އިރާގާއި ސީރިއާގެ ހަނގުރާމަތަކުގައި ބައިވެރިވި މީހުން ދިވެހި ފުލުހުންގެ ތެރޭގައި އުޅޭ ކަމަށް ކުރީގެ ރައީސް މުހައްމަދު ނަޝީދު ވިދާޅުވުމާ ގުޅިގެން ފުލުހުންގެ ިދާރާއިން އެކަން ކުށްވެރިކޮށްފި އެވެ. ފުލުހުން ބުނީ އިރާގާއި ސީރިއާ ފަދަ ގައުމުތަކުގައި ހަނގުރާމަތަކުގައި ބައިވެރިވެފައިވާ ބަޔަކު ދިވެހި ފުލުހުންގެ ތެރެއަކު ނުލިބޭނެ ކަމަށެވެ.
އިންޑިއާގެ "ޓައިމްސް އޮފް އިންޑިއާ" އަށް ނަޝީދު މިއަދު ދިން ބަސްދީގަތުމެއްގައި ވަނީ ދިވެހި ފުލުހުންނާ ސިފައިންގެ ތެރޭގައި ސީރިއާ ތަންތަނަށް ހަނގުރާމައަށް ގޮސް އެނބުރި އަންނަ މީހުން އެބަތިބި ކަމަށެވެ.
ނަޝީދުގެ ވާހަކަ ދޮގުކޮށް ފުލުހުން މިއަދު ނެރުނު ބަޔާނުގައި ބުނީ، އެފަދަ ދޮގު ތުހުމަތުތައް ފުލުހުންގެ މުއައްސަސާއަށް ނުކުރުމަށް ހުރިހާ ފަރާތްތަކަށް އަންގާ ކަމަށެވެ. ނަޝީދު އެފަދައިން ވާހަކަދައްކަވާފައިވަނީ ނަޝީދުގެ އަމިއްލަފުޅު މަގުސަދެއް އޮވެގެން ފުލުހުންނާ މެދު ދެކޭ ގޮތް ބަދަލުކޮށްލުމަށް ދެއްކެވި ވާހަކަފުޅުތަކެއް ކަމަށް ވެސް އެ ބަޔާނުގައި ބުންޏެވެ.
"ދިވެހި ފުލުހުންގެ ހިދުމަތަކީ ރައްޔިތުންނަށް ހަމަހަމަ ރައްކާތެރިކަން ފޯރުކޮށްދޭ މުއައްސަސާއެއް،" ފުލުހުންގެ ބަޔާޏުގައި ބުންޏެވެ.
ފުލުހުންގެ އިދާރާއާ ގުޅިގެން ސާބިތު ނުހިފޭ ދޮގު ވާހަކަ ދައްކާ ފަތުރާނަމަ ފިޔަވަޅު އަޅާނެ ކަމަށް ވެސް އެ މުއައްސަސާއިން މިއަދު ވަނީ ބުނެފަ އެވެ.