މި ސީޒަނުގެ ޕްރިމިއާ ލީގު ޗެމްޕިއަން އަކީ ވާދަވެރި ކްލަބް މެންޗެސްޓާ ސިޓީ ކަމަށާއި މިއަންނަ ސީޒަނުގައި ޔުނައިޓެޑުގެ ކުޅުންތެރިން ކުޅުން ވަރުގަދަކޮށް ސިޓީއަށް ވަރުގަދަ ފައިޓެއް ދޭން ޖެހޭ ކަމަށް މެންޗެސްޓާ ޔުނައިޓެޑުގެ ކޯޗް މޮރީނިއޯ ބުނެފި އެވެ.
ހަޑަލްސްފީލްޑް ޓައުން އާއި ދެކޮޅަށް ވާދަކުރާ މެޗުގެ ކުރިން ވާހަކަ ދައްކަމުން މޮރީނިއޯ ބުނީ އޭނާގެ ޓީމު މިހާރު މަސައްކަތް ކުރަނީ ދެ ވަނަ މަގާމުގައި ސީޒަން ނިންމާލަން ކަމަށެވެ. ލީގުގައި ބާކީ 13 މެޗު އޮތްއިރު ޔުނައިޓެޑާއި ސިޓީ އާއި ދެމެދު 15 ޕޮއިންޓުގެ ފަރަގެއް އެބަ އޮތެވެ.
މޮރީނިއޯ ބޭނުން ވަނީ 2006 ވަނަ އަހަރު ޔުނައިޓެޑުގެ ކުޅުންތެރިން ދެއްކި ފަދަ ކުޅުމެއް އޭނާގެ ކުޅުންތެރިން މިއަންނަ ސީޒަނުގައި ދެއްކުމަށެވެ. އެ އަހަރު ޔުނައިޓެޑު ވަނީ ތިން މުބާރާތް ކާމިޔާބުކޮށްފަ އެވެ.
މިއަންނަ ސީޒަނަށް ޓީމު ވަރަށް ބޮޑަށް ރަނގަޅު ކުރަން ޖެހޭ ކަމަށް ބުނަމުން މޮރީނިއޯ ބުނީ ސިޓީ މި ސީޒަނުގައި މާބޮޑަށް ވެސް ވަރުގަދަ ކަމަށެވެ.
ޓީމަށް ދިމާވެފައިވާ އަނިޔާތަކުގެ މައްސަލަތަކާ ބެހޭ ގޮތުން ވާހަކަ ދައްކަމުން މޮރީނިއޯ ބުނީ ޑިފެންޑަރު އެރިކް ބެއީ އަދި އިބްރަހިމްއޮވިޗް އަންނަ މަހުގެ ތެރޭގައި އަލުން ކުޅުމުގެ ތެރެއަށް އަންނާނެ ކަމަށެވެ. އެންމެ ފަހުން ޓޮޓެންހަމް އާއި ވާދަކުރި މެޗުގައި ބަދަލު ކުޅުންތެރިއެއްގެ ގޮތުގައި ކުޅެން ނިކުމެ ހަތް މިނިޓު ތެރޭގައި އަނިޔާވި މަރުއާން ފެލޭނީ ކަކުލަށް ލިބިފަިވާ އަނިޔާގެ ސަބަބުން އޭނާ ކަކުލުގެ އޮޕަރޭޝަނެއް ކުރަން ޖެހިދާނެ ކަމަށްވެސް މޮރީނިއޯ ވަނީ ބުނެފަ އެވެ.
މެންޗެސްޓާ ޔުނައިޓެޑުގެ ކޯޗް މޮރީނިއޯ ހުކުރު ދުވަހު ބޭއްވި ޕްރެސް ކޮންފަރެންސްގައި ވާހަކަ ދައްކަނީ --- ފޮޓޯ: މެންޗެސްޓާ ޔުނައިޓެޑް