑަޑްތައް ކަމަށެވެ.
"ވަރަށް ތަފާތު ވާހަކަ ދެކެވޭ ކުދިންގެ ނަތީޖާ ރަނގަޅުވެއޭ ބުނީމާ. މާކްސް މަތިވާން ދިމާވީ ޕޭޕަރު ފަސޭހަވުމުން ބާއޭ، ނޫނީ އިނގިރޭސިވިލާތު ތަފާތީބާއޭ، މިކަހަލަ ބައިވަރު ވާހަކަތަކެއް ދެކެވޭ. މީކީ ވަކި ސަރުކާރެއް އައިސްގެން ސިޔާސީ ގޮތުން އަންނަ ބަދަލުތަކެއް ނޫން. އެހެންވީމަ މިހާރު އަޅުގަނޑުމެން މި ދަންނަވާ ޑޭޓާ އަކީ އެއީ މި ހަތަރު އަހަރު އަޅުގަނޑުމެން ވަކި ގޮތަކަށް ހަދައިން ތައްޔާރުކޮށްގެން ގެންގުޅޭ އެސެސްމަންޓްތަކެއް ނޫން. މިއީ ކުރީ ސަރުކާރުތައް މިތާ ތިއްބެވި އިރުވެސް އަދި ދެން އަންނަ ބައެއް ވެސް މީގަ އޮންނާނީ ގެންގުޅޭ ސްޓެންޑަޑްތަކެއް އެއްޗެހި އެނަލައިޒް ކުރަން،" އެކަމަނާ ވިދާޅުވި އެވެ.
އެހެންކަމުން ތައުލީމީ ދާއިރާއާ ގުޅުވައިގެން "ހީވާ ވާހަކަތައް" ނުދައްކަން މިނިސްޓަރު ވަނީ އިލްތިމާސްކުރައްވާފަ އެވެ.
"ވަރަށް ސާފުކޮށް ހަމަ ބުންލަން ބޭނުން، މިފަދަ ކަންކަމުގައި ހީފުޅުވާ ވާހަކަތައް ދެއްކުމަކީ ވަރަށް ގިނަ ބައެއްގެ މަސްލަހަތު (ދަރިވަރުންގެ) އޭގައި އޮންނަ ކަމަކަށް ވާތީ އޭގެ ސަބަބުން ނުބައި އަސަރުތަކެއް ނުކުންނާނެ ވާހަކަތަކެއް. ހަމަ އެމްޑީޕީ ވެރިކަމުގަ ތިއްބެވި ބޭފުޅުން ވެސް ގެންގުޅުނު ސްޓެންޑާޑް ތައް މިހާރުވެސް ގެންގުޅޭނީ. ވަކި ތަފާތު ވެގެންނެއް ނޫޅޭ އެއްވެސް ކަމެއް. ތަފާތުވެގެން އުޅޭކަމަކީ ކުދިންނަށް ދެވޭ ހިދުމަތުގެ ފެންވަރު ރަނގަޅުވުން،" މިނިސްޓަރު އާއިޝަތު ޝިހާމް ވިދާޅުވި އެވެ.