އޭނާގެ މަސައްކަތް ރަނގަޅު ނޫންނަމަ ޗެލްސީގެ މެނޭޖްމެންޓުން އެހެން ގޮތެއް ނިންމަންޖެހޭ ކަމަށް އެ ޓީމުގެ ކޯޗް އެންޓޯނިއޯ ކޮންޓޭ ބުނެފި އެވެ.
ރޭގެ ވަޓްފޯޑް އަތުން 4-1 ބަލިވި މެޗަށް ފަހު ވާހަކަ ދައްކަމުން ކޮންޓޭ ބުނީ އޭނާ ޗެލްސީގައި ހުރީ މަސައްކަތް ކޮށްގެން ކުރިއަށް ދިއުމަށް ކަމަށާއި އޭނާގެ މުޅި ނަފުސު އެ މަސައްކަތުގައި ބައިވެރި ކުރަމުން ދާ ކަމަށެވެ. އަދި އޭނާއަށް އެއްވެސް ޕްރެޝަރެއް ނާންނަ ކަމަށް ޗެލްސީއާއެކު އޭނާގެ ފުރަތަމަ ސީޒަންގައި ލީގް ޗެމްޕިއަންކަން ހޯދި ކޮންޓޭ ބުންޏެވެ.
"އަހަރެންގެ މަސައްކަތް ފުދޭނަމަ ހަމަ އޯކޭ'،" މެޗަށް ފަހު ވާހަކަ ދައްކަމުން ކޮންޓޭ ބުންޏެވެ. "އެހެން ނޫން ނަމަ ކުލަބުން ޖެހޭނެ އެހެން ގޮތެއް ނިންމަން."
ރޭ ގެ މެޗަކީ އެންމެ ފަހުގެ ޗެމްޕިއަން ޗެލްސީ ޖެހިޖެހިގެން ބަލިވި ދެ ވަނަ މެޗެ. މެޗުގެ ބޮޑުބައެއް އެ ޓީމުން ކުޅުނީ އެއް ކުޅުންތެރިޔަކު މަދު ކޮށެވެ. އެއީ މެޗުގެ 30 ވަނަ މިނެޓްގައި އެ ޓީމުގެ ކޯޗް ބަކަޔޯކާއަށް ރަތް ކާޑު ދެއްކުމުންނެވެ.
އަމިއްލަ ދަނޑުގައި ކުޅުނު މެޗުގައި ފުރަތަމަ ލީޑް ނެގީވެސް ވަޓްފޯޑުންނެވެ. މެޗުގެ 41 ވަނަ މިނެޓްގައި އެ ޓީމުގެ ލަނޑު ލިބުނު ޕެނަލްޓީ އަކުން ކާމިޔާބު ކުރީ ޓްރޮއީ ޑީނޭ އެވެ. މެޗުގެ 82 ވަނަ މިނެޓްގައި އެޑެން ހަޒާޑް ލަނޑު ޖަހައި ޗެލްސީއަށް ނަތީޖާ ހަމަހަމަ ކޮށް ދިނެވެ. ނަމަވެސް އޭގެ ދެ މިނެޓް ފަހުން ޑަރޭލް ބަރައިތްވޭޓް ވަނީ ވަޓްފޯޑްއަށް އަލުން ލީޑް ނަގައިދީފަ އެވެ. އެ ޓީމު ނަތީޖާ އިތުރަށް ފުޅާ ކުރީ މެޗުގެ އެންމެ ފަހު ފަސް މިނެޓް ތެރޭގައެވެ. އަނެއް ދެ ލަނޑު ކާމިޔާބު ކުރީ ލޯން އުސޫލުން ބާސެލޯނާ ދޫކޮށް ވަޓްފޯޑަށް ބަދަލުވި ޖެރާޑް ޑެލޭފެއު އާއި ރޮބާޓޯ ޕެރެއިރާ އެވެ.
ކޮންޓޭ ބުނީ މުޅި ޓީމުން މަސައްކަތް ކުރި ކަަމަށާއި ނަމަވެސް ރޭގެ މެޗުގައި ކާމިޔާބު ނުލިބުނީ ކަމަށެވެ. ކޮންޓޭގެ ކޮންޓްރެކްޓް ހަމަވާން ބާކީ އޮތީ 18 މަހެވެ.
"މި ހާލަތުގައި ގޯސް ހެދޭނީ ކޯޗަށް ކަންނޭންގެ، ފަހަރެއްގައި އަހަންނަށް ނެރެވުނީ އެންމެ ރަނގަޅު ފުރަތަމަ 11 ނޫން ކަމަށް ވެދާނެ،" ކޮންޓޭ ބުންޏެވެ. "މެޗު ފަށާފައި އެކަމާ މެދު ސުވާލު އުފެދި މެޗު ތެރޭގައި އުނދަގޫ ވާނެ ހާލަތު ބަދަލު ކުރަން، ފަހުން އެކަން އެނގޭނީ."