ބަންދުކުރާ މީހުން 24 ގަނޑިއިރު ތެރޭގައި ކޯޓަށް ހާޒިރުކޮށް އޭނާގެ ބަންދުގެ މުއްދަތާ މެދު ގޮތެއް ނިންމަން ޖެހޭނެ ކަމަށް ގާނޫނު އަސާސީގައި ބުނާ މާއްދާ އާއި ތަހުގީގުގައި ހަނުހުރުމުގެ ހައްގު ލިބިދޭ މާއްދާ، ކުއްލި ހާލަތުގެ ދަށުން ރައީސް އަބްދުﷲ ޔާމީން ހިފަހައްޓަވައިފި އެވެ.
ސްޓޭޓް އޮފް އެމެޖެންސީ ނެރުމަށް އާންމުކުރި ގަރާރު އިސްލާހެއްގެ ގޮތުގައި މިއަދު ގެޒެޓްކުރި ގަރާރުގައި ބުނެފައި ވަނީ ގާނޫނު އަސާސީގެ 48 ވަނަ މާއްދާ، "ހައްޔަރު ކުރެވޭ މީހުންނާއި" ބަންދު ކުރެވޭ މީހުންގެ ހައްގުތަކުގެ މާއްދާގެ ހ އާއި ނ އަދި ރ ހިފަހައްޓާފައިވާ ކަމަށެވެ.
ގާނޫނު އަސާސީގެ މާއްދާ ހ ގައި ބުނެފައި ވަނީ، އެމީހަކު ހައްޔަރު ކުރެވުނު ސަބަބު، ވަގުތުން އެ މީހަކަށް އަންގަން ވާނެ އެވެ. އަދި 24 ގަނޑިއިރު ތެރޭގައި ލިޔުމަކުން އެ މީހަކަށް ދޭންވާނެ އެވެ. އަދި ނ ގައި ބުނެފައި ވަނީ، ތަހުގީގު މަރުހަލާގައި ތިމާއަކީ ކާކުކަން ބުނުން ފިޔަވާ އެހެން އެއްވެސް މައުލޫމާތެއް ނުދީ ހަނުހުރުމުގެ ހައްގު ލިބިގެންވާ ކަމަށެވެ. އަދި ރ ގައި ބުނެފައި ވަނީ މީހަކު ހައްޔަރު ކުރުމަށް ފަހު 24 ގަނޑިއިރުގެ ތެރޭގައި އެ މީހެއްގެ ބަންދާ މެދު ގޮތެއް ނިންމަން ފަނޑިޔާރެއްގެ ކުރިމައްޗަށް ހާޒިރު ކުރަންވާނެ ކަމަށެވެ.
ކުއްލި ނުރައްކަލުގެ ހާލަތު އިއުލާން ކުރުމަށް ފަހު، ސިފައިން ވަނީ ރަޔަޓް ގިޔަރުގައި ސްޕްރީމް ކޯޓަށް ވަދެ އެތަން ބަލައި ފާސްކޮށް ކޯޓް ތެރޭގައި ތިއްބަވަނިކޮށް އުއްތަމަ ފަނޑިޔާރާއި އެ ކޯޓްގެ ފަނޑިޔާރު އަލީ ހަމީދު ހައްޔަރުކޮށްފަ އެވެ. އަދި ކުރީގެ ރައީސް މައުމޫން އާއި ދަރިކަނބަލުން ޔުމްނާގެ ފިރިކަލުން ނަދީމް ވެސް ވަނީ މައުމޫންއާ އެކު ރޭ ހައްޔަރުކޮށްފަ އެވެ. އެހެން ކަމުން މި ހަތަރު ބޭފުޅުންނަށް މި ހައްގުތައް އުނިވެގެން ދާނެ އެވެ.
ޝަރުއީ ދާއިރާ ހުއްޓުމަކަށް އަންނާނެ ގޮތަށް ރައީސް ރޭ އިއުލާން ކުރެއްވި ސްޓޭޓް އޮފް އެމެޖެންސީގެ ދަށުން ސުޕްރީމް ކޯޓާއި އެކޯޓްގެ ފަނޑިޔާރުންގެ އިމްތިޔާޒުތަކާއި ބާރުތައް އަދި ކުރީގެ ރައީސުންގެ އިމްތިޔާޒުތައް ވެސް ވަނީ ނިގުޅައިގެންފަ އެވެ. އަދި ޖިނާއީ އިޖުރާއަތުގެ ގާނޫނޫ ވެސް ވަނީ ހިފަހައްޓައިފަ އެވެ. އަދި ކޯޓް އަމުރެއް ނެތި މީހުން ހައްޔަރު ކުރުމާއި ކޯޓް އަމުރެއް ނެތި ތަންތަނަށް ވަދެ، ބަލައި ފާސްނުކުރެވޭ ގޮތަށް ހުރި ގާނޫނު އަސާސީގެ މާއްދާތައް ވެސް ރައީސް ވަނީ ހިފަހައްޓަވައިފަ އެވެ. ސްޓޭޓް އޮފް އެމެޖެންސީ އިއުލާން ކުރީ 15 ދުވަހުގެ މުއްދަތަށެވެ. އެހެން ކަމުން 14 ދުވަހުގެ ތެރޭގައި އެ މައްސަލަ މަޖިލީހަށް ހުށަހަޅަން ޖެހެ އެވެ.