އަންނަ މަހު ސަރުކާރު މުވައްޒަފުންނަށް މުސާރަ ލިބޭއިރު ބޮޑު މުސާރަ ލިބޭނެ އެވެ. ސުވާލަކީ މުސާރަ ބޮޑު ވާނީ ކިހާވަރެއް ހެއްޔެވެ؟ ސަރުކާރުން "ސިވިލް ސާވަންޓުން" ގެ މުސާރަ ބޮޑުކުރަން ނިންމާފައިވަނީ މުވައްޒަފުން އެކި ކެޓަގަރީތަކަށް ބަހާލައިގެނެވެ.
މި ބައިތަކުގައި ސިވިލް ސާވިސްގެ ޓެކްނިކަލް މަސައްކަތް ކުރާ މުވައްޒަފުންނާއި އެ މަސައްކަތަށް އެހީތެރިކަންދޭ އިދާރީ މުވައްޒަފުންނާއި ސަޕޯޓް ސާވިސް މުވައްޒަފުން ހިމެނެ އެވެ.
މުސާރަ އަށް ގެންނަ މި ބަދަލާއެކު އެންމެ އާދައިގެ މުވައްޒަފުންގެ މުސާރަ 700ރ. ބޮޑުވާނެ އެވެ. ސަރުކާރު މުވައްޒަފުންގެ 56 ޕަސެންޓް މީހުންނަށް މި ބޮޑުވުން އަންނާނެ އެވެ. މި ބައިގައި ހިމެނޭ މުވައްޒަފުންގެ މުސާރައަކީ ގާތްގަނޑަކަށް 5،000ރ. އެވެ. އަދި ކެޓަގަރީގައި ހިމެނޭ މުވައްޒަފުންގެ މުސާރައިން ގާތްގަނޑަކަށް ނުވަ ޕަސެންޓުގެ އިތުރުވުމެއް އަންނާނެ އެވެ.
މުވައްޒަފުންގެ މުސާރަ ބޮޑު ކުރުމާއެކު ޑެޕިއުޓީ ޑިރެކްޓަރުން ފެންވަރުގެ ބޭފުޅުންނަށް 900ރ. ބޮޑުވާނެ އެވެ. އަދި ޑިރެކްޓަރުން ފެންވަރު ބޭފުޅުންނަށް 1100ރ. ބޮޑުވެ އެވެ. މި ކެޓަގަރީގައި ހިމެނޭ ބޭފުޅުންގެ އެވްރެޖު މުސާރައަކީ ގާތްގަނޑަކަށް 7،000ރ. އެވެ. މީގެ އިތުރުން ޑެޕިއުޓީ ޑިރެކްޓަރުން ފެންވަރުގެ ބޭފުޅުންނަށް 1300ރ. ބޮޑުވާނެ އެވެ.
މި ލެވަލްގެ ބޭފުޅުންގެ އެވްރެޖު މުސާރައަކީ ގާތްގަނޑަކަށް 10،000ރ. އެވެ. އަދި ސަރުކާރު މުވައްޒަފުންގެ ތެރޭގައި ހިމެނޭ އެންމެ މަތީ ބޭފުޅުން ކަމަށްވާ ޑިރެކްޓަރު ޖެނެރަލުންގެ މުސާރަ އަށް 1،500ރ. އިތުރުވެ އެވެ. މި ލެވަލްގައި މަސައްކަތް ކުރައްވާ ބޭފުޅުންގެ އެވްރެޖު މުސާރައަކީ ގާތްގަނޑަކަށް 15،000ރ. އަށްވުރެ ބޮޑެވެ.
ރައީސް އަބްދުﷲ ޔާމީން ވިދާޅުވެފައި ވަނީ، މިއަހަރުގެ ކުރީކޮޅު އެންމެ އާދައިގެ މުވައްޒަފުންގެ މުސާރައިން، 100 އިން 37 ޕަސެންޓް ބޮޑުވެގެން ދާނެ ކަމަށެވެ.
މުވައްޒަފުންގެ މުސާރަ ބޮޑު ކުރުމަށް ސަރުކާރުން ވަނީ މި އަހަރުގެ ބަޖެޓުގައި 234 މިލިއަން ރުފިޔާ ހިމަނާފަ އެވެ. އަދި އެންމެ ފަހުން މުސާރަ ބޮޑުކޮށްފައިވަނީ 2009 ވަނަ އަހަރު އެވެ. ސަރުކާރު މުވައްޒަފުންގެ ގޮތުގައި ގާތްގަނޑަކަށް 23،000 މީހުން މަސައްކަތް ކުރެ އެވެ.