މެންޗެސްޓާ ޔުނައިޓަޑާއި ޗެލްސީ ކުޅުނު މެޗުތަކުން ބަލިވި އިރު، އެއް ވަނައިގައި އޮތް މެންޗެސްޓާ ސިޓީ ކުޅުނު މެޗު ކާމިޔާބު ކޮށް ލީޑް ފުޅާ ކޮށްފި އެވެ.
ޗެލްސީ އަމިއްލަ ދަނޑުގައި ބޯންމައުތު އަތުން ބަލިވީ، 3-0 ނެވެ. މެޗު ފެށިގެން 11 ވަނަ ސިކުންތުގައި ކްރިސްޓިއަން އެރިކްސަން ކާމިޔާބު ކުރި ލަނޑާއެކު ޓޮޓެންހަމް ހޮސްޕާއިން ޔުނައިޓަޑް ބަލި ކުރީ 2-0 ންނެވެ.
ވެސްޓްބްރޮމޮވިޗްއާ ދެކޮޅަށް 3-0 ން މެޗު ކާމިޔާބު ކޮށް މެންޗެސްޓާ ސިޓީ ވަނީ 15 ޕޮއިންޓްގެ ލީޑެއް ނަގާފަ އެވެ.
އަމިއްލަ ދަނޑު އިއްތިހާދު ސްޓޭޑިއަމްގައި ކުޅުނު މެޗުގައި، ސިޓީގެ ލަނޑުތައް ކާމިޔާބު ކުރީ، ފެނާންޑީނިއޯ، ކެވިން ޑިބްރޭނޭ އަދި ސާޖިއޯ ކުން އަގުއޭރޯ އެވެ.
ޔުނައިޓަޑް ކޮޅަށް ޓޮޓެންހަމްއިން ޖެހި ދެ ވަނަ ލަނޑަކީ ފިލް ޖޯންސް އަތުން ބައިކޮޅަށް ވަން ލަނޑެކެވެ. ޓޮޓެންހަމްގެ ޓްރިޕިއާ، ޕެނަލްޓީ އޭރިއާ ތެރެއަށް ހުރަސް ކުރި ބޯޅަ، ޖޯންސް މަސައްކަތް ކުރީ އެ ބޯޅަ ކޯނަރަކަށް ބޭރު ކޮށްލާށެވެ. ނަމަވެސް އެ ބޯޅަ ވަނީ އަމިއްލަ ގޯލަށެވެ.
ޗެލްސީގެ ސްޓެމްފޯޑް ބްރިޖްގައި، ކުޅުނު މެޗުގައި، ބޯންމައުތުގެ ތިން ލަނޑުވެސް ކާމިޔާބު ކުރީ މެޗުގެ ދެ ވަނަ ހާފުގައެވެ. ފުރަތަމަ ލަނޑު 51 ވަނަ މިނެޓްގައި ކާމިޔާބު ކުރީ ކެލަމް ވިލްސަން އެވެ. ދެ ވަނަ ލަނޑު 64 ވަނަ މިނެޓްގައި ކާމިޔާބު ކުރީ ޖޫނިއާ ސްޓޭނިސްލާސް އެވެ. އޭގެ ދެ ވަނަ މިނެޓް ފަހުން ޗެލްސީ ކޮޅަށް ލަނޑު ޖެހީ މިދިޔަ ހޫނު މޫސުމުގެ ޓްރާންފާ ޕީރިއާޑާ ހަމަޔަށް ޗެލްސީގެ ކޮންޓްރެކްޓްގައި ހުރި ނަތަން އަކޭ އެވެ.