ބޯލްޓިކް ގައުމުތަކަށް ހާއްސަ ކޮށްގެން، އެސޯސިއޭޝަން އޮފް ޓްރެވަލް އެޖެންޓްސް (އަޓާ) އިން ރޯޑްޝޯއެއް ބާއްވަން ނިންމައި ބައިވެރިވާން ހުޅުވާލައިފި އެވެ.
އަޓާ އިން ބުނި ގޮތުގައި ބޯލްޓިކް ޓްރެވަލް ގްރޫޕާ ގުޅިގެން "މޯލްޑިވްސް ބޯލްޓިކް ރޯޑްޝޯ 2018" ގެ ނަމުގައި ލިތުއޭނިއާ އާއި ލެތްވިއާ އަދި އެސްޓޯނިއާ ހިމެނޭ ސަރަހައްދުގައި ބާއްވާ ރޯޑްޝޯއަކީ ޓޫރިޒަމް ވިޔަފާރި ކުރާ ފަރާތް ތަކުން ޕެކޭޖުތައް ވިއްކުމާއި ޓްއާ އޮޕަރޭޓަރުންނާ ގުޅުން ބަދަހި ކުރުމަށް ބާއްވާ ހާއްސަ ހަރަކާތެއް ކަމަށެވެ.
ވިޔަފާރި އާއި ވިޔަފާރިތައް ބައްދަލުވާ ގޮތަށް މި ރޯޑްޝޯ ބާއްވަނީ އެ ސަރަހައްދުގައި ހަރަކާތްތެރިވާ ޓްރެވަލް ކުންފުނިތަކާއި ދިވެހި ޓްރެވަލް އެޖެންޓުން އެއް ފުރާޅެއްގެ ދަށުން ބައްދަލުވާނެ މަގު ތަނަވަސްކޮށްދޭށެވެ. މި ރޯޑްޝޯގައި ލިތުއޭނިއާ އާއި ލެތްވިއާ އަދި އެސްޓޯނިއާ ކޮންމެ ގައުމަކުން 50 އެޖެންޓުން ބައިވެރިވާނެ އެވެ.
އަޓާ އިން ބުނި ގޮތުގައި މާޗު 20 އިން 22 އަށް ބާއްވާ މި ރޯޑްޝޯގައި ބައިވެރިވުމުގެ ފުރުސަތު މި މަހުގެ ނިޔަލަށް އޮންނާނެ އެވެ.
ޓްރެވަލް އެންޑް ޓޫރިޒަމް ދާއިރާގައި މަސައްކަތް ކުރާ ގިނަ ފަރާތްތަކެއް ހަރަކާތްތެރިވާ އަޓާއިން މި އަހަރު ރާއްޖެ އިޝްތިހާރު ކުރުމަށް 15 ފެއާއެއްގައި ބައިވެރިވާން ވަނީ ނިންމާފަ އެވެ. އޭގެ ތެރޭގައި ގިނަ ރޯޑްޝޯތަކެއް ހިމެނެ އެވެ.