ރެއާލް މެޑްރިޑްގެ ޓްރާންސްފާއާ ގުޅުވައި ވާހަކަ ދެކެވޭ ޗެލްސީގެ ގޯލްކީޕަރު ތިބޯ ކޯޓްއާ އޭނާއާ ގުޅުވައި ދެކެވޭ ވާހަކަތަކަށް އިތުރު ބާރެއް ދީފި އެވެ.
އޭނާގެ އަމިއްލަ ގައުމު ބެލްޖިއަމްގެ މަޖައްލާއަކަށް ދިން އިންޓަވިއުގައި ކޯޓްއާ ބުނީ އޭނާގެ "ހިތް ވަނީ މެޑްރިޑް" ގައި ކަމަށެވެ. އޭނާ އެ އިޝާރާތް ކުރީ ސްޕެއިންގެ ވެރިރަށް މެޑްރިޑްގައި ދިރިއުޅޭ އޭނާގެ އަންހެނުންނާއި ދެ ދަރިންނަށެވެ.
"އަހަރެންގެ އަމިއްލަ ހާލަތު ގޮސް ގުޅެނީ މެޑްރިޑް ސިޓީއާ،" ޗެލްސީގެ ލޯން އެއްބަސްވުމުގެ ދަށުން އެތުލެޓިކޯ މެޑްރިޑަށް ކުޅުނު ކޯޓްއާ ބުންޏެވެ. "އަހަރެންގެ ދެ ދަރިން އެ ކުދިންގެ މަންމައާ އެކު ދިރިއުޅެނީ އެތާންގައި."
ކޯޓްއާ ވަނީ ރެއާލް މެޑްރިޑާ މެދު އޭނާގެ އޮތް ޝައުގުވެރިކަން ފާޅު ކޮށްފަ އެވެ.
"ރެއާލުން އަހަންނާމެދު ހަގީގަތުގައި ވެސް ޝައުގުވެރި ވާނަމަ، އަހަރެންގެ އަމިއްލަ ދިރިއުޅުން އެކަމަށް ވަރަށް ބޮޑު ނުފޫޒަކަށް ވާނެ."
ނަމަވެސް އޭނާ ބުނީ ޗެލްސީއާ އެކު އާ ކޮންޓްރެކްޓަކަށް ދިއުމަށް މިހާރު ވާހަކަ ދައްކަމުން އަންނަ ކަމަށެވެ. ޗެލްސީއާއެކު ކޯޓްއާގެ ކޮންޓްރެކްޓް އަންނަ އަހަރުގެ ނިޔަލަށް އެބައޮތެވެ.