ލިއްލެ އާ ދެކޮޅަށް ޕީއެސްޖީ ކުޅުނު މެޗުގައި ހިލޭ ޖެހުމަކުން ނޭމާ ކާމިޔާބު ކުރި ހިތްގައިމު ލަނޑުން ޕީއެސްޖީއަށް މުހިންމު މޮޅެއް ހޯދައި ދީފި އެވެ. މެޗު ޕީއެސްޖީ ކާމިޔާބު ކުރީ 3-0 ން ނެވެ.
ނޭމާ ލަނޑު ޖެހީ މެޗުގެ 77 ވަނަ މިނެޓްގަ އެވެ. ޕެނަލްޓީ އޭރިއާ ބޭރުން، ޑީ އޭރިއާ ތެރެއިން ލިބުނު ހިލޭ ޖެހުން ނޭމާ ފޮނުވާލީ ބޯޅައަށް ހުރަސް އަޅަން ތިބި ލިއްލެގެ ކުޅުންތެރިން ބޯމަތިންނެވެ. އަދި އެ ޓީމުގެ ކީޕަރު މައިކް މިނިއޮން ހުރި ދިމާލަށް ބޯޅަ ފޮނުވަލިއިރު އެ ބޯޅަ ގޯލް ތެރެއަށް ވަނީ ދަނޑީގައި ޖެހިފަ އެވެ. އޭގެ އިރުކޮޅެއް ކުރިން އޭރިއާ ބޭރުން ލިބުނު ހިލޭޖެހުން ނޭމާ އަށް ކާމިޔާބުވާ ގޮތެއް ނުވި އެވެ.
ނޭމާ ލަނޑު ޖެހުމަށް ފަހު އޭނާ ވަނީ ޑެނީ އަލްވޭސް އާއި އެޑިންސަން ކަވާނީއާއެކު ވަރަށް ބޮޑަށް އުފާ ފާޅު ކޮށްފަ އެވެ. އެ ލަނޑަކީ ނޭމާގެ ކެރިއަރުގައި އޭނާ ޖެހި 350 ވަނަ ލަނޑެވެ.
ޕީއެސްޖީގެ ފުރަތަމަ ލަނޑު ފުރަތަމަ ހާފުގެ އެންމެ ފަހު ކޮޅުގައި ކާމިޔާބު ޔޫރީ ބަރުޗީޗީ އެވެ. އެ ޓީމުގެ އަނެއް ލަނޑު ކާމިޔާބު ކުރީ ގޮވިއާނީ ލަ ސެލްސޯ އެވެ.
ޕީއެސްޖީ އެއް ވަނައިގައި ލީޑް ދަމަހައްޓަމުން ދަނީ 11 ޕޮއިންޓްގެ ބޮޑު ލީޑެއްގަ އެވެ. ޕީއެސްޖީއަށް 62 ޕޮއިންޓެވެ. ދެ ވަނައިގައި އޮތީ އޮލިމްޕިކް މާސެލޭ އެވެ. އެ ޓީމަށް 51 ޕޮއިންޓެވެ.