ރެއާލް މެޑްރިޑާއި އޭސީ މިލާނަށް ކުޅުނު ހޮލެންޑްގެ ކުރީގެ ތަރި ކްލަރެންސް ސީޑޯފް، ސްޕެއިންގެ ޑިޕޯޓިވޯ ލަކަރޫނިއާގެ ކޯޗަކަށް ހަމަޖައްސައިފި އެވެ.
އިންޓަ މިލާނަށްވެސް ކުޅުނު މިޑްފީލްޑަރަކީ، އޭނާގެ ދުވަސް ވަރުގައި އެންމެ މޮޅު މިޑްފީލްޑަރެވެ. އޭނާއަކީ މި ސީޒަންގައި، ޑިޕޯޓިވޯއާ ހަވާލުވާ ތިން ވަނަ ކޯޗެވެ. މި ސީޒަންގައި އެ ޓީމުގެ ކޯޗަކަށް އެންމެ ފުރަތަމަ ހުރީ ޕެޕޭ މެލް އެވެ. އޭނާ ވަކިކޮށް ކޯޗުކަން ހަވާލު ކުރީ ކްރިސްޓަބަލް ޕަރޭލޯއާ އެވެ. އޭނާ ވަކި ކޮށް މިހާރު މަގާމު ހަވާލުވީ ސީޑޯފް އެވެ.
ސީޑޯފް އަކީ ކުޅުންތެރިޔެއްގެ ގޮތުގައި ތަޖުރިބާ ބޮޑު ކުޅުންތެރިޔެކެވެ. އޭނާ ވަނީ ޗެމްޕިއަންސް ލީގް ހަތަރު ފަހަރަށް ހޯދާފަ އެވެ. އޭނާގެ ކޯޗިން ކެރިއާ އެންމެ ފުރަތަމަ ފެށީ އޭނާ އެންމެ ގިނަ ދުވަހު ކުޅުނު އޭސީ މިލާނުންނެވެ. އެންމެ ފަހުން އޭނާ ހުރީ ޗައިނާގެ ޝެންޒެން އެފްސީގެ ކޯޗަކަށެވެ. ކުޅުންތެރިޔެއްގެ ގޮތުގައި ކާމިޔާބު ހޯދައިފައިވީ ނަމަވެސް އޭނާ އަށް ކޯޗިންގައި އަދި ކާމިޔާބެއް ނުލިބެ އެވެ.
ޑިޕޯޓިވޯ މިހާރު އޮތީ، ސްޕެނިޝް ލީގްގެ ރެލިގޭޝަން ޒޯންގައެވެ. ލީގް ތާވަލުގެ 18 ވަނައިގަ އެވެ.